عملت حادثه قبل كده؟
جامده؟
كسرت فانوس؟
طبقت كابوت؟
بوظت موتور؟؟
احكيلنا عن مغامراتك وذكرياتك مع الحوادث
واتصرفت ازاي؟
واتعلمت منها ايه؟
عرض للطباعة
عملت حادثه قبل كده؟
جامده؟
كسرت فانوس؟
طبقت كابوت؟
بوظت موتور؟؟
احكيلنا عن مغامراتك وذكرياتك مع الحوادث
واتصرفت ازاي؟
واتعلمت منها ايه؟
كنت ماشي في شارع شهاب في المهندسين
والشارع تمام وسالك زي الفل
لمحت على الرصيف التاني بنت حلوه اوي اوي
الصراحه انا تنحت
وازبهليت
جمالها اخدني
فضلت ابحلق..
وسرحت بخيالي
ملاك ده ولا بشر...
و...........
بووووم طراااااخ
لبست في العربيه اللي قدامي
الشارع وقف فجأه
وانا ماشي على سرعتي..
اخذت ثانيتين عشان افوق من الخبطه
نزلت من العربيه
لقيت نفسي داخل في تويوتا كورولا
بهدلتله عربيته من ورا.. وكسرتله فانوس وبوظتله الشنطه خالص
وانا الاكصدام لتكسر
وسربنتينة التكييف اتخرمت
والكبوت باظ
اعتذرت للاخ التاني صاحب العربيه
واتأسفتله
وقلتله ان هو مش غلطان...
ووعدته بتصليحها على حسابي
ولقيته راجل ذوق
يعني مانزلش يشتم وا يسب ويلعن
ده حتى مازعقش ولا على صوته
واخذت موبايله
واتفقنا على ميعاد نتقابل فيه نصلحها
ومجرد ما وصلت البيت لقيته بيتصل بيا
وبيقولي انا خلاص مسامح
واحنا داخلين عللى رمضان وعايزك تدعيلي
الصراحه حسيت ان هو انسان محترم جدا
ودعيتله من قلبي والله
اتعلمت من الموقف ده حاجات كتير:
1. العفو عند المقدره
2.الاعتراف بالخطأ واجب والاعتذار عنه
3. تحمل مسئوليه اخطائي
4.هدوء الاعصاب في المواقف الصعبه والتعامل مع الناس باحترام
5.غض البصر وعدم البصبصه تاني
والله ياباشا اسمحلي اكون اول واحد افتتح الكلام في الموضوع المحزن و المؤلم دخ
عملت حادثتين بعربيه واحد و هي لانوس
الاولي مانت علي الدائري واحد خبطتني من ورا فالعربيه اتعرضت في الشارع جت عربيه تويوتا كرولا دخلت في الباب اللي الخلفي شمال الباب ده كان في دخل لمسافة الكرسي بتاعي و طبعاً مش حنتكلم عن الخسائر واضحه
الثانيه كنت في الصالحيه الجديد و متجه لفاقوس المهم في مزلقان سكه حديد الراجل بتاع المزلقان نايم و انا داخل علي المزلقان وقفت علي شريط القطر علشان كان مكسر فاعدي واحده واحده المهم خير الله اجعله خير لمحت القطر و كان الله بالسر عليم بقي و طبعاً الخسائر واضحه اوي اوي اوي
الحمد لله مفيش خسائر في الارواح
في المرتين كانت اعصابي هاديه عادي يعني
و ان الشرطه و البوليس و الجو ده خدعه كبيره و محدش حيجبلك حقك
توقع خطأ الغير بنسبة 90%علي اقل تقدير
اول حادث حصل لي كان بعربيتي الجديدة نيسان تيدا 2007. كنا ثالث يوم العيد ومراتي قالت لي عاوزة اسوق، المهم ركبت العربية ومشينا (الكلام دة في قطر) الحمد لله كلة تمام وكانت سايقة 100 -100، خلاص واحنا مروحين وداخلين علي البيت فكان فية مفترق طرق (دخلة يمين ومنها علي البيت) او اكمل طوالي في الطريق العام وادخل من دخلة تانية. المهم هي اتلخبطت تدخل يمين ولا تكمل وانا مش اسيبها تتصرف، لا رحت ماسك الدريكسيون علي العدل وقلت لها دوسي فرامل. هي بدل ما تدوس فرامل داست بنزين وهوووووووب العربية راحت طالعة فوق رصيف وكانت علي سرعة 60 ومنة لرصيف تاني وتالت لحاد الحمد لله ما وقفت. طبعا لولا ستر ربنا كنا رحنا في داهية لان كان فية لودر واقف في الوش يعني حركة بسيطة وكنا في رحاب الله والمشكلة ان كانت معايا بنتي عمرها سنة ونص بس يشاء السميع العليم اني اخليها تكون قاعدة ورا في المرة دي بالذات (هي طول عمرها بتقعد ادام مع مراتي). نزلت وانا قاطع النفس اشوف مراتي وبنتي والحمد لله كانوا تمام. العربية بقي . الفردة اليمين بكامل مشتملاتها من كاوتش وجنط وكوبلن ومقصات وخلافة ادمرت. الحمد لله السيارة كانت تامين شامل بس تخيلوا ال estimation للتصليح طلع كام في التوكيل بتاع نيسان؟؟؟
17000 ريال قطري
انا اتقلبت مرتين بالعربية
