الموضوع: حصريا: تجربتي في تركيب فوج لايت هوندا سيتي ....

السلام عليكم
انا النهارده هحكلكوا تجربتي الحصريه في تركيب فوج لايت في هوندا سيتي 2009
انتوا عارفين انها بتنزل موديلين Basic & Highline
الاولى مفهاش فوج لايت والتانيه فيها زي الصورتين اللي تحت دول



وبما اني طول عمري بقدر الفوج لايت اوي وبعتبره حاجه مهمه ومع استغرابي لان الموديل الاساسي مفهوش فوج لايت. ابتديت مشوار التدوير على احسن عرض للشراء كالاتي:


اول خطوه - الشراء:

اولا:
التوكيل طبعا - رحت علطول وبلا تردد سألت على الفوج لايت في التوكيل عشان اركبه ومع اني عارف انه غالي قلت يعني هيبقى بكام 1000 ولا 1500 مش خساره فيها ابدا. ولما رحت سألت لقيته ب 3300 وعاملين عرض ب 2800 لفتره محدوده. طبعا قلت كلام كتير (ملوش لازمه يتقال على الهواء) وحاولت بعد كده اطنش الموضوع خالص. وفضلت بتاع 6 شهور الفكره تزن في دماغي ومش عارف انساها (زي المخدرات) عايز فوج لايت عايز فوج لايت. وفضلت افكر وافكر اعمل ايه عشان اجيبهم ارخص من كده.
ومع الحاح عقلي الباطن قررت ان ادور في اتجاهات تانيه.

ثانيا:
الحرفيين اللي فيها كل حاجه - طلعت على الحرفيين ودورت في كل المحلات يمين وشمال زي مكون بدور على نمله تايهه. ملقتش الفوج لايت كله على بعضه. لقيت واحد يمين ولقيت واحد شمال مكسور. كل ده من غير التوصيلات طبعا او الفيش او الزرار. وانا طبعا مش ناوي اركب اي حاجه بشويه سلوك عشان مش ناوي العب في كهرباء العربيه وعايز اركب كله بفيش اصليه. وحتى لو فكرت اسعارهم اصلا مكنتش مشجعه تماما. ويبقى كده فكره الاستيراد المستعمل فشلت تماما.

ثالثا:
كلمت واحد قريبي في السعوديه يسألي على سعرهم في توكيل هوندا هناك. وفعلا سألي وبعتلي عرض اسعار من توكيل هوندا عبدالله هاشم. ولقيت سعر الفوجين 1800 ريال والسلوك والزرار حوالي 400 ريال يعني توتال 2200 ريال يعني حوالي 3500 جنيه. طيب عربيه في مصر تمنها 130 الف وفوانيسها ب 3000 ماشي - لكن عربيه في السعوديه تمنها 45 الف ريال فوانيسها ب 2200 ريال بتاع ايه. وطبعا فضلت اشكر في مصر واسعار مصر ام الدنيا ومهما كان التوكيل هنا غالي بس برضه ارخص من الخليج.
وده صوره عرض الاسعار


رابعا:
دورت على النت عشان اشتريهم من بره وفعلا لقيتهم في eBay ب 90 دولار يعني 550 جنيه من غير الشحن والجمارك. طبعا بالسلوك والزرار وكله.

طبعا عقلي الباطن فضل يروح وييجي ومسبنيش في حالي لغايه لما قررت اشتريهم من eBay وكلفوني بالشحن وجمارك 20% والتوصيل لغايه البيت حوالي 1000 جنيه. ولقيت ده ارخص الحلول. ووصلولي في حوالي 3 اسابيع. وبكده يبقى خلصت هم الشراء ولسه هم التركيب. وده صور العلبه اللي جاتلي.















