عملت حادثه قبل كده؟؟

**abo_hosni** · 16-11-2008 10:41 PM

المشاركة الأصلية كتبت بواسطة AboMaro

الدروس المستفاده :
اني عرفت ان سواق النص نقل مكانش سواق كارو لا كان هو اكيد الي بيجر الكارو وللاسف بقابل منهم كتير و بقيت عارفهم كل ما الاقي حد عمال يشتغل كلاكسات ولا اعبره و لو عايز يعدي مبعديهوش

الحل هو التصرف ببرود
لسه امبارح واحد عمال بالكلاكس ورايا و الطريق شبه واقف يعني كبيرنا نمشي على الأول. قلت لازم أقرفه عملت إيه بقى استنيت لما الطريق فضي قدامي شوية يعني المفروض أمشي قمت ضارب فرامل و هو لازق فيا مالوش مخرج إلا لو أنا مشيت و فضلت دايس فرامل ييجي 30 ثانية عشان يشوف نور الفرامل كويس و أنا باصص له في المراية بعدها جبت مارشدير عشان يشوف نوره هو كمان في الآخر صعب عليا قمت طالع
أنا لو مكانه بصراحة و حد خنق عليا كده كنت رميت نفسي من الشباك :)

الحوادث بقى هاكتفي بآخر حادثة و ربنا ستر

المشاركة الأصلية كتبت بواسطة abo_hosni

عن عدة تجارب بقيت أمشي و ماسألش لا فلوس و لا محاضر :(

لدرجة أني آخر مرة والله ماوقفتش أصلاً بعد الحادثة بس هديت شوية و بصيت في المراية لقيت اللي خبطني هدى و كان ناوي يقف بس أنا فكرت أقف ولا لأ. قلت مافيش فايدة و الحمد لله كلنا سلام و قمت طالع

السائق كان أب و معاه أسرته و أنا كان راكب معايا الأسرة أيضاً، لو كان شاب شايف نفسه أو حاول يجري من البداية ساعتها كنت هاوقفه و لو أديله كلمتين في جنابه على الأقل

هاوصف لكم و انتم قرروا مين الغلطان
http://maps.google.com/?ie=UTF8&ll=3...00486&t=k&z=18
أنا نازل من فوق و أخدت مدخل بنها لليمين و مشيت و عند أول يوترن لقيت واحد 305 جاي من تحت و بيلف. رحت مهدي و هو أخد الملف على واسع فبقت عربيته في الحارة اليمين رحت أنا مستمر في الحارة شمال زي ماكنت ماشي و بعد ما عربيتي عدت نصف عربيته لقتيه لسه بيكسر على الشمال جامد شكله ما عدلش الدركسيون و قام داخل على عربيتي في جانبها الأيمين من عند الرفرف و حاولت أهدي و آجي شمال على قد ما أقدر لكن مافيش فايدة. دخل بالاكصدام الحديد بتاعه في البابين عندي لدرجة أنه قطع الباب الخلفي!!!!!!

مع أنه هو الغلطان، أنا مشيت و كلفتني بس 140 جنيه (سمكرة 40 و رش البابين كاملين 100)

باسمع مواقف من قرايبي خارج مصر باحس أني في عالم آخر

SS · 17-11-2008 12:14 AM

المشاركة الأصلية كتبت بواسطة Noha.M

غير لا اشارة ولا اى حاجة عشان عاوز يدخل في الشارع الى على شمالى طبعا نزلت لقيته حد غلبان و سنه صغير طبعا لا هيقولي اصلحها و لا بتاع قلت اخد حقي منه زعيق بقا

الدروس المستفادة
مش لاقية بصراحة درس مستفاد لان انا معملتش حاجة انا ماشية فى حالى :(
بس الحمد لله :)

معلش سؤال سخيف شوية:
يعنى لو مكانش غلبان و صغير...كنت هتاخدى حقك ازاى؟...:k39:...زعيق برده؟
من الواضح ان ده بقى الاختيار الوحيد المتاح امام اغلب الناس المحترمة :k30:

**dr_abooody** · 17-11-2008 01:00 AM

المشاركة الأصلية كتبت بواسطة Ahmad Allawy

كده عندنا عربيتين متعلم عليكم..
الـ 127 سبعاوي
و النيفا وكاوتش نسر 16 بيشو..
والبقية تأتي.. :) :) :)