مرة كانت بعربية 127 يوم 14 اكتوبر 1997على الأوتوستراد بين مساكن شيراتون والنادى الأهلى ، قبل كوبرى طريق السويس بمسافة قصيرة، والسبب فى الحادثة انها 127 ، لا يوجد سبب آخر ، مجرد انى بحاول افادى عربية ماشية قدامى علشان اعدى منها بطريقة عادية جدا وعينك ماتشوف إلا النور ، العربية لفت حوالين نفسها مرتين وبعدين لبست وهى مقلوبة فى عمود نور، بس الحمد لله خرجت منها بدون كسر واحد وبشوية كدمات بسيطة، لكن العربية مكانتش لها معالم خالص، واتباعت خردة، ومن ساعتها ونا مش بطيق حاجة اسمها 127 خصوصا بعد ما اكتشفت ان كل قاربى ومعارفى اللى جابوا 127 اتقلبوا بيها(حوالى 10 حوادث انقلاب ب 127 ما بين اقاربى ومعارفى)
والمرة التانية كانت ب 132 فى نفق الأزهر ، يوم 3 نوفمبر 2002، اللى عربيات اللى قدامى كلها فرملت علشان كان فيه واحدة ست جالها هلع لما شافت عين القط اللى فى النفق وراحت ضابة فرامل فجائية، فكل اللى وراها ضربوا فرامل من اللى بتصفر فى الأرض، انا كنت الخامس فى الطابور، الباشا اللى ورايا قرر انه هو اللى ناصح ومضربش فرامل زينا وراح طالع من شمالى، فى طلعته لطشنى بيمين اكصدامه الأمامى فى يسار اكصدام الخلفى وطبعا مافيش تحكم من عندى لأن العجل بيحف فى الأرض، راحت عربيتى متزحلقة وطالعة بالعجلة اليمين اللى قدام على رصيف النفق العالى، واتقلبت على جنبها
بس المرة دى كانت كوميدية جدا، الناس عدلونى بالعربية وانا جواها، فضلت اعافر معاها شوية لحد ما دارت، نزلت بصيت على الزيت والمية لقيتهم كويسين، سقتها لحد السمكرى وسبتها عنده علشان يعمل الجنب (مكانش بايظ اوى لكن مكحت شوية والباب بناعى مبيقفلش) وبعد ما سبتهاله رحت مستوصف عالجت ايدى اللى كانت متعورة( اصلى بذكائى خرجت ايدى من الشباك فاكر نفسى هسند العربية وهى بتتقلب)
بس ، بعد كدة صلحتها كلفتنى حوالى 700 جنيه وبعدين بعتها
الحوادث اللى بعد كدة كلها بسيطة ، لا تعدو حاجات من نوعية تريللا دخلت فيا وانا راكب العربية الريجات وكنت هموت فيها، عربية 127 سايقها راجل عنده ييجى 120 سنة دخلت فى باب عربيتى الشاهين على منزل كوبرى اكتوبر وانا واقف والطريق كله واقف قدامى ونازل يتخانق معايا، مرة تانية بالريجاتا باخد يو تيرن وباصص على يمينى اشوف العربيات اللى جاية لبست فى سواق راكب عربية ليجانزا كان عدى اليوتيرن وفجأة افتكر انه كان مفروض يدخل فيه راح راجع بضهره ، ومرة كنت داخل فى شارع جانبى فى سموحة فى اسكندرية بالعربية الشاهين وداخل يمين على ضيق علشان اعمل حساب اللى جاى فى وشى والاقى حجر محترم واضح انه من مخلفات تكسير شقة واحد راميه فى الشارع على الناصية ومش باين من الشجر كسرلى الباب اليمين الخلفى، ..كدة يعنى كلها شوية حاجات هايفة من النوعية دى
في البداية .. ربنا يسترها معانا كلنا ويبعد عننا شر الحوادث
أنا عملت حادثة السنة الي فاتت بالعربية الـ 205
كنت ماشي في طريقي تقريبا 70 وفيه رصيف معمول مخصوص جمب باب المدافن عشان الي خارج من جوا يمشي من جوا بعد الرصيف ده عشان ميطلعش بوشه على الطريق ..
المهم ببص لقيت الباشا خارج ببوز العربية من بعد الرصيف ده وانا لسه هجيب التالت واجري لانه طريق مفتوح .. رحت مهدي وجبت التاني واديته كلاكس لقيته واقف ..
اي بني آدم طبيعي على وجه الارض هيفهم انه مش هيعدي جبت تالت وجريت لقيته بدأ يتحرك عمودي على الرصيف الي في نص الشارع .. " تقريبا عاملي كمين" :)
المهم انا اتوقعت الي هيحصل ..
وانا العربية عندي من ورا اعرض من قدام ..
المهم الباشا طلع "" عمودي"" قدام على الرصيف وانا خلاص جريت ومفيش تراجع ..
سايبلي حته بين بوز عربيته وبين الرصيف بالظبططططططط على قد بوز عربيتي
عارفين ده معناه ايه ؟؟
معناه اني أكيدددددد هتخبط من الجنب الي ورا
ربنا ألهمني اطوح العربية على قد ما اقدر ناحية الرصيف ولما اوصل لنص المسافة اشد الهاند بريك والفها .. "مع العلم اني متعود على كده" :) من ايام الشقاوة
وفعلا قررت ودخلت وبدأت أشد الهاند راح الباشا دايس بنزين وخبطني في جريد الباب الي جمبي .. انا كملت لفتين حوالين نفسي ولفيت بوز العربية عكس اتجاه ووقفت
انا نازل اسأله حتى لو سبته يعدي مش هيعرف لازم يرجع بظهره عشان ميخبطش في الرصيف .. طب رايح فيييييييييييييين ؟؟!!!!!!!!