ثاني خطوه - التركيب:

طبعا عشان انا بخاف على العربيه طلعت على طول على التوكيل برضه - تركيب الفوجات عندهم ب 220 جنيه - قلت ماشي زي الفل - سألت في التجمع لو في دهان قالولي لا في فرع جسر السويس بس - فحجزت هناك ورحت. طبعا انا بسأل على الدهان لان الفرام بتاع الفوج الاصي اللي بينزل في العربيه الكامله بيكون بلون العربيه وانا مرضتش اركبه اسود وقلت هرشه زي العربيه الكامله. واللي عرفته انهم بيركبوه في التوكيل اسود زي ماهو ولو عايز ترشه ده بره ال 220 بتوع التركيب.

لما رحت توكيل جسر السويس قلتلهم اني شاريه من بره وعايز اركبه - مسكوا الفوج لايت وفضلوا يقلبوا فيه يمين و شمال والكهربائي جه وبتاع السمكره وكل الناس اتلموا كانهم هيعملو عمليه جراحيه - واضح انه مبيتبعش عندهم اصلا - اكيد محدش هيشتريه بالسعر ده - المهم الكهربائي مسك السلوك وقارنها بالموديل اللي عنده وطلعلي اختلاف - الفوج بتاعي زي اللي عنده بالضبط والزرار هو هو والسلوك هي هي وكل الفيش هي هي ماعدا فيشه واحده عندي 4 فتحات وعنده 5 فتحات. وقالي مش هتنفع تركب. ياعم يهديك يرضيك مفيش فايده - طيب ايه الحل قالي ركبه بره التوكيل. والراجل مشكورا نصحني اني اركبه في اراب كوم.

طبعا كان لازم الاول ارش الفرام بتاع الفوجات وطلبت منهم في التوكيل يرشولي الفرام بلون العربيه. انا كنت مصمم انه يترش في التوكيل عشان اللون يبقى مظبوط. المهم اترش ونشف في ساعتين ودفعت 110 جنيه.

طلعت على اراب كوم اللي في مدينه نصر. قلتله تعرف تركب ده. بص شويه بنظره احترافيه اوي وقالي اوك وهاخد 200 جنيه. وفي ثانيه لقيت الاكصدام اتفك واتفتحت الفتحه بتاعته. والفوج ركب والزرار والموضوع مخدش معاهم نص ساعه. طيب بالنسبه للفيشه اياها اللي مختلفه عن التوكيل. طلعت الفيشه ده بتاعه الزرار - واصلا الزرار جاي معاها وركبت علطول. ومقطعتش في اي حاجه والحمدالله. صراحه انا كنت اول مره اروح اراب كوم بس احترمتهم اوي.
وده صور عمليه التركيب

ده صوره الاكصدام وهو مفكوك


ده صوره مكان الفوج لايت




وده مكان الفوج بعد ما اتفتحت


وده الفوجات من جوه الاكصدام


وده صوره العربيه النهائيه


وده صوره الزار بتاع الفوج لايت





ثالث خطوه - النتيجه:

الفوجات كويسه جدا ونورها افضل مما توقعت والزرار بيشتغل بس مع نور التابلوه. وشكل العربيه من الامام بقه شبه الفئه الكامله بالضبط.
المهم في الموضوع اني لفيت لفه طويله اوي بس صراحه استفدت منها والحمدالله

الجميل في الموضوع بقه اني لما كنت في توكيل جسر السويس لقيتهم رخصوا سعر الفوج لايت اليومين دول بس ل 2000 بدلا من 2800 والتركيب 220 برضه من غير رش !!!
انا الموضوع كده وقف عليه ب 1000 جنيه وكمان 200 تركيب و110 رش بالظبط.

وكل تجربه وانتم طيبين.
مهندس ماجد

الف مبروك يابشمهندس.

ممكن تقرير بالتفصيل الممل عن الشراء من eBay من اول الطلب لحد التسليم في البيت.

معلش هو طلب رخم بس انا في حاجات كتير عايز اجبها و مش عارف الطريقه.