السلام عليكم يا شباب
مشكلتى مع الفتيس موش لاقى لها حل الريفيرس ساعات ييجى و ساعات مايجيش اظبطة عند الميكانيكى . بيظبط و بعد يومين يرجع تانى يعلق انا غلبت لو حد مر بالمشكلة دى قبل كدا
ممكن يقولى حلها ازاى
و شكرا للافادة .
عرض للطباعة
السلام عليكم يا شباب
مشكلتى مع الفتيس موش لاقى لها حل الريفيرس ساعات ييجى و ساعات مايجيش اظبطة عند الميكانيكى . بيظبط و بعد يومين يرجع تانى يعلق انا غلبت لو حد مر بالمشكلة دى قبل كدا
ممكن يقولى حلها ازاى
و شكرا للافادة .
لو كده غير العصاية كامله تقريبا ب 100 جنية او 150 عصاية كاملة بالحشو بتاعها وريح دماغك ومصنعية 50
انا كمان عندي نفس المشكلة
وغلبت فيها
اعتقد فعلا ممكن تكون العصاية فيها انعواج او محدش عارف يظبطها
والله المستعان
،
،
اعتقد ان الموضوع بسيط لو الحكاية تزبيظ بس محتاج مياكنيكي كويس يراجع على كل الغيارات ويظبط أماكنها تمام وجرب الاول ؟
بس يكون بتاع ايبيزا او جولف علشان يبقى عارف ظبطها لانى روحت لواحد من زمان بتاع كله ما كنش ظابطلى الخامس وكان بيجيب التالت ويقولى ده الخماس انت متخيل ..........
امبارح انا رايح الشغل من الهرم لمدينة نصر بالفتيس بينقل من الأول للرابع ومفيش خامس
ووانا راجع راجع بيها الفتيس بينقل من الثالث للخامس ومفيش اولاني وتاني
كانت تجربة صعبة بس الذيذ اني كنت ماشي بيها زي الأوتوماتيك لأن معظم الطريق لا يتحمل اكثر من الثالث
انا اتعرفت علي ميكانيكي جديد بتاع فولكس بس هروحله النهاردة انشاء الله ولما يعملها هقولكم التجربة
هو مبدئيا قالي هغيرلك الفبرة والتيش وهشوف لو العصاية نفسها فيها اعوجاج
الملاحظة بتاعتي ان بسمع صوت رنة العصاية طول مانا ماشي ولو هزيت العصاية
ادعولي بالتوفيق
والله المستعان
،
،
ربنا يوفقك بس متنساش تقولنا عملت ايه عند الميكانيكى ولو هو فى الهرم وكويس عرفنا عليه وتكسب فينا ثواب
تجربتي المريرة
اولا اخويا هو الي قام بالتجربة كتر الف خيره ودة بسبب انشغالي في العمل وطول فترة العمل عندي (من 9 ص الي 10 م)
المهم
اخويا راح للميكانيكي وقعد يحاول مرة و2 و3 و4
وفي النهاية قاله " دة مش تخصصي هبعتك لواحد بتاع فتيس فقط " بردو بتاع فولكس فقط
بتاع الفتيس دة عبارة عن ورشة كبيرة فيها تقريبا جميع التخصصات ماعدا السمكرة والدهان وكلها طبعا فولكس بس
الورشة دي في امبابة عند الموقف (هعرف العنوان بالتفصيل انشاء الله واقولكم)
الرااجل في خلال دقيقة حدد العيب وفك القمع بتاع العصاية وقال لأخويا انها عيب فيبرة (بيسموها حشو الفتيس)
المهم
غير الفيبرة
والحساب
الفيبرة والمصنعية 150 ج
غالي شوية بس مش مشكلة
المهم
اخويا خد العربية وطلع بيها وكلمني وطمني ان الحال تمام والحمدلله
وانا معاه علي التليفون قالي العربية بطلت لوحدها
بيدور مش بدور قالي اقفل وهكلمك
بصراحة انا قلقت وجيه في دماغي اكتر من حاجة زي فيوز الكنترول او قطعت بنزين او طرمبة بنزين او ان الكنترول باظ
