السلام عليكم ورحمة الله وبركاته

والله يا جماعة انا مش عارف اقول ايه ومش عارف ولا قادر استوعب اللى بيحصل

من يومين وانا واقف على الدايري ترلا جبلي الجمب الشمال (الباب بالرفرف والاكصدام)

قلت الحمد لله انها جت على قد كدة وعين صابت العربية وربنا سترها

وديتها تتصلح وبقالها يومين عند السمكري ورشيت الباب والرفرف

ولسه مستلمها النهارده

الحمد لله الراجل رجعها زي ماكانت ويكاد يكون مافيش فرق وشغل نظيف ولمعت العربية وكلو تمام

وانا مروح بيها طالع من شارع جانبي يقوم اتوبيس رحلات يجبلي الجمب التاني وبرضوا وانا واقف او ماشي على سرعة 5 كم

اعمل ايه طيب دلوقتي ؟ كل ده عشان ركبت في العربية جنوط وحطيت عليها شوية استيكرز ؟

ارمي الجنوط واقطع الاستيكرز عشان العين تبعد عن العربية ولا ايه ؟

مش عارف والله اللى بيحصل ده من ايه وليه

ده الواحد وهو لسه بيتعلم السواقة جديد ماكنش بيحصل معاه الكلام ده

يا اما انا نسيت السواقة ياما في حاجة غلط

مش عارف ايه تاني ممكن يحصل والعين هتفضل ورايا لحد امتى

كان المفروض اني نازل رايح مشوار ركنت العربية وقلت والله ماهنزل بيها ومش هصحلها وهسبها كدة

حد يقولي ده من ايه وليه واعمل ايه عشان خلاص هيحصلي حاجة ومش قادر لا افكر واستوعب اللى بيحصل خبطتين في يومين مش ممكن يعني والله

لكن في الاخر برضوا الحمد لله على كل شئ