انا : مش انا دخلت على الموقع بتاع الانتخابات ولقيت اسمي واسمك مسجل بقاعدة البينات بتاعة الانتخابات
هي : كويس والله .... تفتكر انزل العيال المدرسة بكرة ولا الدنيا برد ومطر ؟؟
انا : نزليهم طبعا هما ح يتدلعو ؟؟؟ لقيت اسمك في لجنة مدرسة السلام ( على بعد 200 متر من البيت شرقا )
هي : آيون ... مش دي اللي روحنا فيها ساعة الاستفتاء ؟؟ دي جنب رضا بتاع الخضار ..... بالمناسبة تحب تاكل ايه بكرة ؟؟
انا : اي حاجة المهم السلطة عشان الريجيم
هي : مش الميس بتاعت الولاد قالتلي ان مافيش انتخابات في مدرستهم وح يبقى فيه دراسة يومها
انا : حتى لو مافيش عندهم الولاد مش ح يروحو المدرسة يومها .... انا جعان وعاوز اتعشى
هي : ليه ؟؟؟ هما ح يروحو ينتخبو .... على فكرة ابراهيم أكل الرمان اللي كان ف التلاجة كله
انا : لأ طبعا هما اصلا بيعرفو علم مصر من علم اليمن ؟؟ لكن احسن يقعدو ف البيت علشان ممكن يحصل اي حاجة .... بتقولي خلص الرمان ؟؟؟؟ ..... امال انا ح اتعشى ايه ؟؟؟
هي : اي حاجة يا سيدي ....تفتكر ممكن يحصل اية يوم الانتخابات ؟؟؟
انا : ممكن المرشحين يتخانقو و يضربو بعض .... طب فيه اي فاكهه اتعشي بيها
هي : لأ محمود خلصها كلها ..... طب واحنا ايه اللي يخلينا نروح لما هما ممكن يمسكو ف بعض ؟؟؟
انا : لازم طبعا نروح ننتخب ... اذا كنت مش بافوت انتخاب من ايام مبارك طيب الله ثراه .... طب فيه اي اكل باقي من الغدا ؟؟؟
هي :.. لأ انا اكلته كله ...... طب وافرض اتخانقو سوا وضربوك ف النص بينهم
انا : لأ اطمني الناس هنا كلهم عارفيني ومش ح يضربوني ....... ح يقتلوني علطول من غير ضرب ..... طب فيه عيش سن ناشف وجبنة ؟؟؟
هي : لأ العيال خلصوة برضه .....بس انت بتهزر ولا بتتكلم جد ؟؟؟
انا : لأ طبعا باهزر ..... يعني مافيش اكل ف البيت خالص ؟؟؟؟
هي :يا سيدي الواحد زهقان كتر الاكل ..... المهم .... شكلك بتتكلم جد ...... انا باقول ما نروحش ننتخب ..... بلا نيلة
انا : ازاي بقى .... زي المرة اللي فاتت .... الساعة 8 صباحا نروح ننتخب ونرجع قبل البلطجية ما يصحو م النوم ... نروح مدرسة السلام تصوتي هناك بالصوت الحياني .... وبعدين نروح المدرسة الزخرفية عشان اصوت انا هناك ... وبعدين ابقي افطر انا فول من عند سيد عزوز( قال زهقانين من كتر الاكل قال )
هي : نعم ؟؟؟؟؟؟ وانت ليه ما تصوتش معايا ف السلام الابتدائية زي المرة اللي فاتت ؟؟؟؟
انا : لقيت اسمي في لجنة المدرسة الزخرفية ( 200 متر غربا )..... يعني قريب من سيد
هي : يعني انا ف مدرسة وانت ف مدرسة تانية ؟؟؟؟؟ ايه قلة الزوق دي ؟؟؟
انا : قلة زوق ؟؟؟؟؟ ليه ؟؟.... ده حتى سيد الفول بتاعة زي اللوز
هي : ازاي يخلو واحد صوته في مكان والمدام بتاعته ف مكان تاني ..... دي منتهى قلة الزوق .... هي المسألة باينة من اولها ..... بلا قرف .... انا مش رايحة انتخب .... دول ناس قليلة الزوق ... يبقو يدورو ع اللي يروحلهم .... انت قولتلي تحب تاكل بكرة بسلة ولا لوبيا ؟؟؟؟
انا : هه ...... لأ آكل خبيزة