الطريق الدائرى وصناعه الموت والنيسان صنى
امبارح وانا راجع من فرح واحد زميلنا فى الشغل ومعايا 3 من اصحابي ربنا اكرمنا برحمتة وانقذنا من موت محقق .
المهم احنا كنا واخدين الدائري من المعادى ودخلنا وصله المريوطيه وعدينا من فوق المحور فى اتجاهنا الى نزله شبرا طريق السلام الاسماعيليه الطريق كان فاضى الساعه كانت 11 مساءا وعند كمين نزله القوميه كان على اليمين قمت واخد الشمال وعلى سرعة 120 كيلو وفجئه وبدون سابق انذار او اشارات ضوئيه او اى علامه الاقى الحاره الشمال بالكامل مقفوله ببلوكات اسمنتيه بالعرض وكمان المنطقة دى مكانش فيها اي اضاءه ومكنش بينى وبين الخرسانه الا 2-3 متر ربنا ثبت اعصابى وعلى اخر لحظة قمت محود كل الدركسيون يمين والعربية استجابت بشكل رائع و بعد ما فديت البلوكات اخر حتة فى الاكصدام الخلفى حكت فى اخر بلوك مع حكة فى الجنط الشمال.
قامت العربية عامت وانحرفت بشدة ناحية اليمين وبعد كدة ناحية الشمال وقمت دايس فرامل والعربية قامت واخدة خمسة ووقفت مكانها زى الطوبة ةالعربية الحمد لله اثبتت كفائتها فكل حاجة الثبات والاتزان والفرامل وكل الى على الدائرى مت العربيات اللى وقفوا استغربوا ان العربية ما اتقلبتش.
انا فى النهايه بحمد ربنا كل لحظة والموضوع مش موضوع عربيات ربنا كرمنى وقدرت افادى الخرسانة وكرمنى تانى مرة ووقفت والعربية وما اتقلبتش وكرمة زاد لما محدش خبط فيا من ورا لان كل العربيات كانت طايرة.
اخر حاجة جة العسكرى من عند الكمين وقال ان الاشارات الضوئية كانت محطوطة واتسرقت .
يعنى اية الاهمال دة ازاى يسيبوا الطريق كدة وميحطش اى اشارة وقال ان فى ناس كتيرة كانت هاتتخبط .
واللى كان وراى قالى ان هو ما كانش شايف البلوكات وكمان اللى كانوا معايا فى العربية.
وحسبى الله فى كل الناس اللى ماعندهمهش ضمير.
واالحمد لله فى الاولى والاخرة. ثم فى النهاية الحمد لله على نعمةالنيسان صنى سوبر صالون.
انا فى النهاية باتصح الناس انهم يمشوا على الدائرى فى الحارات اللى فى النص ويسيبوا اليمين والشمال
اليمين يسيبوة للميكروبصات و الشمال يسيبوه للنقل والملحوظة الغريبة ان فى بلوكات اسمنتية من الشمال مكسرة ومخلوعه من مكانها على طوول الطريق الدائرى او المحور.
وربنا يسترها على الكل.