الموضوع: كلمات دارجة على لسانك ونفسك تتخلص منها

يمكن الموضوع ده ميهمش الرجالة اوي زي ما يهم البنات والسيدات بس مايمنعش تشاركوا ببعض الكلمات اللي نفسكم تنسوها او تغيروها او تشاركوا ببعض المواقف المحرجة بسبب كلمات معينة

احيانا الواحد بيكون عنده كلمات دارجة او عفوية بتثير انتباه الناس حواليك يا اما لانها بيئة او لانها غريبة او لانك بتنطقها بطريقة مختلفة بسبب اختلاف اصولنا قاهريين او من بحري او من الصعيد
احيانا تسبب لك احراج من نظرات الاخرين لك وتحاول تغيرها وتنجح واحيانا اخرى الطبع يغلب التطبع
انا عن نفسي ضايعة بس مش لاستخدامي كلمات بيئة اد مهو اختلاف نطقي للحروف حتى اخواتي بيتريقوا عليا بسبب بعض الحروف
اما الكلمات البيئة اللي مش هتتغير عندي وفقدت الامل في تغييرها هي كلمة بت وواد المفروض ابقى رقيقة واقول بنت وولد
عندي مصطلحات كتير واخداها من البلد وعلى لساني وبتلفت نظر الناس الغريبة المقربين اللي مممكن يعلقوا يهزار عليها
زي كلمة (تزمل) يعني تلمس جرح وتسبب الم معرفلهاش مصطلح تاني
( نتش) يعني ياكل حاجة من غير عيش
(اركح) يعني يعني بطل حركة وشقاوة
............. لما افتكر تاني هاكتب
دايما حد يتريق عليا عشان بستخدم كلمة اه بدل ايوة
ده غير بقى عدم احتكاكي كتير بالعالم الخارجي بيخليني متأخرة في معرفة المصطلحات الجديدة خصوصا اللي بيطلعوها على ملابس السيدات والالوان .... ناس رايقة وفاضية صحيح
المستفز بجد لما تكون متعود على كلمات شيك ويجي حد غريب الاطوار متفزلك يتريق عليك
مثلا بقول لابني امسح النوز معجبتش واحدة .. بقولها لازم اقوله امسح الكخ من مناخيرك عشان يعجبك يعني
او كلمة شليمو تقولي ومالها الشفاطة طيب يا ستي انا بحب الكلمة دي انتي زعلانة ليه
بس بردو كلها حاجات سهلة ممكن التعايش معاها لكن في بعض المصطلحات بيستخدمها اهالينا في البلد متنفعش خالص تتقال قدام حد ولا قدام طقل ولا هنا احسن اتوقف دي الي مسببالي ازعاج بجد
ها مين عنده كلمات عايز يغيرها او مواقف محرجة بسبب كلامه