الموضوع: صداقة اربع سنوات و ربع

بسم الله الرحمن الرحيم

اخي الكبير الفاضل د. المناهري
الأخوه الأفاضل اعضاء المنتدي الكرام

بعد التحيه :

اولا : اعتذر جدا عن تقصيري في الكتابه في المنتدي و ذلك لظروف خاصه بي
ثانيا : بالنسبه للسياره فانا و الحمد لله امتلك السياره من 18/7/2007 والحمد لله خلال تلك الفتره لم اتعرض معها لأي عطل غير متوقع الا في مره واحده فقط سوف اقوم بسرد قصتها في اخر حديثي.
خلال فترة امتلاكي للسياره قمت بتغيير القطع التاليه :
1- طقم جلب و بيض مقصات تويوتا ( وذلك طبعا لأني مركب جنط 17 وكاوتش 225/45)
2- سنسور الأيدل وهو الخاص بالدايو النوبيرا و ليس اللانسر .
3- سنسور السرعه و ده جبته من التوكيل .
4- شدادات الأتزان الأماميه و هي الخاصه بتويوتا كورولا (من 2001 الي 2007).
5- تيل الفرامل الأمامي وهو الخاص بتويوتا كورولا (من 2001 الي 2007).
6- تيل الفرامل الخلفي و ده جبته من التوكيل لأنه خاص بتويوتا كامري بس الي الأن مش عارف احدد موديل سنة كام و ذلك لعدم انتشار السياره الكامري في مصر .
7- قاعدتي الموتور الأماميه و اليمني وهما ايضا بتوع تويوتا كورولا .
8- طاقم دبرياش كامل ( ديسك واسطوانه و بيليه ) و علي فكره انا غيرت الطاقم بالكامل بسبب تلف البليه فقط و هما بتوع لانسر بومه 2007 .
9- فلاتر الهواء و التكييف ( تويوتا كرولا ) و فلتر البنزين ( من التوكيل ) .
10- الدينمو و هو خاص بلانسر 2007 وتغييره له علاقه بالعطل الغريب الغير متوقع اللي حصل معايا .

* بالنسبه لمشكلة الفرامل الأماميه و تنظيفها فانا قمت بنفسي من شهر فقط بحل الطنابير الأماميه ووديتها المخرطه مسحتها لأن كان فيها ريجه وركبت تيل جديد وانتهت مشكلة الصوت و الرعشه عند الفرمله و الحمد لله .
* بالنسبه للعطل الغير متوقع اللي حصل معايا كان من حوالي 9 شهور تقريبا حيث قمت بشراء طاقم بوجيهات كنت شايفه علي النت و كان عاجبني جدا ، المهم جبته و غيرته عندي في الجراش بالليل وكان له تأثير السحر علي العربيه لأنه كان مخلي صوت الموتور ناعم جدا ، نزلت تاني يوم الصبح رحت الشغل و كل حاجه زي الفل وانا راجع من الشغل حوالي الساعه الثالثه اكتمل التاثير السحري للبوجيهات علي العربيه حيث حدث ما لا يحمد عقباه : وانا ماشى بالعربيه لقيت العربيه اتلجمت في مكانها و مش راضيه تستجيب لدواسة البنزين خالص و فجأه لمبة الفرامل نورت و وراها لمبة abs نورت هيا كمان ووراهم لمبة check engine بنفس الترتيب السابق ، المهم بعد محاولات و تجارب كثيره اتضح ايضا ان الدينمو اتحرق وقمت بتغييره بدينمو لانسر 2007 و الغريب بعد ده كله ان جميع اللمبات اللي نورت في التابلوه ما رضيتش تطفي الا لما شلت البوجيهات الجديده و ركبت الطقم القديم تاني و الي الأن بصراحه انا مش لاقي اي تفسير منطقي للمشكله اللي حصلت معايا دي .

اجمالا و في نهاية حديثي انا راضي عن العربيه جدا و مش ندمان علي شرائي لها و علي فكره انا 80% من الأصلاحات و التركيبات اللي في العربيه باعملها بنفسي في البيت حتي قواعد الموتور انا اللي غيرتهم بنفسي رغم ان الموضوع بعيد عن مجال دراستي و شغلي خالص بس هيا مش كيميا .

في الختام استودعكم الله الذي لا تضيع ودائعه و اي حد محتاج اي خدمه مني انا علي استعداد لأرسال رقم تليفوني و تحت امركم جميعا و اسف جدا للاطاله علي حضراتكم .

أخوكم : عبدالرءوف رخا