الموضوع: عـــــــاوز أركب حاجة تانيـــــــة ممكن تساعدوني ؟؟ للأهمية

كل عام و انتم بخير جميعا
انا متابع المنتدي من بعيد لبعيد علي رأي د/هلالي
لأن مشاكل عربيتي بقيت أحس انها ملهاش حلول
فباخدها من قصيرها و ادخل اقرأ فقط و لو عارف معلومة بدخل اقول و بس

أنا كنت جايب العربية بــ63 ألف و دلوقتي صارف عليها قرب تمنها

بعضها بسببي و البعض الأخر ان مالكها اللي قبلي زيه زي اي واحد بيحسبها صح لما يلاقي عربيته بتفتح بقها يلككها و يقوم قالبها و يريح دماغه و يجيب ست ستها و فيكترا برده او غيرها

المهم بقا انا قررت و بعد طول انتظار اني ابيع العربية
عاوز اعرف ايه ممكن اجيبه بدالها و يكون في نفس تمنها او ازيد من 5 الي 10 الاف

انا مش عاوز حاجة تتعبني لأني هاكون في فترة نقاهة من العربية دي
و اي نكسات تصليح او اعطال هاطلق العربيات بالتلاتة و اعمل زي م/تامر و اجيب موتوسيكل

ممكن بعد كام سنة ابقا اغيرها و ارجع اجيب عربية نمرة واحد تاني سواء اوبل او بي ام
المهم اكون قادر علي مصاريفها

اللي شوفته ع النت عربيات مناسبة الي حد ما :

1 / لانسر بومة بس ماسكة سعر و كله ضارب في السما علي ايه معرفش بس هي مريحة كعربية مش عاوزة غير زيت و بنزين لو هاتجيبها سليمة و موفرة في البنزين

2 / بيجو 406 بس معرفش فيها الهوا ولا اسعار قطع غيارها ولا اي حاجة ولا اي تفاصيل عنها و موديلها ينتهي سنة كام و هل معقدة ولا لأ ,, و صنايعية البيجو ايديهم فيها ولا عاملة عندنا زي الفيكترا A تبقي ال504 و505و405 و هي تبقي الــ406 بالنسبالهم مبهمة زي الفيكترا B

3 / أوبترا : واحد معرفة راسه و الف سيف اني اركبها عشان مع 2 قرايبه و مريحاهم و مصاريفها مفيش و بنزين و شكلها مقبول نسبيا بس انا مش متكيف من صالونها ولا تابلوه ,, مش ميت عليها يعني و هل صحيح ميتركبش منها غير الكوري2066 و الباقي مصري ؟؟

4 / ليجانزا : بس موديل قديم تاني و وجع قلب ولا ايه ؟؟ و فيها مواتير اوبل علي ما اعتقد
و عربية محترمة ,, لو حد عارف معلومات عنها ميبخلش عليا

5 / أوكتافيا : ألماني و قتح كبوت زي ما عربيتي بتعمل ؟؟ واحد قاللي ان A3 او A4 مش فاكر بصراحة انها قطع غيارها ارخص من الأوبل ,, الكلام دا صح ؟؟ ولا غالية في حاجات و رخيصة في حاجات ,, مع العلم انه ركب الفيكترا و ركب الأوكتافيا و بيقولي انها ثابتة اكتر كمان ع الطرق ,, لكن انا مش عارف تفاصيلها و معقدة ولا كويسة

انا لو عليا اجيب كورولا موديل 2007 بس غالية جدااااا ,, لكن عربية مفيهاش كلمة لكن اللي حاكمني الماديات ,, انا ممكن اكمل لحد الــ65 او الــ70 يوم ما يضرب الدم و عاوز عربية تريحني زي الفيكترا في ركوبتها و صالونها و سحب و قطع غيارها كويسة

أرجـــــــــو الأفــــــــــــادة

اخوكم م/ محمد حاجي