سؤال عن السنوركل ، ياريت اللى يعرف يقولنا ؟

**egypt_slave2000** · 05-11-2011 10:20 PM

السلام عليكم
مش هطول عليكم ، انا قررت انى ازور الاماكن السياحيه فى مصر حته حته ، فى سنه او اتنين او تلاته مش مهم ، حسب الظروف بقى ، المهم انى انشاء الله هلفها كلها واصور كل شبر يستحق التصوير ، لكن واحد من زملائى عرض عليا رحله لدهب ، انا قريت ان اهم شىء هناك الغطس ، والسنوركل ( لمن لا يعرف هو استخدام القصبه و النظاره لمتابعة الاحياء المائيه دون غطس فقط من السطح ) بس فيه مشكلتين او تلاته
اولا ، اخوكم مبيعرفش يعوم اصلا ، فيه ناس قالتلى ممكن تلبس جاكت النجاه اللى بيتنفخ ده عادى وهتتفرج زيك زى اللى بيعوم ، وقالوا انه بيتأجر هناك ( فهل المعلومات دى كلها صحيحه )
ثانيا لو فعلا عدة السنوركل بتتأجر هناك هيا و الجاكت اللى زى العوامه ، ايجارهم كام تقريبا
ثالثا لو الموضوع ينفع فعلا ، وعجبنى وحبيت اكرره ، الناس قالتلى ساعتها يبقى الافضل انك تشترى بقى عده خاصه بيك ، السؤال بقى ، بيتباع فين وبكم
النقطة الاخيره تحديدا ، انا قريت ان ممكن ان اللى بيبعها يصنعلك واحده مناسبه لقياس النظر بتاعك لو انت نظرك ضعيف ( معلش بقى مبعرفش اعوم وبلبس نضاره وعاوز اعمل سنوركل ، شفتوا بواخه اكتر من كده ؟!!!)

**marsguy** · 06-11-2011 01:17 AM

السلام عليكم ورحمة الله وبركاته،،،

فعلاً عدة السنوركل والزعانف بتتأجر وبتقيس كذا ماسك لحد ما تلاقي اللي يريحك.

الزعانف + الماسك إيجارهم من 10 لـ 20 جنيه وغالباً هايكون ثمنهم محسوب في الرحله لو إنت رايح رحله يوم واحد حد منظمهالك.

الزعانف مش ضروره أوي بس هي بتساعد إنك تعوم أسرع بس ممكن تجيبلك شد عضلي خاصة لو واسعه عليك سنه. حاول تلبس واحده على قدك بالظبط.

إيجار اللايف جاكت برضه من 15 لـ 20 جنيه وهو فعلاً في ناس مش بتعرف تعوم وبينزلوا بيه عادي. لكن طبعاً محتاج في الأول تتخلص من الرهبه بتاعت عمق المياه. بس أنا شفت كذا حد مش بيعرف يعوم خالص لكن عمل سنوركلنج باستخدام اللايف جاكت.

ممكت تشتري ماسك خاص ليك طبعاً هايكون أنظف من دهب أو من أي محل أدوات رياضيه محترم في أي مدينه بس إشتري الماسك اللي يريحك في لبسه بس للأسف مش كل المحلات بتسمح إنك تقيس الأول.

بالنسبه للماسك المعدل لدرجة قوة النظر: إحنا هنا مش بنصنع ماسكات بس طبعاً محتمل يكون في بره ماسكات جاهزه للناس اللي عندهم قصر أو طول نظر بدرجه معينه. أنا ما شفتش بنفسي بس إحتمال كبير جداً يكون في.

لكن أنا متأكد إن في نظارات ميه بتتباع جاهزه -1 و -2 وكده وموجوده في مصر عادي.