احب اضم صوتي اليكم و نزود عدد العربيات و نخليهم 3

يوم 7 شهر 6 السنادي دة يوم عيد ميلادي بالظبط
كنت راجع من التربية العسكرية من كلية زراعة روحت و اخد الدائري و متجة الى المعادي و كانت الدنيا حلوة و العربية كويسة و كان في ناس صحابي في عربية تانية ورايا بس انا سبقتهم شوية
المهم بعد ما عديت النزلة بتاعت كورنيش المعادي و مكمل كدا في اتجاه كارفور و كنت ماشي في الحارة الشمال على 90 او 100
فجأة الاقى حاجة كدا كبيرة لونها اصفر و كانت واقفة كدا و كل العربيات عمالة تحود منها
افتكرتها صخرة روحت قولت اهدي شوية و بعد كدا اقوم محود عنها

روحت لقيت اني بعد دوسة الفرامل العربية بتلف شمال جامد اوي
راحت معرضة كدا كأني بخمس وسط الدائري
و هوب الاقي نفسي لفيت و العربية بقت ماشية بجنبها و في اجزاء اقل من الثانية لقيت نفسي بتقلب و بلف 180 درجة في نفس لوقت
و العربية اصلا طارت زي مايكون كدا بهلوان و لا جمباز
المهم اتقلبت في وسط الدائري و من غير ما الابواب بتاعت العربية تلمس الارض
و الحمد لله كنت رابط الحزام و مكنش في حد معايا
روحت علطول جة في بالى حاجة من 2
يا اما العربية تولع عشان كنت مفولها
يا اما ترللة تيجي تبطط العربية او عربية تخبطنى

قومت علطول فاكك الحزام و بصيت من الشباك كدا أشوف الدنيا اخبارها ما لقيتش حاجة روحت خارج من الشباك
و قعدت على السور الخرسانة اللي بيفصل ما بين الطريقين و اعد عمال بحاول استوعب اية اللي حصل
بس الحمد لله مكنش فيا خدش واحد

المهم الناس جت بقى و عدلت العربية
و الصخرة دة مش صخرة دة طلعت مفرش جلد كبير اوي لونة اصفر
[size=6][color=#0000ff]و اللي يشربني مية
و اللي يقولى بيسطة
و اللي يقولى اوعى الصنايعية يضحكوا عليك

و اللي ربط الشكمان

المهم عدلناها و كان صحابي معايا و جينا ندورها دارت بس بعد دقيقة كدا
و الحمد لله العربية كانت الخسائر كألاتي
الكبوت من قدام اتخبط
الازاز اتخلع و لزقتة
السقف من اولة فوق كدا هبط لتحت و احتاج زرجينة
المقص الخلفي شمال اتلوح و غيرتة

و دخلتها فرن و سمكرة و كلفتني 1200 ج في 10 ايام
و غيرت ماعدين قدام برضو

اما مشكلة الفرامل اللي بتلفشمال دة كنت عامل عليها موضوع كبير جدااااا في المنتدى و اتحلت بعد عناء استمر اسبوع
و لكن دلوقتي بقت بتحدف يمين نفس حدفة الشمال دلوقتي و مش عارف من اية
ربنا يستر

اللي اتعلمتة
1 - اوعى تكبسفرامل و انت على طريق سريع و حاول تفادي احسنلك
2- بردة اوعى حد يركب فيورا عشان مرة شوفت واحدة مقلوبة على كورنيش المعادي

3- ربنا يسترها معانا و يكفينا شر الحوادث
و اللي ييجي في الحديد يغور

**AHMEDCAR** · 17-11-2008 12:45 PM

عملت حوادث كتير بس اشهرهم و اللى فاكره كويس كان لسه عندى 17 سنه و مطلعتش رخصه

كانت قرب البيت ماشى فى شارع صغير و زحمه و طبعا العبد لله مش معترف بحاجه زى كده و كنت راكب حته حديدح اسمها لادا 2105 عربيه حديد فى حديد و ماتور جبار والله المهم

ماشى على 60 او 70 و الشارع ضيق بصراحه و كان طريقى و كان الساعه 9 الصبح يعنى البوابين كل واحد طالع بالخرطوم بتاعه يغسل فى العربيات و طبعا انتوا عارفين يعنى ايه ميه و رمل بسيطه و الاكيد طبعا فرامل الادا الabs بتعها مش بيعترف باحاجات دى و فجاه