ببص لقيت الراجل بتاع محل الكاوتش الي الناحية التانيه والناس الس في الشارع بيصقفولي :)
بصراحه اتخضيت
المهم طلع راجل سايق وجمبه ست ووراه راجل تاني
الفزلوك الي وراه نازل يقولي انت مش تخلي بالك
الحق يتقال انا محتجتش اتكلم الناس الي في الشارع هم الي مسكوا فيه
وقالي مش هصلحلك حاجه
اتصلوا بواحد تبعهم لما جه قالهم اخرسوا خالص
وجه معايا شال السمكرة " بسيطة الحمد لله"
وبس
اتعلمت ايه بقه
هتستغربوا :
- ان حتى لو الي سايق راجل كبير " بس مش محترم" .. اتعامل معاه من هذا المنطلق بدون قلة أدب
- عرفت ان انا غلطان او مش غلطان .. المرور مش هياخدلي حقي ولو اتصلت بالنجده كل طرف من الطرفين هيدفع فلوس للمحضر والمعاينة ولا حياة لمن تنادي بعد كده ، عشان كده قررت انه لا قدر الله لو حد قليل الادب خبطني وبيآوح .. ادور العربية وارجع لورا شوية واخش في عربيته عشان استريح وبعدها امشي :)
- ان كلمة " متأسف" بتمتص الغضب بشكل غير طبيعي ..
يعني لو حد غلط فيك بقصد او بدون قالك " متأسف" .. مش هتقدر تفتح بقك حقيقي
- في النهاية .. حسن تقدير أخطاء الآخرين
السائق الماهر الي يتفادى الاخطاء بتاعت الآخرين .. مش الي بيعرف ياخد غرز
تحياتي وآسف ع الاطالة
الحادثة الجامدة اللي عملتها كانت وانا كنت في 3 اعدادي
طبعا مش المقروض اني اسوق في الوقت ده اصلا لكن تقول ايه بقى استهتار
بس و الله مكنتش انا اللي غلطان
كنت عند واحد سمكري معرفة
وكان بيصلح عربية زبون كانت رتمو العربية كانت متاخرة حوالي اسبوعين عن ميعاد التسليم
بس و كان المفروض ياخدها تاني يوم الصبح
السمكري ده قالي تعالى نجربها مع بعض
قلتله ماشي
رحنا نجربها على جسر السويس
بعدين لقيته بيقولي مش عاوز تجرب تسوق (اصله كان بيعزني اوي :-))
طبعا انت لو مكاني هتقوله ايه
قلت ماشي طبعا وسقتها من جسر السويس لحد مادخلنا المدينة عندنا تمام اوي وهو بيشجعني ومعجب بيا
(مش بقولكم بيعزني)
جه في دماغي اني احود في شارع معين وانا ماي حوالي 40كم/ساعة
قام هو الباشا قالي لا لا متحودش ورد مني الدريكسيون
طبعا انا مسبتهوش يرد الدريكسيون كله وهو برده ماسبنيش احود
هووووووووب لبست في رصيف ارتفاعه ييجي نصف متر
طبعا العربية اتبهدلت مع اني كنت ماشي حوالي 40 بس الخبطة اثرت على الباب و جامد كمان
طبعا الراجل صاحب العربية باختصار بهدله يا عيني لان العربية اتاخرت كمان اسبوووع
لانه كان قاله ان العربية جاهزه وبعدين قاله انا خبطتها و هي بتتجرب
طبعا الراجل مصدقوووووش
كل ماشوف السمكري لغاية دلوقتي اقوله انه هو اللي غلطان هو يقولي منك لله
(مش بقولكم بيعزني)
حمدا لله على سلامتكم جميعا
انا الحمد لله لسه معملتش حوادث بس فيه شوية مصايب من بتوع اول ايام السواقة
اخطرها كان بعد ما اتعلمت باسبوعين تقريبا و كنت سايق على السريع و معايا والدي و والدتي و اخواتي "شوفوا المصيبة"المهم كنت هادخل من السريع على شارع جاتبي فاخدت الحارة اليمين و قبل الفتحة بيجي 100 متر اديت اشارة يمين و عمال كل شوية ابص في المرايا..... شوية لقيت عربية جاية بسرعة من ورايا و عمال يدي كلاكسات عاوزني اعديه
طبعا انا ما عبرتوش لكن كل شوية ابص في المرايا و بقيت مشغول بيه و مضايق منه جدا"مكنتش لسه دخلت المفرمة" يدوب وصلت للفتحة و داخل يمين لقيته رزعني حتة كلاكس:toot: خلاني ابص ورايا اشوف ال....:cuss: ده و في اجزاء من الثانية انطلق صوت في وداني كنت طبعا مميزه لانه صوت والدي هوب ...هوب ...هوب.. و ابص قدامي الاقي واحد نايم على الكبوت على ضهره..... مسكت فرامل قمت نطرته بس نزل على رجليه لاني كنت ماشي بالرحة و لقيته بدأ يزعق لقيتني انا ووالدي بنزعق فيه و بنقوله انت اللي غلطان ازاي تعدي من غير ما تبص على الطريق " وهو كان فعلا غلطان و عدى من غير ما يبص و ماشي بضهره كمان" الراجل لقانا هانكلوا قام قال حصل خير و مشي و انا مشيت يجي 20 متر و ركنت على جنب مش قادر اخد نفسي من الخضة و النرفزة و اعصابي سايبة و بقول لوالدي ما نبهتنيش قبل ما اخبطه ليه قالي منا قعدت اقولك هوب.....هوب.....هوب
ومن ساعتها بعد اي موقف يحصلي و انا سايق ومعايا حد فيهم يقعد يقولي هوب... هوب.... هوب.... و نقعد نضحك :D:D
الحمد لله ربنا ساترها معايا ومعملتش ولا حادثه لحد دلوقتي
ولكن ركبت مع ناس عملت حوادث كتير اغلبهم يا تكاسي يا اصحابي
بس معظمها خبطات خفيفه ... باستثناء واحده في طريق مصر اسكندريه العربيه لانسير 2006 بقدره قادر سبحان الله العربيه بقت هتش باك في لحظه ...عربيه نقل مكانش مشغل الفوانيس وماشي ...
