كسر الزجاج الأمامي للميجان 2

**Shiref_mohamed** · 30-11-2011 10:57 AM

السلام عليكم ورحمة الله
ازيكم يا وحوش

امبارح كنت ماشي في الأوتوستراد وكان في المقابل عربية نقل محملة زلط وبتجرى جامد وكان من نصيبي زلطين حلوين في البرابريز الأمامي اتشرخ كذا شرخ من ناحية الشمال من تحت.
.روحت للدكتور خالد بتاع إصلاح الشروخ الفني قالى ان الشروخ مسمعه من جوه ومش هينفع فيه لحام وان الأفضل تغييره مشيت من عنده وانا شايل الهم

وانا ماشي في شارع 9 في المقطم لاقيت محل زجاج سيارات سالت عليه قالى موجود وعنده نوعين . نوع بالحساسات وده بـ 370 ونوع من غير حساسات وده بـ 320 ولما سالته عن الكوالتى قالى انه هاي كوبى وانه زي الى التوكيل بيركبه فمشيت من عنده وقلت اسالكم الأول .
انا اهم حاجه بالنسبالى والى خنقاني جداً هيا نضافة التركيب يعني عاوز الى يبص على العربية ميعرفش ان البرابريز متغير نهائي (الفريم الكاوتش يكون في مكانه بالمللى) وكمان ميكونش فيه اثار سليكون باينة من التركيب

محتاج نصايحكم وخبراتكم هل اركبه بره ولا اركب في التوكيل ولو هركب بره اركب عند مين يكون نضيف ويرجع العربية لأصلها.

**Hany A Fattah** · 30-11-2011 11:03 AM

الحمد لله انها جت فى البرابريز يا شريف
وانك بخير

**iaibrahim** · 30-11-2011 06:17 PM

فيه محل فى شارع شهاب بالمهندسين عنده نوع مستورد ب550 جنيه محترم وبيركب نضيف جدا عن تجربه مع التوفيق

**Shiref_mohamed** · 30-11-2011 10:52 PM

المشاركة الأصلية كتبت بواسطة razini89

الحمد لله انها جت فى البرابريز يا شريف
وانك بخير

ربنا يخليك يا هاني باشا

**mofahmy** · 01-12-2011 02:53 AM

في عند المصطفي للرينو في صقر قريش بركبة زي الاصلي بلظبت

**etrder63** · 01-12-2011 08:40 AM

عليك وعلى د. جربش فى العاشر من رمضان فاهمين وشغلهم نظيف جدا عن تجربة فى باربريز ميجان 2005 وبيركب لك الحساسات الأصلية اللى كانت راكبة فى الزجاج الأصلى

**Shiref_mohamed** · 01-12-2011 09:35 AM

المشاركة الأصلية كتبت بواسطة iaibrahim

فيه محل فى شارع شهاب بالمهندسين عنده نوع مستورد ب550 جنيه محترم وبيركب نضيف جدا عن تجربه مع التوفيق

متشكر جداً لحضرتك وإن شاء الله هروح ابص عليه بس ممكن تقولى فين في شهاب بالظبط اصل اخوك بطيخه في المهندسين

**Shiref_mohamed** · 01-12-2011 09:43 AM

المشاركة الأصلية كتبت بواسطة etrder63

عليك وعلى د. جربش فى العاشر من رمضان فاهمين وشغلهم نظيف جدا عن تجربة فى باربريز ميجان 2005 وبيركب لك الحساسات الأصلية اللى كانت راكبة فى الزجاج الأصلى

متشكر لحضرتك جداً انا عارف مصنع دكتور جريش في العاشر بس معرفش انهم بيركبو كمان
وانا فعلاً اهم حاجه بالنسبالى النضافة يعني مش عاوز حد يعرف ان البربريز متغير اصلاً

**iaibrahim** · 01-12-2011 06:40 PM

بالنسبه لشارع شهاب فهو متفرع من جامعه الدول وعلى الناصيه اظن محل جاد تدخل الشارع وبعد ما تعدى اول تقاطع حتلاقى المحل على الشمال واسمه دقدق وممكن تسأل عليه اما المصطفى بصقر قريش عنده الاصلى فعلا بس مستعمل !!!ومعرفش ثمنه وهل حيركب بطريقه نضيفه ؟ وهذا للامانه مع التوفيق