الموضوع: مشكلة بعربيتى التويوتا العيون

السلام عليكم
انا عندى مشكلة غريبة فى عربيتى العيون ( هى يمكن غريبة على لانها اول سيارة اركبها فى حياتى )
انا العربية معايا من سنة تقريبا ( وهى بالمناسبة اوتوماتيك 1300 سى سى ) وكنت باجرى بيها فى الاول على سرعات عالية ومرة جبت بيها 170 او 175 وكانت ناعمة زى الريشة بس ده كان فى الاول بس ( طيش الشباب بقى )
بعد كده هديت وسواقتى بقت عادية خالصة ما باعديش ال120
بس فى يوم فتحت على طريق اسكندرية الزراعى بالليل فوجئت ان العربية مش بتعدى ال140 مهما ادوس بنزين وكانى بادوس فى حيطة سد
الاول افتكرت العيب فى الكربراتير لانه كان عايز يتسلك ويتنضف هو والبيكات بتاعة البنزين بس بعد ما نضفته مفيش تغيير..... برده مهما ادوس ما بتعديش ال140 ..... بس من ناحية التسارع واستهلاك البنزين فى المشى العادى بسم الله ما شاء الله زى ماجبتها من سنة
ابن عمى قاللى ان الاسبراتير عايز ينظبط وساعتها حترجع تانى تجيب سرعات عالية ....... مش عارف كلامه صح ولا غلط افيدونى فى الموضوع ده
طبعا اكتر واحد مبسوط من الموضوع ده ومش عايزنى اصلحه هو والدى علشان يضمن انى ما باجريش

المشاركة الأصلية كتبت بواسطة smsm_hamada

اعمل يا باشا طقم صيانه يعنى بوجيهات وابلاتين وكوندينسر ولو الاسبراتير الكترونى يبقى محتاجه ظبت بس انما موضوع الكاربراتيير دة اكيد هتحس بيه لو فيه مشكله فى استهلاك البنزين او فى العادم و احيانا السلانسيه .

الف شكر يا باشا على سرعة الرد
وعلى فكره انا غيرت طقم بوجيهات وجبت معاه طقم سلك بوجيهات يابانى اصلى والكربراتير اتظبط هو والبيكات واستهلاك البنزين زى الفل ومفيش اى مشاكل فى العادم هى بس مشكلة السرعة اللى مابتعديش ال140 بس بينى وبينك انا مش فاهم ايه حكاية الابلاتين والكوندينسر ( معلش اعذرنى اصلى لسه جديد ) وبرده مش عارف ايه حكاية الاسبراتير الالكترونى ( مش ده اللى بيتظبط على 8 درجات للتسريع او التباطؤ على حسب معلوماتى البسيطة )