المراجعة النهائية قبل شرائي الهاي لاين!

**mazda3mazda** · 10-12-2011 11:15 PM

يا شباب، أنا نويت خلاص اشتري الهاي لاين ان شاء الله و يشرفني إني انضم ليكم... لكن في الأول عايز حد بس يؤكدلي حبة حاجات كدة لو كان اشتري قريب أو عارف السوق نظامه ايه:
1-شكلي هضطر اشتري من أباظة أوتو تريد أو سونستا عشان تقريبا هما بس اللي عندهم اللون اللي أنا عايزه... فهل حد عنده أي مواقف بايخة مع أي حد منهم و ينصحني اتجه للتاني؟ (ماسترز كمان عنده بس مقدمش أي مزايا فشكلي مش هجيب من عنده... و سمير ريان كلمته قال لي هيشوف اللون و يكلمني... لكن ماتكلمش... فهحلقله مع إنه ممكن يكون أرخص 1000 جنيه)
2-السعر عندهم زيه زي التوكيل، و ديه حاجة أنا مستغربها... مع العلم إني هدفع كاش... فهل المفروض إني أفصال معهم عشان ينزلوا عن ال155؟
3-هل حد جرب الشركة المصرية للتأمين التكافلي ديه... تأمينها حوالي 2.75% بدون تحمل... أنا حاسس إن الموضوع فيه مقلب مش عارف ليه!... يا ريت لو حد عنده معلومة يفيدني.
4-أباظة أوتو تريد بيدي هدية دواسات و غطاء للسيارة... بس طبعا الدواسات مش الاصلي... سونستا عنده الاصلي ب250 و أنا بحاول اخدها منه مع العربية، بلطجة كدة... هو الحقيقة لما سألت سونستا في الأول قال لي معها دواسات، و بعدين عايز يرجع في كلامه شكله كدة، بس أنا هبلطج و مش هشيل من غير دواسات... أصل ايه يخليني اخد العربية من عنده و هو بيبيعها بسعر الوكيل إلا لو اخدت ميزة قصادها، ولا ايه؟!
5-اكتشفت ان سونستا بيجيب العربية من أبو رواش سواقة مش بالونش... هل الموضوع ده فيه مشكلة؟ أباظة قال لي إنه هيجيب العربية بالونش... فبالنسبة للموضوع ده تفتكروا أكبر ولا أخليني في أباظة؟

**himaz** · 11-12-2011 01:20 AM

اولا الف الف مبروك مقدما لنضمامك للقسم هتنورنا
رجالة المازدا زادوا واحد

بالنسبة للاسئلة :
1- اباظة اوتو تريد كويسين وابعد عن سونستا عشان سمعت عن مشاكلهم

2- موضوع السعر ده مقدرشى افتى فيه بس انا شايف عادى مش قضية خصوصا ان العربية بضمان الوكيل

3- مجربتش اى تامين الصراحة قبل كدة بس واضح من النسبة انهم عاديين جدا او اقصد انهم ممكن يغلبوك كمان

4- دواسات ايه يا باشا
وهل متاكد فعلا ان اللى عند سونستا اصلى انا شخصيا اشك !!!
المهم ابقى جيبهم من برة انت راكب عربية ب 155 الف مش مهم ال250 جنيه ولا حتى 1000 فى سبيل العربية مضمونة من ناس بتحافظ عليها

5- وش طبعا خليك فى اباظة
يعنى تخيل انت سواق بيسوق وينققل كام عربية اكيد حيحرق و يجرب و يفرمل ويعمل كل اللى نفسه فى العربية
طبعا ده استهبال عشان يوفروا تمن النقلة
يعنى بالعربى كدة سونستا وفرلك فى تمن النقلة وادالك بيها دواسات الله اعلم تمنها كام اصلا

اتمنى اكون افادتك

وعلى فكرة اشترى اللون اللى انت نفسك فيه . العربية منتشرة وانت بتشترى جديد يعنى

وربنا يباركلك فيها ويكفيك شرها

وعايزيين نبقى نتعرف بيك فى مقابلات مازدا ان شاء الله

**mazda3mazda** · 11-12-2011 11:54 AM

متشكرين يا باشا علي النصايح...
أنا راشق علي المنتدي هنا بقالي 6 أشهر... بس أنت أكيد عارف إن مراجعة "ليلة الامتحان" عليها عامل كبير! ;)

أنا يشرفني إني أتعرف بيكم في المقابلات القادمة و خصوصا إني استفدت كتير من شباب المنتدي هنا... و هبقى احكلكم عن تجربة الشراء هنا بالتفصيل إن شاء الله عشان ممكن حد يستفيد بيها بعد كدة.

