الموضوع: بالله عليكم عاجل جداً

سيدي الفاضل انا ليا 1 صديق شخصي فاتح في الحرفين انسان محترم جدا وعندو صنايعية ممتازين

وان شاء الله هيرجعلك العربية جديدة بنسبة 96- 98 %

لأنك مهما سمكرت في العربية انتا فاهم هيبقي في فوارق حوالي 2-3 ملي لما تيجي تركب الاكصدامات

والتكلفة هتكون ممتازة وبسيطة

والشغل الي هيتعمل في العربية هوا الي هيخليك تحكم

ونصيحة اخوية من واحد اتمرمرط وطلع عين 3 الي خلفوة في الحرفين ياريت تحطها حلقة في ودان حضرتك

اول حاجة يا باشا
------------------------

لازم تبقي تحط في دماغك ان العربية هتاخد وقت في التصليح من 10 - 20 يوم .. نظرا لأن هيا فيها شغل كتير + ان الورشة الي هتشتغل فيها هتكون شغالة في اكتر من عربية غير عربيتك + ان الاستعجال هيساعد الصنايعي انو يعملك شغلك كروتة ويقول بينو وبين نفسو هوا كدة كدة مستعجل فا انتا لازم تحط في دماغك ان العربية هتاخد وقت طويل عشان تطلع صح 100 % و 10 علي 10


تاني حاجة
---------------------------------------------

الصنايعية دول عاملين زي الخدام الحبشي .. تضربو بالكرباج يشتغل زي الفل في العربية تعاملو كويس يركبك ويبهدلك .. اوعي في يوم من الايام تبقي راجل محترم مع الناس دي الي هوا

خد العربية اهية ولما تخلص كلمني اوعي اقسم بالله العظيم هيقول عليك ( افندينا ) وهيسلمك عربية زي الزفت
انتا تهيئك نفسك انك في خلال 10 - 15 يوم الي هتتعمل فية العربية كل يوم تروح تقعد معاهم 5 ساعات تضرب طقم الخناقات زي ما بيقولو وتروح تقعدلهم بايت معاهم .. لأنك بكل بساطة لو معملتش كدة هينفض لعربيتك ويشتغل في عربيات غيرك عاملين زي الترزي كدة توديلو البنطلون يقصرو وترجعو بعد يوم يقولك اقعد شوية وخدو عكس لما تقعد تزن علي دماغو

تالت حاجة
-------------------------------------------
روح صور اي عربية فابريكة وخلي الصور معاك علي تلفونك او الاب توب ولما يبداء يشغل في العربية ديما تقارن بين شكل الفبريكة وعربيتك .. وديما ميعجبكش العجب .. وكل شوية لاء محتاج يتظبط شوية لاء ظبطهولي اكتر لاء اعدلهولي كمان لاء انا الشغل دة ميعجبنيش .. لاء ظبطو لاء رجلشو وهكذا كفرهم لية .. لانو بيجس نبضك في الاؤل لو لقاك مش فاهم هيلبسك صح ويكروتك لازم تقرفو ويبقي عارف انك فاهم في العربيات واضعف مثال خلي الجملة الشهيرة في بوقك انا بدفعلك فلوس مش بيبسي انتا قولت هترجعلي العربية جديدة. يبقي ترجعهالي جديدة


رابع حاجة
----------------------

اوعي اوعي اوعي اوعي اوعي تدفع فلوس بسهولة لازم سوري في اللفظ تبقي بخيل ومعفن وجلدة لانو دول ولاد وسخة طول ما انتا عليك فلوس ومبلغ كبير طول ما هوا هيقرفك يعني انا هديك مثال بسيط

انتا اول خطوة هتتعمل في العربية السمكرة .. طبعا الورشات المحترمة بيبقي فيها 3 .. سمكري .. والي بيعمل الدوكو وبيعمل البويا وبيمعجن .. والميكانيكي انتا حاليا محتاج اول اتنين

يبقي كلامك مع اول واحد باشا انتا تقدر ترجعلي العربية دي زي الصورة دي الفابريكة ؟ يقولك اة قولو طيب هتتكلف كام شاكب راكبببببببببببب ؟

يقولك هتتكلف مثلا 1500 - 2000 جنية .. قولو لاء انتا كدة مش عايز تاكل عيش ولا تكسب زبون عربياتو كتير اوي