بس ربنا يستر على الجميع و يسلم طريقه
من سبع سنين شارع الطيران طلعت فوق الرصف بتاع المترو و دخلت جوا باب المترو العربية اتمسحت كليا من تحت
هما حوالي 4 حوادث على مرور 12 سنة سواقة ... بس كلهم حوادث مش صغيرة ومش كبيرة الحمدلله .... وكلهم بعربية والدي ... كان بيصعب عليا الراجل ده .....
الجميل انه بعد ما بقى عندي عربية لوحدي ... معملتش حوادث ... بقيت العربية بتتخبط وهي واقفه .. واخرها حادثة كبيرة ....كنت واقف مستني دوري اعدي مطب على صحراوي العاشر من رمضان ... ايوه الله واقف.... ولا بي ولا علي ... سمعت صوت ضربة من وره ... وببص في المراية لقيت اتوبيس من الكبير 50 فرد ده اللي و عبارة عن علبة صاج وفيه موتور .. داخل عليا ...
فرامله سابت فدخل يقش في اللي واقففين و الحمدلله السواق حاول يفاديني ونزل في جانب الطريق ... فيدوبك خد معاها الرفر اليمين الوراني كله ....بفانوسه باكصدامه .....بسلاطاته ببابا غانوجه
بس الحمدلله .... اي حاجه تغوووووور المهم الستر و العافيه ......
وربنا يبعد عنا جميعا ويسلمنا شر الطريق
عايزين يا جماعه الناس تقول اتعلمت واستفادت ايه من الحوادث دي
عشان غيرنا ياخد باله ومايقعش في نفس المشاكل
عشان تستفيد بأكبر قدر من خبرات الناس..
..
ايييييييييييييييه..
بعد 8 سنين سواقة.. بنتكلم علي المحصلة من الحوادث.. :)
هاقولكم بترتيب العربيات..
العربية السيات الحمد لله معملتش بيها اي حاجة غير يمكن حطو في عربية ولا حاجة وانا باركن..
العربية ال125.. هي اللي عملت بيها كل حاجة..
اولهم.. خكة في عربية راكنة.. بس صاحبها كان فيها.. كانت سوزوكي نص نقل..
و الراجل لقاني لسة صغير و كده قالي امسي يا حبيب ي مخصلش حاجة..
وخاصة انها كانت بسيطة قوي يعني.. يعني خربوش..
بهد كده بقي في حاجات اكبر شوية..
مرة خبطت واحد .. كان راجل كبير كمان.. بس المشكلة الكبيرة التردد..
كان ماشي بيعدي الشاارع و انا علي التالت و عزمه.. وهو طلع قدامي شوية كده.. هديت.. قام وقف خالص..
فشيلت رجلي من الفرامل خالص.. و كملت مشي.. قام هو عمل ايه..؟؟
لما قربت منه قوي قام ناطط قدامي.. و عينك ما تشوف الا النور..
الراجل طار لما غمزته كده بركن العربية الشمال.. و نزل علي الارض و راسه ع الرصيف.. و كل حاجة معاه اتبعترت .. و كان المظر يخض..
و الشعب المصري ابن ال***** اللي عايز جنازة و يشبع فيها لطم..
كل واحد ربنا يقدره بحاجة بيقولها..
اللي يقولك ده شيطان..
واللي يقولك انا شايقه من اول الشارع وهو طاير..
واللي يدخل العربية ياخد المفتاح..بصراحة سبيت لهم كلهم.. و اخدت المفتاح م الراجل بالعفية و شتمته.. عشان ده مش اسلوب.. و المصيبة كنت في منطقتي كمان..
بس اخدت الراجل بمزاجي ع المستضفي.. و كان في قدامي فرصة اني امشي.. و الناس قالولي كده هناك.. بس مؤضيتش.. ضميري بقي.. و فضلت لحد ما اتعمل اشعة.. و انه مش في كسر ولا حاجة..و فضلنا هناك حوالي 3 ساعات.. و لحد دلوقتي محدش عارف ف البيت بالحادثة دي.. بس ناس من قرايبي او اصخابي..
المهم جيبتله تاكسي و اشتريت الدوا و ركبته و حاسبت التاكسي و مشي..و اتقفل المحضر بالتراضي..
تاني مرة بقي.. كنت باعدي شاشرة كوبري الجامعه.. و ميني باص طالع من علي يميني و بيلف شمال..وانا ماشي في الحارة اللي ف النص.. يعني هو غلطان رسمي.. و وانا ماشي قدامه..
يعني هو المفروض يستني عشان انا قدام..