**mohamed456** · 14-12-2011 12:54 PM

انا يا باشا عندى الهاى 2010
انا اضريت اشترى من الوكيل عشان اللون
بصراحه انا ماجربتش عزيز اباظه
ابعد عن سونيستا

**mazda3mazda** · 14-12-2011 09:30 PM

المشاركة الأصلية كتبت بواسطة mohamed456

انا يا باشا عندى الهاى 2010
انا اضريت اشترى من الوكيل عشان اللون
بصراحه انا ماجربتش عزيز اباظه
ابعد عن سونيستا

أنا الحمد لله خلاص جبتها النهاردة... عملت بنصايحكم و بعدت عن سونستا و في الاخر رسيت علي ماسترز... و كمان عمل تخفيض 1500 جنيه، يعني نهائي 153,500... أرخص حتي من سمير ريان.

أنا أصلا كنت عايز اشتري من الوكيل عشان مضمون بس مكانش عنده غير ابيض و أحمر بس مع إن المعارض كلها عندها ألوان.

بس مش مهم التخفيض... بصراحة أنا عجبني تعاملهم، من الأخر ريحوني... قولتله العربية بتيجي إزاي قاللي بتريلا لحد ميدان الساعة و بعد كدة بيسوقوها حته صغيرة لحد شارع الطيران و وراني عداد العربيات كلها اللي في المعرض، أكتر حاجة كانت عاملة حوالي 30 كيلو. و أنا استنتجت انهم غالبا بيجيبوها بالتريلا و بيركنوها في الباركنج اللي في آخر شارع النزهة... حته أمان يعني و مش ملطش... مش زي المعارض اللي بتبقي رمية العربيات في الشارع و علي الرصيف.

قلتله طب أنا عايز اشوفها بشحمها قبل ما ادفع أي مليم، قال لي مفيش مشاكل، و جابها لحد المعرض عشان ابص عليها الأول و هي بورقتها!!! :)

بعد الفحص الشامل و إحنا بنجرب التكيف كدة شكيت في حركة غريبة كانت جديدة علي عشان ما اتعاملتش قبل كدة مع تكيفات أوتوماتيك... المهم قال لي هو ما بيفهمش في الميكانيكا و معرفش يفيدني... بس أنا قولتله منشوف عربية تانية بتعمل كدة ولا لأ، و فعلا دورنا عربية تانية و أتأكدنا انها شغالة بنفس الطريقة... اللي عايز أقوله إن هو لو كان اتفذلك و فتي أو أتننك علي ماكنتش هشتري من عنده... لأن الواحد مش بيشتري عربية كل يوم و من حقه يبقي مطمن و مرتاح نفسيا و هو بيشتري.

و بالمقارنة، سونستا و أباظة قالوا لي ان اللون اللي أنا عايزه مش موجود في المعرض لكن هيقدروا يجيبوه بس بعد ما ادفع حجز الأول قبل ما ابص علي العربية... و طبعا أنا ما عجبنيش الكلام ده.

**hamata** · 14-12-2011 11:17 PM

الف مبروك يا باشا, ربنا يباركلك فيها و يكفيك شرها, بالنسبة لسونستا انا جبت عربيتى من هناك و مكانش فى اى مشاكل خالص و بالنسبة لنقل العربية انا مفكرتش ساعتها فى الموضوع ده, بس بالصدفة وانا هناك لاقيت ونش بينزل عربية تانية

**msd86** · 15-12-2011 02:10 AM

الف مبروك, ربنا يباركلك فيها و يكفيك شرها

**mazda3mazda** · 15-12-2011 11:51 AM

متشكرين يا رجالة

**mohamed456** · 15-12-2011 03:26 PM

تمام تمام اكيد اتعاملت مع محمد الحسينى راجل محترم و ماسترز كلهم محترمين
بس منفعش اشترى من عنده عشان كنت عايز للون الرمادى
انتا جبتها لون ايه
؟

**mazda3mazda** · 15-12-2011 10:30 PM

المشاركة الأصلية كتبت بواسطة mohamed456

تمام تمام اكيد اتعاملت مع محمد الحسينى راجل محترم و ماسترز كلهم محترمين
بس منفعش اشترى من عنده عشان كنت عايز للون الرمادى
انتا جبتها لون ايه
؟

تمام، هو محمد الحسينى ... أنا جبت فضي عشان تستحمل التراب.. مع إن الرمادي كانت عاجباني قوي... واضح إن كل سنة بيبقي فيه نقص في لون معين ... السنة ديه بقي الرمادي هي اللي مركونة في كل المعارض :)