عربيه اوبل فيكترا موديل السنه ( و الله صعبت عليا ) قطعت عليا الطريق و انا على طول رجلى على الفرامل و هوب لقيت عربيتى فوق الاوبل اه والله فوق اللاوبل و كانت سيقاها واحده ست (اموره اوى ) المهم انا مش معايا رخصه و لا اى حاجه بدى مارشدير علشان ارجع لورا مافيش العربيه مش عاوزه تمشى و فجاه اسمع صوت ديب ...ديب اتارى العربيه من كتير منا بعافر معاها قامت نازله من على العربيه الاوبل و انا اول مانزلت قولت يافكيك و طيران على البيت

الذ حاجه الست الاموره صاحيه الاوبل نزلت من عربيتها و قالتى يحمار (غالبا هيه دى الشتيمه الوحيد اللى تعرفها ) قومت انا قايلها شكرا و طيران على البيت
هو طبعا تصرف زى الزفت و ماينفعش اعمله لكن انا كنت لسه صغير ساعتها و مش فاهم حاجه

الدروس المستفاده

مهما جريت ليك معاد هاتوصل فيه مقدر من عند ربنا

الدروس المستفادة : نحكم عقلنا .. نهاجر كلنا .

و ممكن نولع فيها برضو

**Samir Elshahawy** · 17-11-2008 01:07 PM

اول حادثة ممكن يتقال عليها حادثة - و ان شاء الله تكون الاخيرة - كانت قبل رمضان اللي فات ب 3 ايام , كان يوم خميس الساعة 5 و نص و كنت راجع من شغلي بالماظة و معايا واحد زميلي و ماشي علي طريق السويس و المفروض اني ادخل من الدائري علشان اوصله عند الصينية اللي امام الاكاديمية

المهم كنا بنتكلم و منت ماشي 120 كم/ساعة و سرحت و كنت ها أعدي الفتحة بتاعت الدائري و كان فيه عربية فيليشيا علي يميني

هديت السرعة و اديت اشارة يمين و بدات اخد الملف علي الواسع علشان خايف اخبط في العربية الفيليشيا اللي انا مش عارف هو رايح معايا و لا مكمل علي طول , و فجأة لاقيت حجر كبير (60 في 30 في 30) سم امامي مباشرة

طبعا ضربت فرملة و لفيت العربية ناحية اليمين لكن للاسف العربية اتزحلقت ناحية الحجر و طااااااااخ ضربت الحجر اللي لف زي النحلة و راح ضارب العربية من الجنب

** الخسائر :
- فردة الكاوتش الامامية شمال اتفتحت
- الجنط اتعوج
- المقص الشمال اتلوي للخلف
- اصابة العتب الشمال تحت الباب بطول حوالي 60 سم و عمق 20 سم
- فانوس الضباب الايسر اتحرك من مكانه و اللمبة اتحرقت
- النور الواطي يمين اتحرق من تاثير الصدمة

** الدروس المستفادة :
- التركيز ثم التركيز ثم التركيز في الطريق
- تهدئة السرعة قبل الملفات بفترة كافية
- تحذير السيارات الخلفية قبل الانحراف أو تغيير الاتجاه باستخدام الاشارات بفترة كافية

**شريف** · 17-11-2008 02:33 PM

المشاركة الأصلية كتبت بواسطة walidadel

والله ياباشا اسمحلي اكون اول واحد افتتح الكلام في الموضوع المحزن و المؤلم دخ
عملت حادثتين بعربيه واحد و هي لانوس
الاولي مانت علي الدائري واحد خبطتني من ورا فالعربيه اتعرضت في الشارع جت عربيه تويوتا كرولا دخلت في الباب اللي الخلفي شمال الباب ده كان في دخل لمسافة الكرسي بتاعي و طبعاً مش حنتكلم عن الخسائر واضحه
الثانيه كنت في الصالحيه الجديد و متجه لفاقوس المهم في مزلقان سكه حديد الراجل بتاع المزلقان نايم و انا داخل علي المزلقان وقفت علي شريط القطر علشان كان مكسر فاعدي واحده واحده المهم خير الله اجعله خير لمحت القطر و كان الله بالسر عليم بقي و طبعاً الخسائر واضحه اوي اوي اوي
الحمد لله مفيش خسائر في الارواح
في المرتين كانت اعصابي هاديه عادي يعني
و ان الشرطه و البوليس و الجو ده خدعه كبيره و محدش حيجبلك حقك
توقع خطأ الغير بنسبة 90%علي اقل تقدير