قام قارص.. و لطش الرفرف اللي ورا شمال و حتة م الباب..وقفت و نزلت وهو جري طبعا و موقفش.. الكمساري نزل و مكلمنيش.. نزل عشان انا شتمته بس.. مش عشان هو غلطان ولا هبطني و كسرلي رفرف العربية.. وضربتها في دماغي لقيت انه نقل عام يعني مش هاخد حق ور باطل.. مشيت و قولت عوضي علي الله..
اتصلحت سمكرة و دوكو بحوالي 100 جنيه..
اللي بعده..
كنت ماشي برضه قدام كلية اسنان القاهرة.. و قدام الفتحة بتاعت شارع عبد العزيز ال سعود..
وواحد بيلف غلط كان سواق عسكري جيش سايق نص نقل.. و وراه تاكسي مازدا قديم..
وانا وراهم.. وقف النص نقل فجأة.. ووراه التاكسي.. واناا ملحقتش بقي.. :)
رشقت ف التاكسي.. هو الشنطة اتفتحت.,. نزل قفلها.. و مشي.. و انا نزلت اطمن عليه بصراحة.. عشان انا غلطان.. انا بقي الكبوت و الشبكة اتشوهت..بس مكانتش جامدة..
مشيت بيها حوالي 4 او 5 شهور لخد الصيف.. و سمكرت و عمرت حاجات بارومة و ظبطت العربية..
بعدها مفيش بكام يوم.. باطلع من تاكسي اتشبكت في اكصدامه عشان كان لادا.. و نفس الرفرف المشئوم اتحخبط بس كانت ختة صغيرة مده المعجون بتاعها كان وحش فوقع من الخبطة..
اخر حاجة بالعربية دي كانت وانا رايخ علي شبرا الخيمة.. ع الكورنيش..
ميكروباص التارامكو.. وقف في نص الشارع..وانا كان معايا 4 ف العربية.. و ناس كبار.. اوزان يعني..
و زي ما كلنا عارفين ان كل ما الوزن زاد القفصور الذاتي بيزيد,, و التوقف بيكون اصعب.. و ده اللي انا مكنتش واخد بالي منه ساعتها.. عشان كنت بقالي فترة طويلة جدا باسوق العربية لوحدي..
المهم الخطأ مشترك بيني و بينه.. هو اتخدش كده ف الاكصدام الصلب بتاعه..
انا بقي اتدلعت..
الكبوت اتخبط و الرفرف اتطبق خالص.. و فانوس كبير و فانوس اشارة..
بس الحمد لله..اتعملت كلها ب 150 جنيه..
الحمد لله كلها كانت حاجات بسيطة..
برضه مرة بقي بس انا كنت غلطان صرف.. كنت بارجع بضهري في شارع عند ادارة التربية العسكرية في الدقي طالع من شارع جانبي كنت لسة داخل فيه خالا..
وبصراحة مكنتش باصص ف المراية اصلا.. معتمد اني لسة داخل و مكانش في ح ورايا خالص..
لقيت فجأة دايو لانوس ورايا و دبببببببببببببببببببببببب ببببب..
محصلش حاجة تقريبا بس الكبوت نزل تحت سنة و اتخشر ف الاكصدام.. بس مفيش حاجة اتكسرت.. وانا عندي طلعا ولا الهوا.. ولا حتي خدش ف الاكصدام النيكل.. :)
بس فضلت واقف معاها لحد ما اخوها جه..برضه كانت هتهيص و تفقد اعصابها و تغلط ف الكلام هبيت فيها سكتت خالص.. و برضه اخوها لما جه.. نفس الكلام سكته بالذوق.. و عدت.. قاللي لو هتتصلح ع السخن هاكلمك عشانتدفع ولو ع البارد اوك.. هاعملها مش مشكلة.. قولتله اوك شغال.. بس خب يستنصح و ياخد رقم العربية و اسمي.. عشان لو حبيت اتعرب منه ولا حاجة..
اديتهمله عشان انا عارف ان الكلام ده مالوش اي صفة طالما مش في محضر, وحجتي لو محضر,, مفيش غير ال60 جنيه اداريات باين و خلاص,, ومحدش بيدفع حاجة تانية.. بس بصراحة كنت علي اتمك استعداد للتصليح.. عشان غلطان جدا..
وحاجة كمان بس دي مكانتش حادثة علي قد ما كانت قدر..
ان فردة كاوتش تضرب علي الصحراوي..و كان معايا برضه العيلة ف العربية و شنط و كده..ربنا ستر كانت الفردة ورا شمال و الحمل خلا العربية تمسك ف الارض..و الطريق كان فاضي..و الحمد لله عدت علي خير و غيرت فردتين علي الطريق وانا ماشي.. اشتريتهم.. من محل علي طريق اسكندرة مطروح..
الدروس المستفادة بالاضافة للكلام المفسد اللي الاخوة قالوه..
--------------------------------------------------------------
لو لقيت قدامك حد بيفكر يعدي.. ايدك علي الكلاكس و النور و رجلك ع الفرامل احتياطس برضه ده لو بتفكر تكمل وهو يوسع.. وطلع ايدك م الشباك او شاور بايدك قوله استني او اقف مكانك..
اما لو بتفكر تهدي.. استعمل ايدك.. شاور ليه و قوله عدي.. عشان في ناس مش بتفهم الحكاية دي..
