السلام عليكم

ازيكم يا جماعة و يارب الكل يكون بخير

بعد ما اخويا اتجوز من شهر و نص كدا اخيرا و الحمد لله و طبعا انا خدت الاوضة بوضع اليد و طبعا كان لازم يبقى ليا لمستي في الاوضة دا غير ان انا سيبت الشغل و عندي وقت فراغ و طاقة ولازم استغلهم

الاول كنا ناويين نبيض الشقة كلها و بعدين اجلنا الموضوع للصيف افضل و بالتالي قلت انا لازم اعمل حاجة في الاوضة بقى و ماتفضلش كدا و كنت شفت الفكرة دي معمولة في شقة اخويا و عجبتني فا قررت اني انفذها بنفسي و اعمل رسمة مطبوعة على الحيطة بلون دهبي فاتح عشان يبقى لايق مع لون الاثاث اللي في الاوضة و اللي لونه بيج دهبي كدا برضو

الاول غيرت نظام الاوضة و غسلت الحيطة اللي هالونها كلها و استعديت بالادوات اللي كانت كالاتي

علبة لون دهبي فاتح بتتباع جاهزة عند اي بتاع بويات و كانت ب 30 جنيه تقريبا للاسف مش فاكرة بالظبط





و الرسمة اللي هانطبع بيها و في منها اشكال كتير و رسومات اطفال و مقاسات متنوعة كمان و دي كان ب 7 جنيه و في ب 5 و في ب 20 حسب المقاس و النوع





و فرشة دهان عادية جدا

و دي كانت النتيجة




طبعا الطباعة مش طالعة ممتازة جدا عشان الواحد كان اول مرة يجرب بس الى حد ما حلوة و جددت في شكل الاوضة و حتى لو مش مظبوطة اوي بس الواحد لما بيعمل حاجة بنفسو بيتبسط بيها و بيبقى ليها طعم تاني و مميز

المرحلة التانية بقى هاحترف و هاعمل لاختي حيطة من اوضة الليفينج عندها بس مع اختلاف الرسومات و الالوان و هابقى اوريكم الشغل برضو يمكن الواحد يبقى له صنعة يستفيد منها بدل قعدة البيت

ها ايه رائيكم