سؤال الانوس اخبارها اية دلوقتى؟

**HeMa_LanCeR** · 17-11-2008 02:47 PM

الحمد لله
قياده لمده 5 سنوات (من غير رخصه) والحمد لله بدون اي حوادث
وقياده لمده 3 سنوات ونص (بحيازه رخصه قياده ) بدون حوادث او خسائر كبيره
ولكن كان في خبطه عملتها من اسبوعين لكن الحمد لله كانت الخسائر شبكه اماميه فقط لا غير
وربنا يكفينا شر الحوادث وشر الطريق ويبعد عننا اي كمين

**askoda** · 17-11-2008 03:48 PM

Ana ba2a 3amalt 7adsa belFiat 128 bas elmoshkela enny da5alt fi fiat 125 :(

elli hya 7etet 7adeed

Elmohem enny ba3d mada5lt fiha wesh fi wesh 3ashan elbeeh kan gay mo5alef fi el7ara bta3ty wana elard ta7t 3arabeety kanet kolaha ramla wana kont mashy 3ala 90 keda

Tab3an el3arabya mn 2odam entahet 3al2a5er wkamaan el3arabya za7afet mn wara 3ala el3arabya bta3et elpepsi elli kanet wa2fa tenazel pepsi lelkoshk

.

Eldroos elmostafada : drive Fast as the road can bear :)

**AboMaro** · 18-11-2008 12:54 PM

لسه اول امبارح كاتبلكوا على حادثه حصلتلي
و النهارده اكتب عن واحده تانيه حلصلت امبارح
ماشي على طريق القاهره بلبيس الصحراوي
قدام مدينه السلام المهم عربيه شايله مواسير ضخمه ماشيه سده الطريق وماشي وراها امين بموتوسيكل و مشغل النور و السارينه عشان ينبه اللي جاي ع الطريق وراها
طبعا في مسافه تعدي جمبها بس يادوب بالعافيه ف العربيات بتهدي و بعدين تعدي
كل ده عادي انا كمان هديت
اللي مش عادي ان كان ورايا نقل بيني و بينه مسافه كافيه اكتر من 70 وقل من 100 متر جدا لكن للاسف النقل ابو مقطوره ماشي ع الطريق ومعهوش فرامل واضطر يخليني اساعده عشان يفرمل
دخل ف الشنطه و انا كنت اتنبهت للي هيحصل فبعدت عنه شويه و الحمد لله الشنطه اتبهدلت بس مش اوي و الحمد لله مكسرش الفوانيس الخلفيه
انا طبعا ركنت على جمب او اتنطرت على جمب و كنت هتقلب من الرمله الناعمه اللي دخلت فيها و لولا معايا مراتي وعيالي نايمين ورايا و عايز اطمن عليهم كنت فضلت وراه لحد ما وقفته
طبعا عايز حد يسأني الامين الهمام اللي كان ماشي جمبنا بموتوسيكل راح فين
انا اقولك الراجل وقف و اتطمن علينا وكله تمام طبعا انا انتظرت انه يروح ورا النقل يوقفه يقوله فراملك فين ولا الهوا وقف اطمن عليا و ساعدني هو كام واحد وقفوا ان العربيه تطلع من الرمله وفتح بالموتوسيكل يمشي ورا عربيه المواسير

الدروس المستفاده :
مش عرف اقول ايه بس حد يقولي نقل بمقطوره وماشي من غير فرامل تكفي انه يهدي مش يقف يعني مكفتوش يهدي وبينه وبين اللي قصاده حوالي 70 او 80 متر و ده حصل قدام امين شرطه و ولا سأل عنه حد يقولي الدرس المستفاد ايه لاني لو قولت هيجيبوني عن طريق الي بي بتاعي و هخش السجن

**KHALED AYMAN** · 18-11-2008 04:06 PM

انا كنت ماشى بالعربيه و فى زحمه و جمبى تاكسى فى بنتين زى القمر و احسن كمان المهم انا لسه هتكلم و اظبط لقيتهم بيضحكو هههههه الطريق لاافف و انا طبعا مش شايفه و هب العربيه اترجت و نطت لفوق و نزلت لقيت الجنط الى ادام متشرححححححححححححح (كنت لسه شاريه بقاله شهر ولا حاجه) و من يومها بطلت ابص على التاكسيات.و الجنط لسه زى مهو و عايز ارشه بس مش عارف فين و ازاى

الموضوع: عملت حادثه قبل كده؟؟

LinkBack

أدوات الموضوع

عرض

-

-

-

-

المواضيع المتشابهه

عملت حادثه

انا عملت حادثه

انا عملت حادثه..

عملت حادثه حادثه

عملت حادثه او اتعمل فيه حادثه

الكلمات الدلالية لهذا الموضوع

المفضلات

المفضلات

ضوابط المشاركة