الموضوع: كهربا العربية

السلام عليكم ورحمه الله وبركاته

احلى سلام لكل الابلاوية

عندى مشكله فى الكهربا

من 4 شهور ركنت العربية فتره كبيرة حوالى 20 يوم فطبعا نزلت لقيت البطارية نايمه لقطت من بطارية تانية ومشيت واتكرر الموضوع كتير بقى لو ركنتها 4 ايام وبعدين كل 3 ايام ووصلت انى لو ركنتها 24 ساعه مادورش.
فطبعا الكلام ان البطارية عايزه تتغير بالمناسبة هى هانكوك جافة

رحت اسال على بطارية لما عرف انها اوبل قال انت عايز بطارية قوية واسعارها حوالى 900 جنية المهم كان معايا واحد معرفته فجاب جهاز كبير كده ووصل على البطارية وقاس
قالى مستحيل البطارية دى يكون فيها حاجه البطارية زى الفل انت مش محتاج بطارية ممكن يبقى شحن الدينمو ضعيف
رحت لكهربائى جاب جهاز صغير كده وقاس قالى البطارية بايظه --- مش مرتاح للكهربائى ده وبعد كده طلع فعلا كفته
رحت لكهربائى تانى قالى احتمال كبلات الارضى ومحتاجه تقوية ---- كنا فى رمضان والساعه 3 بالليل وبيقلى سيب العربية تبرد وروح هات اسلاك المهم كبرت دماغى وروحت وقلتله حاجيلك بكره

نزلت تانى يوم بدور دارت ابطل وادور تدور ركنتها يومين وانزل ادور تدور اربع ايام ادور تدور قلت يمكن كان فى حاجه مهزوزه وهما بيجربو ظبطت وكبرت دماغى ال3 شهور دول
وبدات الحركة تانى هى هى كل اربع ايام كل 3 كل 2 كل يوم عايز حد القط منه

المهم رحت لكهربائى جديد قلتله على اللى حصل قالى لما تروح افصل كابل البطارية وتانى يوم ركبه ودور لو دارت يبقى العيب مش بطارية (علشان مانشتريش بطارية جديده ويرجع يظهر العيب تانى )

جربت 24 ساعه ووصلت البطارية ودورت العربية دارت وانا حاسسها كمان قويه من اول لفه للمفتاح

جربت 3 ايام ووصلت البطارية ودورت العربية دارت وبرضة بقوه

ركنتها 3 ساعات والبطارية واصلة بدور عتلت معايا كده على مادارت

فصلت البطارية وركنتها 24 ساعه دارت بقوه

فمعنى كده على حسب كلام الكهربائى ان البطارية سليمه بس عندى حاجه بتهرب

فطلعت عليه قلتله على اللى حصل المهم اعد يجرب ويفصل فى سلوك الدى فى دى (مش بشغله خاالص) وسلوك الانذار ويجرب مش لاقى حاجه المهم بص على اسلاك الانذار جوه قالى اللى مركبلك الانذار عاكك اووى (لو طنانى باشا يفتكر الموضوع ده فعلا الكهربائى الاولانى كان فى الضياع)

فالمهم قالى انا حافصلك الانذار وماتفصلش البطارية بقى ونشوف لو دارت نشوف حاجه تانيه لو مادارتش يبقى العيب فى الانذار فاطلعه واظبطلك الدنيا يمكن يكون فى شورت او تلميس والافضل لو مادرتش ماتلقطش من حد تعالى خدنى اشوفها وهى فاصله كده.

من الكلام كده شكله فاهم بس المشكله انه لما لعب الازاز الشمال مع المرايات الكهرباء فصلوا وحسيتوا ضارب لخمه شوية فاشورو عليا

الراجل ده بيفهم امشى وراه طيب الكلام صح لو مش صح اعمل ايه
الاخوه الابولاوية اللى فى طنطا لو تعرفوا كهربائى جامد من الاخر حايجبلى العيب الله يكرمكم دلونى عليه
وشكرا واسف على الاطالة