انا هعمل شغل كبير في العربية عارف لو قالك ربع جنية ؟ فاصل مع امو لانو عارف انك هتفاصل فا بيعلي عن الرقم الي عايزو عشان تنزل للرقم الي في دامغو المهم تفضل تفاصل مع امو لحد ما تتفقو
وتبقي انتا مرتاح نفسيا واحتمال السمكرة تدخلها في 1200 - 1500 جنية تقولو اوك اشتغل

محتاج اية اجبهولك دلوقتي هيقولك 1 - 2- 3- 4- 5 تكتب الحاجات دي في ورقة وتروح تسئل عليها وتجيبها في حاجات لازما ولابد تجبها استيراد زي الكبوت - الكارتيلات - الريداتير وهكذا وفي حاجات تجيبها كوري المهم تفضل تلف طول اليوم تجيبهم بأحسن سعر وتدهوملو وتديلو 200 جنية وتقولو اشتغل هيقولك طب تقولو بلا طب بلا بتاع تجيب كرتونة تشيل حاجتك من العربية كلها وقولو انا كل يوم هاجي اتابع العربية وكل يوم تيجي 4-5 ساعات تشوف اية الجديد خلصت من السمكرة نهائي ؟ واي حاجة تحس انها مش عاجباك تقولو وحسسو انك هتبيع العربية فا عايزها فابريكة متتهرش وديما خلي بالك من الفوارق يعني مشي صباعك في الشنطة شوفو في فرق ولا لاء اقفل الشنطة وافتحها اقفل الكبوت وافتحو شوفو في فارق ولا لاء ولما تحس فارق قولو اظبطو علي قد ما تقدر وهكذا وكل 4-5 ايام تديلو 100 جنية كل ما يقولك علي فلوس بس اوعي تخلص حسابك حسابك يفضل فية بتاع 400 - 500 جنية لحد ما تستلم العربية وتمشي عشان دي عالم زبالة ولا بتقراء ولا تكتب وتعامل وسخ

خلصت من السمكرة ؟ تبقيلو 400 جنية وتدخل علي البوهيجي

هياخد منك بتاع 200 جنية دوكو وخلافو تدهوملو يمعجن الاكصدامات والكبوت وهكذا ولما يخلص تروح معاة تشري البويا .. وتديلو 100 جنية لما يجي وقت انها تدخل تترش الحاجة تخرج

وهكذا وحاول كلامك يبقي قليل في العربيات واوعي تحسسو انك متفهمش فيها ولا تقولو انا اول مرة اعمل حادثة فهمو انك بتعمل حوادث كتير وفاهم الشغلانة

خامس حاجة واخيرا

----------------------------------------

حاول تبقي سخي في 3 حاجات اساسية عشان الناس دي يبقي في بينك وبينهم مودة وعشرة

1- الاكل .. والشرب كل يوم تروحلهم مثلا انا هجيب اكل تاكلو معايا وتجيب كشري ليك وليهم

2- ديما معاك علبة سجاير مش بتاعتك نضيفة شوية l.m روزمان وتوزع منها

3- الكيف دول عامل لازم يبقو عاملين كيف

وربنا يكرمك ولو محتاج اوديك عند الراجل الي انا شغال عندو قولي وانا عيوني ليك

انا الراجل الي تبعي في ميزة حلو اوي

انو ملوش في شغل الوساخة .. انا باخد قد كدة فك وتركيب .. ولا مثلا تقولو الباغة بتاعت العدادات وسخة نضفهالي يقولك انا بفوكها بكذا ولا مثلا ركبلي اللمبة دي يقولك دي بتتركب بكذا الي هوا اي حاجة بتتعمل ياخد فيها فلوس

الناس دي هتفكلك الاكصدامات مرة واتنين وتلاتة و10 ومش هيقولك اي حاجة

كل الي هما محتاجينو انك الاتفاق الي اتفقت معاهم فية مترجعش فية + تعاملهم معاملة ادمية وتبقي حميم معاهم في الاكل والشرب كأنهم من اهل بيتك

وهيدوك عنيهم

ولو احتاجت اي حاجة ابعتلي رسالة خاصة ودة والله هعملهولك بكل حب وتقدير واحترام بدون اي مصلحة او اي شئ وانتا ممكن تشوف الشغل بعينك