الموضوع: زجاج الباب الامامى واثار الثورة

طبعا كلنا اتأثرنا بالثورة ... لاكن الاثر بتاعى كان مباشر ... لاكن الحمد لله كان فى زجاج باب العربية الامامى ...كان فية ضرب طوب فى الدقى مكان شغلى .. وكانت العربية مركونة زى كل يوم ... فى وسط صفين عربيات وفى شارع جانبى ... لاكن الحمد لله الخسائر عندى كانت بسيطة بالمقارنة بسيارات تانية كانت واقفة جانبى .. زجاج الباب فقط ...
طبعا ما ينفعش اروح بالعربية والباب من غير زجاج ... فعديت على بتاع زجاج سيارات ... وسألتة عن الزجاج ... قالى موجود بتاع التويوتا وده نفس المقاس ... قولت كويس ما فيش مشكلة ...اتفقنا على السعر ب 110 جم ... وركب والزجاج وكل حاجة تمام ...
كنت ملاحظ ان الزجاج تقيل شويتين فى الفتح والقفل عن الاصلى ... ويوم الخميس الماضى بعد الشغل بركب العربية وبنزل الزجاج لاقيتة مال وسقط ... فرفعتة تانى وظبطة بايدى وروحت تانى لبتاع الزجاج .. لاقيت واحد تانى عندة ال byd وبيشتكى من نفس المشكلة .. الزجاج سقط منة كذا مرة ... فاصريت انة يركبلى الزجاج الاصلى بتاعها ... او يرجعلى فلوسى ... لان زجاج التويوتا اتخن من الاصلى ... وطبعا ده ممكن يهلك ماكينة الزجاج بسرعة .. لانة بيطلع وينزل بصعوبة ...وكمان مش عايز يثبت فى مكانة مش بيمسك فى السيليكون ... لنفس السبب
المهم ركبلى الزجاج وكلة تمام واخد كمان 20 جم فرق سعر .. بعد الفصال طبعا ...
المهم ...وانا فى صيانة ال 5000 ك سألت عن الزجاج قالولى ب 65 جم و40 جم مصنعية وماتنسوش ضريبة المبيعات ...
يعنى الموضوع كلة ها يكلف 115 جم ...
انا قولت احكى التجربة دى يمكن حد يستفيد منها وما يغلطش غلطتى ...
قطع الغيار فى التوكيل ارخص من برة فعلا ... واريح للدماغ
اسف طولت عليكم ... بس انتم حبايبى ... مش ها تزهقو منى
بس خلاص