ماكدبتش خبر
طلعت من اكتوبر لأمبابة
وصلت عنده الساعة 11 ونص
قالي انه دورها وهيقابلني
طلع العيب من فيشة الموتور بتاعة الدفيرة ودي بتبقي في مقدمة الموتور يمين الفرن
بس المشكلة العربية متلتة (دايرة 3 بوجيه)
روحنا من امبابة لحد الهرم وانا الي سايق
روحت بعدها بكام يوم عند عصام (ميكانيكي الفولكس الأولاني) وطبعا العربية مركونة كل دة
يمين شمال
غير بوجيهات
غير اسلاك البوجيهات
وفي النهاية قالي تجيلي بكرة الصبح احسن عشان انا شاكك يا أما رشاش يا أما صبابات
روحتله فعلا السبت الصبح
كشف عليها وقالي
صبابات بعد ما غير الرشاشات
طلع ان في صباب من الصبابين بتوع السلندر الأولاني مش شغال كويس
في النهاية
العربية بتاكل بنزين بشكل خيالي لدرجة ان الشكمان بيتفتف بنزين وحرقت 10 لتر في حدود 6 او 7 كم
الشكمان دخنته بيضا بس مش اوي وطبعا دخنة مقطعة وصوت الموتور زي صوت البيتلز بالظبط
والمشكلة الجديدة ان الفيشة بتاعة الموتور بقت بتتهز لوحدها وتخلي العربية تبطل ومش بترضي تدور
دي تجربتي المريرة والأخيرة وليست الأولي مع سيارتي العزيزة سيات ابيزا
والله المستعان
،
،
بالنسبة لتجربتي انا حكيتها في المشاركة السابقة
بالنسبة للعنوان فهو في الهرم في شارع الاشول - مشعل
اسمه عصام
تخصص فولكس جميع الموديلات
سيات ابيزا
شاطر اوي ماشاء الله
بس باله طويل حبتين
مصنعيته مش غالية
مواعيد العمل من 4 عصرا لحد 10 مساء
والله المستعان
،
،
والله يا باشا مش عارف اقولك اية بس انا عارف انها لما بتفتح بتفتح بس فعلا اية علاقة الى انت عملته بالموتور :
بص من الاول كده علاج مشكلة العصاية الجزرى هو تغيير العصاية بالكامل بتتعمل زي ما الاخ تفضل وقالك 150 جنية استيراد بالحشو بتعها وبعد كده تجرب الفتيس لو تمام وما فيش فيه اى مشكلة يبقى خلاص وطبعاً تشيك على زيت الفتيس بالمرة لو طلع فى مشكلة بعد كده ظهرت فى الغيارات يبقى تحل الفتيس كله وتكشف على طقم الدبرياج قدام عينك وتكشف على الفتيس علشان لو الحلة بتاعته فيها اى كسر او تاكل هيتغير وده بيبان لو عندك ونه فى غيار معين من الغيارات هى كل كل الى ممكن يقابلك فى الفتيس واكبر حاجة فيه تغييره انا جايبة استيراد 450 جنية او 500 تقريبا .
اما بقى موضوع الموتور ده الى غريب هل يا ترى الميكانيكي لعب فى حاجة فى الحوض مثلا من بابا انه بيكشف على العربية ولا حاجة مش عارف حاجة غريبة فعلا يا باشا لو عايز النهاية فى الموضوع ده هبعتك عن الميكانيكي الى بتعامل معاه وهو هيكشفلك على الموتور والحوض بكل الى فيه وهيقلوك لعى الخلاصة نظرا لخبرته فى تسقيط مواتير الايبيزا والباسات بكل موديلاتها والجيتا والجولف وتعديل الجولف بكل انوعها كما وده كان بيبقى قدام عينى انا شخصياُ وكمان بيشتغل فى الاودى بيعمل فيها كل حاجة !!!!!!!!!!!!!!!
وربنا يطمنك وابقى طمنا عليك ....