و كتير منهم بنات..لو هديت عشان واحدة ماشية ولا 2 ولا واحدة معاها بيبي وتقريبا وقفت قدامهم عشان يعدوا ترقيهم يبصولك بقرف و ميعدوش.. و تبقي انت اللي غلطان واللي وراك يزمرلك كتير.. و مش بعيد يشتمك..
لازم يكون معاك فلوس احتياطي طول مانت ماشي بالعربية.. محدش عارف ايه ممكن يحصل..تودي حد المستضفي او انت لا قدر الله تروح.. او تشتري كاوتش ولا اي حاجة كده..
فعلا لازم لو غلطان تكون متحمل مسئولية غلطك.. يعني تصلح او تدفع.. عشان حرام حد مالوش ذنب تدبسه معاك..
بس لو حد حاول بقي يقل اده.. سوري في اللفظ.. باللي في رجلك علي طول..
متديش خد فرصة انه يهيص عليك.. عشان في ناس بتتعامل بمنطق خدوهم بالصوت.. حتي لو هو غلطان.. خليك حافظ مركزك و مسيطر ع الوضع.. وانت تتحكم ف اللي قدامك ممن غير ما تقل ادبك الا لو خكم الامر يعني.. وده انا لا انصح بيه انك تقل ادبك.. ممكن تهزأ اللي قدامك بالذزق بس..
دايما تخلي معاك نمر تليفونات طوارء.. يعني ميكانيكي و كهربائي و سمكري وونش ده اساسي..
يا خبر ابيض..
معلش يا جماعه ماخدتش بالي اني كتبت كتير قوي كده..
معلش باسرح.. :)
الحمد لله ولا حادثة خالص
و الدروس المستفادة :
القيادة بحزر و هدوء
على فكره احمد علاوي
انت عجبتني جدا بثقتك في نفسك بجد...
الاخ فهد
انت واللله رائع
اخسن درس مستفاد
نيييييييييهعهعهع ... السبب انها 127 ... :3gears::arghh: حمد الله علي سلامتك يا باشا ...
بص انا بقي يا سيدي ... راكب النيفا و ماشي في امان الله علي طريق زراعي ... جنبيه مصرف من النوع اللي هوه لو نزلته محدش يشوفك تاني ... عرضه قد عرض شارع صلاح سالم كده عندكم ... المهم ... انا ماشي و المصرف علي اليمين ...و انا من النوع اللي ابص قدامي مسافه كبيره قوي .. المهم لقط جحش صغير ناحيه المصرف ... انا عارف انه هايشوف العربيه هاينط قدامها .. كنت لسه ملقم التالت للعربيه (النيفا) ... و لما لقطت الجحش ضربت تلكش علشان ينط و اخد انا الطريق من اليمين عادي ... المهم حصل الامر كالاتي بقي ...
انا ضربت تلكس .. نط في الاسفلت ( و هوه بعيد جداً عن العربيه) ... جيت انا باهدي عادي ... و لقيتلك العربيه .... زووووووو ناحيه المصرف .. لو نزلت ماهطلعش فرامل مافيش فايده .. بنزين مافيش فاديه .. اعمل ايه اعمل ايه ... ربنا الهمني اكسر من اخر يمين لاخر شمال ... و العربي راحت مكمله اللفه و بأت رايحه كلها شمال بعيد عن المصرف .. اعدل في العربيه مش عاوزه تتعدل .. الدريكسيون كان زي المياه تحت العربيه و مافيش فايده ... هوب فضلت معرضاها في الشارع لحد ما خبطت في حجر بلوك ... و راحت مقلوبه علي جنبها و سندت علي شجره ...
السبب اللي عمل كده ... لما نزت من العربيه باتفرج عللي حصل ... لاقيت الكاوتش حصل بركه زيت ماشفتهاش ... و الزيت هوه السبب ....
الاضرار : الصدر اتضمر - الكبوت اتغير - الترييه في السقف مكان الشجره .. و المرايه اليمين طارت .. و فانوس الشبوره اليمين اتكسر ....
اتصلحت ب 500 جنيه كل ده شامله رش و كله .. و انا لحد النهارده ضهري بايظ و متخرشم ...:wheelchair:
الدروس المستفاده : ماتركبش نيفا فيها كاوتش 16 و بلذات نسر 16 600 ...
كده عندنا عربيتين متعلم عليكم..
الـ 127 سبعاوي
و النيفا وكاوتش نسر 16 بيشو..
والبقية تأتي.. :) :) :)
ياااه
بخصوص الزيت اللي عللى الطريق
انا مره نازل من نزلة كوبري الساحل على امبابه
وشايف العربيات كلها من بعيد امامي بتاخد الملف بسرعه وتعوم بيهم وتعرض منهم...
وانا أقول.. هو مال الناس كلها بتاخد الملف بسرعه كده ليه؟؟ ما يهدي السرعه شويه؟.
ولا تلاقيهم شوية شباب يتهييس
المهم انا وصلت للمنزل بتاع الكوبري... وجاي بادوس فرامل...
ألاقي العربيه بتاعتي بتعمل زيهم وبتعرض مني في الطريق وبتلف...
لأتاري ان فيه زيت على الارض وكل العربيات بتعدي عليه يحصل لها كده
بس الحمد الله
مفيش حوادث
حادثة واحدة فقط....و ربنا يجعلها اخر حادثة....يا رب
كنت بال127...و كان أكتر وقت متعلق فيه بالعربية...كنت باهتم بيها أكتر من أي حاجة في حياتي...ساعتها كنت بحرم نفسي اني اجيب هدوم العيد و اخرج عشان اظبط في العربية ...حتي اهلي و اصحابي كانوا بتدايقوا مني للاهتمام ده....علطول تلاقيني شارد و بفكر هاعمل فيها ايه بكره ...و اما يبقي معايا المبلغ ده هاعمل ايه و و و....