شكراً

**heshamzaky** · 06-11-2011 02:33 AM

بما انك مش بتعرف تعوم بلاش الزعانف حا تتقل رجليك شوية و لو مش واخد عليها حا تحس انك تقيل مع العلم انها بتسرعك جدا فى العوم
الزعانف نوعين نوع بيتلبس زى الجزمة و نوع اخر زى الصندل
الصندل حا يبقى اخف شوية على رجليك
بالنسبة للنظارات بتاعت المية من اى محر رياضة و سعر المعقول بتاعها من 40 الى 80 جنية و طبعا فية اغلا بس انت مش حا تحتاح كل دة
و الافضل تكون النظارة سيلكون و لو التنفس من غير كورة فى النهاية خلى بالك لو غطست فى المية الانبوب بيتملى مية فلازن تنفخ جامد علشان ما تبلعش المية

**elewey** · 06-11-2011 02:38 AM

وممكن متنزلش الميه خالص و خد جوله بالجلاس بوت glass boat حشوف الشعب المرجانيه و كل حاجة تحت الميه

**heshamzaky** · 06-11-2011 02:41 AM

دة شكل الزعانف الصندل
انا شخصيا مش بحبها بفضل المقفولة ((( الجزمة )))

و دة شكل الزعانف الجزمة

**M!NA** · 06-11-2011 02:45 AM

اقرا الموضوع ده...

http://www.nilemotors.net/Nile/246279-a.html

و ده تقرير بالصور...

http://www.nilemotors.net/Nile/254544-a.html

و لو حبيت تنورني في الرحلة اللي جاية قوللي و أنا تحت أمرك...

**banboty** · 03-02-2012 01:49 PM

الاخ محمد سليم

ممكن اعرف بتتعمل فين و السعر هيبقى في حدود كام للنظارة السنوركل المعدلة للنظر و مدى كفاءتها ( - 1.5 ) ؟؟

**naser_56** · 03-02-2012 03:35 PM

انصحك هات نظاره خاصه بالسكوبا احسن وهات حاجه نضيفه بالمره علشان هتفضل معاك علي طول علشان انته لو نزلت الميه وعملت سنوركل مره او اتنين بكده هتكون دخلت في مرحله الادمان للاعماق وصعب انك تطلع منها تاني وانا متاكد تماما انك هتكمل وهتاخد دورات سكوبا وان شاء الله نشوفك كده مدرب انقاذ بصراحه الغطس اجمل حاجه في الدنيا وبالتوفيق يارب.

**mohamed_selim** · 06-02-2012 12:46 PM

المشاركة الأصلية كتبت بواسطة banboty

الاخ محمد سليم

ممكن اعرف بتتعمل فين و السعر هيبقى في حدود كام للنظارة السنوركل المعدلة للنظر و مدى كفاءتها ( - 1.5 ) ؟؟

معلش للتاخير كنت مسافر و معنديش نت

بتتعمل عند محلات ادوات الغطس
كفائتها 100% انا عاملها ل 2 اصحابى نظرهم -4 و -4
التكلفه مختلفه ... فى انك تجيب نظاره عادى و بيتلزق عليها من جوه عدسات و دى ارخص حاجه ممكن تعمل حوالى 300-350 ...
ممكن تجيب نظاره مخصوصه عدساتها بتتفك و يتعمل عدسات نظر مكانها (مش عارف سعرها بالظبط دلوقتى بس هتكون اغلى حاجه بسيطه تعمل مثلا 450-500 )
ممكن نفس الحل اللى فوق بس بنجيب العدسات من بره و بتعمل حوالى 700-800

الحل الاول ارخص بس مدى الرؤيه بيكون اقل لأانك اكلت جزء من مساحة زجاج النظاره (لو فرضت ان الزجاج مربع ... هتلزق عليه عدسه مستديره فبدل ما هتشوف من المربع كله هتشوف من الدايره اللى بتكون اصغر)

الحل التانى وسط ... مش غالى بس العدسات بتتعمل فى مصر فممكن بعد فتره تتجرح بس مش مشكله كبيره قوى

الحل التالت اغلى بس اضمن حاجه