أسئلة في السواقة من واحد مبتديء

**chihab18** · 21-05-2008 06:25 PM

ريح دماغك واشتري عربيه اتوماتيك وابقي شوف لك صرفه في تطليع الرخصه ؛ وابعد عن المانيوال ووجع قلبه

**ayman2009** · 21-05-2008 09:26 PM

المشاركة الأصلية كتبت بواسطة chihab18

ريح دماغك واشتري عربيه اتوماتيك وابقي شوف لك صرفه في تطليع الرخصه ؛ وابعد عن المانيوال ووجع قلبه

أنا العربيه اللي حسوقها لانسر 97
ديه اللي موجوده حالياً

**ayman2009** · 21-05-2008 09:29 PM

فيه سؤال تاني
لما بكون على الأول
وبعد كده شيلت رجلي من على البنزين خالص و دوست دبرياج وجيبت التاني
بعد ما عملت كل ده
لقيت العربيه وقفت مني الموتور وقف يعني!!!
حد عنده فكره ؟؟ليه
وهل الخطوات ديه صح ؟

**medomada** · 21-05-2008 09:44 PM

يا سيد أيمن الموضوع بسيط جدا , لازم الأول تفهم يعنى أيه دبرياج و لزمته ايه .
الدبرياج ما هو إلا الوصله بين الموتور و العجل يعنى مش معقوله الموتور يكون بيلف بسرعه و العجل واقف و العكس صحيح
يبقى بالعقل كده لما تكون لسه بتتحرك تكون محتاج تنقل حركه الموتور للعجل بالراحه علشان العجل واقف و الموتور بيتحرك يبقى لازم نوصل بينهم بالراحه لحد العجل ما ياخد سرعه الموتور و ده بيكون بإننا نسيب الدبرىاج بالراحه علشان و احنا دايسين دبرياج بنكون فاصلين الموتور عن العجل تماما و كمان فى نفس الوقت ندى الموتور شويه عزم و ده معناه نديله بنزين .
أما موضوع انها بطلت وانت بتنقل من الأول للتانى فا أكيد انت ما اديتش الموتور بنزين كفايه فا ما إدرش يزق العربيه بس كده

**knightmido** · 21-05-2008 09:52 PM

المشاركة الأصلية كتبت بواسطة ayman2009

فيه سؤال تاني
لما بكون على الأول
وبعد كده شيلت رجلي من على البنزين خالص و دوست دبرياج وجيبت التاني
بعد ما عملت كل ده
لقيت العربيه وقفت مني الموتور وقف يعني!!!
حد عنده فكره ؟؟ليه
وهل الخطوات ديه صح ؟

السلام عليكم استاذ ايمن .. اولا مبروك على العربية وثق تماماانك فى خلال فترة بسيطة جدا هتسوقها زى ما انت بتشوف اى عربية فى الشارع .. وعلى فكرة كل الأسئلة اللى انت بتقولها مرت على تفكير كل واحد فى بداية التعليم ..
نخش فى المفيد ... اولا ان شاء الله عربيتك احسن كتير من 128 فلو قدرت اتدرب عليها افضل .. ودى اسها فى التالى اولا لما تحب تحرك العربية من الثبات بعد ما تدوس الدبرياج وتنقل الأول وانت واقف من غير ما تدوس بنزين لو رفعت رجلك من الدبرياج بالتدريج هتحس انها بتتحرك معاك وسا عتها دوس سنة بنزين .... ولما تحب تنقل من الاول للتانى عندك حق ممكن تقف وده لانك بتشيل رجلك من الدبرياج بسرعة ومش بتدوس بنزين كافى فلاحظ وانت بترفع رجلم من الدبرياج اطغط بنزين بالتدريج وان شاء هتتحرك افضل ... وزيه فى التالت والرابع ... اسف للاطالة وبالتوفيق

**MMamdouh** · 21-05-2008 10:46 PM

المشاركة الأصلية كتبت بواسطة chihab18

ريح دماغك واشتري عربيه اتوماتيك وابقي شوف لك صرفه في تطليع الرخصه ؛ وابعد عن المانيوال ووجع قلبه

thats a bad idea

حتى لو حتركب اوتوماتك لازم تعرف ازاى تسوق مانوال

و لو عربيتك حديثة لازم تتعلم على عربية قديمة و تعبانة

كل الحاجات دى بتنمى احساسك بالعربية و ترفع مستوى مهارتك كسواق... اى حد يعرف يسوق عربية لانسر موديل 2008 اوتوماتك... لكن مش اى حد يعرف يسوق 128 موديل 79... لازم يبقى عندك احساس العربية عشان تعرف تتعامل مع كل اجهزة التحكم اللى غالبا بتبقى ب 20% من كفائتها و انت عليك ال80% الباقيين

MMamdouh

**ayman2009** · 21-05-2008 11:45 PM

شكراً ليكوا بجد على إهتمامكوا بموضوعي
معلش فيه سؤال كمان
لما بكون على الأول
وبعد كده أشيل رجلي من على البنزين
و أدوس دبرياج على الأخر
و أنقل على التاني
أعمل إيه بعد كده؟
هل المفروض أشيل رجلي من على الدبرياج سنه سنه و لحد ما أشيلها خالص بعد ما أشيلها أدوس بنزين؟
ولا المفروض أدوس بنزين سنه لتحت و أرفع رجلي من على الدبرياج بالتدريج؟
الكلام ده لما بنقل على التاني!!!!