و في يوم...نزلت من بيتنا الساعة 9 الصبح عشان اروح الجامعة.و ده كان تقريبا اليوم الوحيد اللي مالبستش فيه الحزام :dots:..اخدت الاوتوستراد زي كل يوم ماشي بسرعتي العادية 90-100...لابس النضارة الشمس...و مشغل شريط لفريق Blue و الدنيا اخر انسجام....فجأة و انا داخل علي كوبري طره ألاقي عربية (مش فاكر نوعها ايه لحد دلوقتي بس هي شبة ألأليكو) متوقفة تماما في نص الأوتوستراد علي مطلع الكوبري....و المشكلة و انا جاي من بعيد كنت شايفها ماشية...بس غالبا كان فيها جوان وش سلندر فجت علي مطلع الكوبري و عطلت....المهم انا مستوعبتش اللي بيحصل و مافهمتش ايه الموقف و حسيت ان فيه 12409823752 عمليه حسابية بتدور جوا دماغي في جزء من 1000 جزء في الثانية....لو حودت شمال في عربية نص نقل جامبو هالبس فيها...و دول عالين فا الخبطة هاتيجي في وشي...و لو حودت شمال هانط من الكوبري:oops:.....ملقتش غير اني ادوس فرامل بأقصي قوتي و زحفت العربية مسافة حوالي 6-7 متر لحد مالبست في العربية المتوقفة بسرعة 50 كيلو تقريبا.....
في اللحظة اللي خبط فيها حسيت ان الزمن اتوقف بيا و الدنيا ابيضت...فضلت قاعد جوه العربية لمده 10 ثواني مش فاهم حاجة ولا ايه اللي جابني هنا و كل اللي شايفه الكابوت متطبق..
خرجت من العربية و ببص قدام لاقيت حبيبتي ال127 اللي كنت بنام احلم بيها اتحولت لحطام من قدام (مكانش حطام قوي بس المنظر بالنسبة لي صعب)...العربية اللي الشبكة و الفوانيس بتوعها كانوا الأصليين فجأه بقوا فتافيت...:no:...و بعدين بصيت علي عربية صاحبنا لاقيت الشنطة بقت في سوي الكنبة بس واضح ان العربية كانت ورق...و تنك البنزين بتاعه اتخرم و غرق الدنيا....المضحك بقي ان الناس أول ماشافت البنزين طلعوا يجروا خايفين لا يولع:)
طبعا الغلط واقع علينا احنا التنين لأني مركزتش قوي انه هو متوقف من قبلها بفترة...و عليه لأن محدش يوقف في نص الأوتوستراد:wheelchair:
المضحك برده اني كنت شايل اتنين جيتار كهربائي في الشنطة ورا...من شدة الصدمة لاقيتهم جنبي...و كان فيه كوريك تمساح بعلبته ورا برده...نط لحد ما لبس في دماغي و عملي بوقليلة كبيرة :hat:....و طبعا عشان مكنتش لابس الحزام اندفعت بقوة و اديت الزجاج بالبونية و بوقي لبس في الطارة و ركبتي خرشمت التابلوه من تحت و البنطلون اتقطع :)
المهم الخساير في العربية كانت كبوت و أنصاص رفارف و صدر و فوانيس و شبكة و اكصدام...
الدروس المستفادة:
ماتتعلقش بحاجة في الدنيا دي مهما كانت....كلها أشياء زائلة
خد باللك من الطريق قدامك لأبعد مسافة ممكنة
البس الحزام و اوعي تنسي أو تكسل
ربنا يحفظ طريقكم و طريقي :)
ياااه دى ذكريات جميلة و الله و الحمد لله كلها عدت من غير اصابات المهم
المرة الاولى كانت فى العجمى سنة 95 بعربية 128 ما كنتش بتاعتى دخلت فى اتوبيس نقل عام !! و السبب ان البيه اللى قدامى حب يعدى واحدة امورة فاوقف مرة واحدة و انا مالحقتش الم نفسى و كسرت يمين و دخلت فى الاتوبيس و اتدمر الرفرف اليمين و حتة من الكابوت و فانوس الاشارة و الاكصدام اتعوج
التانية بعديها ب 3 شهور فى سيدى جابر و اتعملت ساندوتش بين تاكسى 504 و عربية داتشيا سايقها واحد ابن .....
