الاخوة الاعزاء لمن يهمة الامر

انا مركب مكن كهربا لل 4 ابواب مكن استيراد و تم عمل اخرام جديدة ف الابواب لتركيب المكن و الازرار متركبة مكان علامة ماروتى اللى ف الكونسول للامامى و الخلفى . تركيب المكن تم ف شمبليون و تقفيل الكهربا تم ف التوفيقية لانى ف نفس الوقت كنت بركب انذار و سنتر لل 4 ابواب و مكن رفع زجاج . افتكر مكن الزجاج لل4 اتكلف 800 ج بخلاف شغل التوفيقية و مشتريات التوفيقية و المصنعية . و طبعا بخلاف اللى انا عملتة من تعديل بنفسى لان كل الابواب كان مدخل السلوك ف خرطوم و داخل من تحت فرش الباب شكلة كان غبى اوى و مش عاجبنى و شكلها متفبركة المهم عندى استلم الحاجة شغالة و بعدين اتصرف انا بمعرفتى . تانى يوم و بعد الفحص و التمحيص اكتشفت ان الابواب الامامية ليها اخرام ممكن تدخل منها السلوك للباب من القايم نفسة طبعا فكيت فرش الباب و كل السلوك و ابتديت ادخلهم ف طريقهم الصحيح من القايم للباب كدة خلصت البابين الامامى . نيجى للمشكلة ف الابواب الخلفى مفيش اى اخرام و لا مكان لدخول الاسلاك الا من تحت الفرش زى مكان عامل بس برضوا مش عاجبنى شكلها زبالة دورت ف الباب نفسة على اى خرم و لقيت خرم تحت تقريبا 6مم جنب كاوتش الباب قلت هستعمل الخرم دا ف دخول الاسلاك بس طبعا دا خرم صغير انة يدخل 4 اسلاك 2 للمكن الزجاج و سلكهم تخين طبعا و سلكين للسنتر توكلت على الله و قلت مبدهاش و زى متيجى . جبت بنطة 12 مم حدادى طبعا و اول حاجة عملتها وسعت الخرم ال 6مم و بعد كدة قعدت جوة العربية و قفلت الباب و مكان الخرم اللى عملتة دخلت فية مسمار و علمت مكان الخرم المقابل لية ف القايم و رحت خارم ف القايم نفس الخرم 12مم بس صعبة مش سهلة و باظت منى بنطتين و لازم يكون معاك كباية فيها ميية تخرم شوية وتروح مبرد البنطة و تخرم تانى بس الحمد لله فتحت الفتحة طبعا كانت صعبة لان الجزء السفلى كان صاج و تحتية تقوية عشان كدة كان صعب التخريم فيها . بعد كدة نعمت بالصنفرة مكان الاخرام عشات متكلش الخرطوم او الاسلاك بس الحق الخرم كان تمام على مقاس الخرطوم و دخلت الاسلاك الاول من جهة القايم و رحت مركب الخرطوم و بعدين دخلت الاسلاك لضرفة الباب و دككت جزء من الخرطوم ف القايم و جزء ف الباب و ظبط الطول المطلوب مع فتح الباب و قفلت الاسلاك تانى و كويس ان كان فى طول و محتجتش اطول الاسلاك نتيجة اللفة اللى عملتها و الحمد لله بقت زى الفل و لا تشوف حاجة و تحس انها فابريكة جاية كدة بس خدت منى شغل اكتر من نص يوم بس مش مشكلة عندى الوقت المهم النهاية اية و الحمد لله طلعت احسن مما كنت متخيل شغل مزاج مش صنيعية و اقلب . الحمد لله ربنا يباركلى فيها ماروتتى العزيزة و يكفينا شر الطريق قولوا امين

المهم اللى عاوز اعرفة اللى مركب سنتر خلفى برضوا الاسلاك داخلة من الفرش زى مكان عندى ؟؟ و الابواب الامامى داخلة للباب ازاى ؟؟ من الفرش و لا من الاخرام الموجودة الفابريكة ؟؟