السلام عليكم ورحمة الله وبركاته

من ساعت ماجبت العربية وانا بحط زيت موبيل 1 العشر الاف

وبنزله عند 9 الاف تقريبا (وبيقعد معايا كتير لاني مش بمشي كتير بالعربية لدرجة انها موديل 2007 وعاملة دلوقتي 35 الف )

الايام دي المفروض اني هغير الزيت لانه كدة عدى العشر الاف كيلو ودي اول مرة يفضل معايا مدة طويلة (اتجاوز ال 10 الف كيلو من غير مانزله) خاصا اني مغيره تقريبا بقالي سنة

قلت ادور هنا وهنا وهنا واشوف ايه احسن الزيوت

الاول كان الواحد بيسمع كلام التوكيل وبيحط وخلاص بدون علم انما دلوقتي الحمد لله عندنا نايل موتورز واعضاءه والحمدلله استفدت من المنتدى بشكل كبير جدا والواحد بقى بيقدر يسأل ويستفسر عن اي حاجة عشان يعرف الصح فين

لقيت ناس كتير جدا بتقول ان زيت موبايل 1 وحش ومحتاج تزوده عند ال 5 الاف واللزوجة مش قد كدة

ولقيت عيوب كتير لدرجة اني مالقتش موضوع واحد بس بيمدح فيه ! وهنا استوقفتني حاجة مش لاقيلها تفسير بصراحة

لما هو زيت دون المستوى بالطريقة دي ليه مستوصى بيه في التوكيل ؟ ولو رحت غيرت الزيت هناك بيحطو موبيل 1 ؟

معقول ممكن التوكيل يحطلك زيت دون المستوى لمجرد اتفاقية بينه وبين شركة موبيل ؟ ؟

انا طبعا ماحبتش اكون من الناس اللى بتسمع وخلاص وطالما سمعت ان الزيت وحش يبقى هو وحش وحبيت اتاكد بنفسي :

1- لقيت مواضيع كتير بتقول ان الزيت بينقص ومحتاج انك تزود كل 5 الاف

قلت بما اني عامل بالعربية اكتر من 10 الاف كيلو والزيت بقاله معايا سنة مع العلم ان اسلوبي كله قرص وحرق فقلت اقيس مستوى الزيت واشوف هل فعلا نقص ولا لاء

لقيت الزيت مستواه تمام وزي الفل ولا نقص ولا اي حاجة نهائيا ! يمكن اللى لاحظته انه فقد اللزوجة بتاعته بس نقدر نقول انه فقدها لانه خلاص انتهى عمره الافتراضي !

---

2- لقيت مواضيع كتير بتقول ان الزيت اداءه مش حلو وصوت الماتور بيعلى والسحب مش قد كدة

ودي برضوا حاجة ماحصلتش معايا يمكن مابدأتش احس بان العربية مكتومة وسحبها ضعيف وصوت الماتور عالي الا بعد مالعربية عدت ال 10 الاف كيلو بالزيت

--

3- لقيت مواضيع بتقول انه الزيت اداءه برضوا مش كويس والعربية بتسخن

يمكن دي بصراحة الحاجة اللى كنت بحسها وبقالي مدة كبيرة بحسها بس مش عارف سببها مقدرش احكم انه من الزيت او من حاجة تانية بس بعد ماغير الزيت لو لقيت السخونة راحت يبقى كان بسببه
خاصا انه مجرد احساس بالسخونة بدون مايطلع مؤشر الحرارة في التبلوه !

----------------

اكيد انا مش كاتب الموضوع ده عشان ادافع عن زيت موبيل 1 او اقول انه كويس كل الموضوع اني محتار وعايز اعرف هل فعلا الزيت ده فيه عيوب زي مالناس مابتقول ولاء لاء ؟ خاصا اني ماحستش باغلب العيوب اللى الناس ذكرتها الا بعد مالزيت تجاوز مدته وعمره بدون مشاكل !

ويمكن انا ماحستش بعيوب لاني مجربتش زيت غيره ودي حاجة حاططها في اعتباري

لكن اللى عايز اوصله

هل الزيت فعلا دون المستوى ؟ ولا اغير واحط برضوا موبيل 1 زي مانا معود العربية والفروقات بين الزيوت بسيطة ؟

ولو فيه فروقات في الزيوت الفروقات بتبقى في ايه غير عدد الكيلومترات ودرجة الحرارة القصوى والصغرى ؟