التالتة على مزلقان الترام فى رشدى و دى بجد كانت مسخرة ،الاشارة قفلت و انا واقف على المزلقان و الراجل اللى سايق الترام كان بيبص فى المراية بتاعته علشان يقفل الابواب و طلع من غير مايبص ادامه و دخل بالسبنسة الحديد فى الرفرف الامامى اليمين و كمل على المساعد و لاقيت نفسى العربية مالت بيا درجة و انا قاعد جواها و اتزحزحت الباقى المهم نزلت و بصيت على العربية و ذهلت من المنظر و من غير ما احس رحت جايب حجر من اللى بيبقوا على سكة الترام و هووووووووب فى البربريز بتاع الترام و طااااخ نزلت نصه و بعدها عرفت حقيقة رجل الشارع المصرى اللى بيحب الخير و الجنائز علشان يصوت و يشبع لطم
الرابعة فى سيدى بشر على البحر سنة 2002 و السبب ان واحدة راكبة سيات ابيزا صفرا حبت تقطع البحر و تدخل شمال على خالد ابن الوليد و كان وراها لادا ستيشن بيضا و قف و انا كنت وراه برضه وقفت و اسمعلك صوت فرامل و زحف مايقلش عن 20 او 25 متر و طاااااااخ فى العربية من ورا و دمر الشنطة و الاكصدام و لبسنى فى اللادا و كسر الكشاف اليمين و الشبكة و بوظ الكابوت و هو الكشاف الشمال اتكسر و الرفرف و الكابوت اتعوجوا و العربية كانت اوبل موديل حاجة و سبعين و لونها اصفر و دى الحادثة الوحيدة اللى حسيت انها قرصة من ربنا علشان اتعدل
الخامسة 2005 نفس سيناريو الرابعة و على البحر برضوا بسبب راجل من ايام محمد على الكبير حب يعدى مع ان النفق جنبه (ادام اباظة دلوقتى فى سابا باشا) و فرمل عليه 128 فضى ادامى و انا برضه و قفت بس نوبيرا دخل فى العربية من ورا و عوج الاكصدام و الشنطة و هو الشبكة اتكسرت و الكابوت اتعوج على خفيف و من ساعتها حلفت انى مش مصلح العربية تانى لحد دلوقتى و سبتها لاختى على حالتها حتى الساعة دى .
الدروس المستفادة :اختار العربية اللى امشى وراها ،تكون حاجة حنينة كده مش لادا و بيجو و 128
استعمال الفرامل بعد نفاذ كل الحلول الممكنة
لو حافرمل ابص ورايا مش ادامى علشان اعرف اللى حايخش فى العربية
ابص ورايا اكتر ما ابص على الطريق ادامى
السرعة مش دايما خطر علشان ساعات كتيير بتنجد من مواقف صعبة
فداك يا ابو نادر..
الحمد لله علي سلامتك انت..
الله يخليك
و سبب ان الحوادث عندنا مختلفة عن القاهرة هى ان الناس هنا محدثة سرعة يعنى موضوع توسيع الكورنيش ده ادى الفرصة لمحدثى السرعة انهم يطيروا و دلوقتى لو ماشى على البحر على اقل من 80 كم/س لازم حاتعمل حادثة على عكسكوا فى القاهرة عندكوا طرق واسعة كتيير الواحد يعرف يجرى فيها براحته لما يحب و الناس موضوع السرعة عندها بقى عادى و بتعرف ازاى تتعامل معاها
عربيتي ماتريكس 2005 عملت بيها حادثتين للأسف ...
واحده من ورا و التانيه من قدام ... الأولانيه اتكلفت 6000 جنيه عند غبور
واقف في اشاره زي خلق الله و فجأه ألاقي اللي بيخبط فيا من ورا كانت عربيه فيات 124 بعيد عنكم و سايقها واحد عجوز مش شايف قدامه ... عربيته جابت كبوت و رادياتير
الحادثه دي غيرت فيها الأتي :
شنطه خلفيه , أكصدام خلفي , ظهر خلفي ( دي علبه مقفوله بتبقي ورا الأكصدام - بين الأكصدام و حلة الاستبن ) و اتكلفت 6000 جنيه بالمصنعيه بالسمكره و الدهان ... هياكل قليوب ...
التانيه كنت داخل علي مفارق و كنت ماشي حوالي 40 يعني مش طاير و ألاقي مره واحده عربيه بيجو 405 طلعتلي ماعرفش منين و دخلت في جنبها ... هو عربيته قوايمها باظت و لو حاول يعدلها مش هايعرف يرجعها زي ما كانت ... ربنا ما يوريها لحد أنا صلتها في هياكل أبو رواش و كلفتني 10000 جنيه و اللي اتغير الأتي :
كبوت , أكصدام أمامي , فوانيس أماميه , عظم أكصدام , حرف T (جزء من السدر ) , شبكة أكصدام أماميه , شبكة أكصدام أماميه سفليه ( اللي بين فوانيس الشبوره ) , رادياتير , سربنتينة تكييف , ماسورة تبريد زيت الباور , قميص مروحة التكييف .
اتكلفت 10000 جنيه بالسمكره بالدهان بالمصنعيه ...
و من بعديها و أنا بأمن عند غبور لحد دلوقتي و ريحت دماغي ...
بس والله لولا التوكيل كان زمان العربيه دي بقت خرده ... الحمد لله اللي يشوفها لا يمكن يقول دي عملت حادثتين .. لان باختصار كله اترمي و اتحط مكانه جديد !!!
تحياتي لكم جميعا
عملت حادثتين في حياتي أنيل من بعض وربنا سترها الحمد لله .
1- كنت في السعوديه في طريق هناك معروف جداً وكبير في جده اسمه طريق المدينه كنت ماشي في أمان الله والطريق فتح ومفيش مشاكل استلمت الحاره الشمال استعداداً للتسارع والانطلاق كان قدامي تويوتا لاندكروزو وإذ فجأة الاقي اللي قدامي بيقرب مني او انا بقرب منه مش فاهم اتاريه فرمل مره واحده بس الفوانيس عنده محروقه ....المهم الحمد لله لحقت اقف وكله تمام وإذ فجأه الاقي الدنيا ضلمت وكل اللي معايا في العربيه قاعدين معايا قدام مش عارف ليه المهم بعد ما جمعت ونزلت ملقيتش عربيتنا اساسا لقيت الشنطه داخله في الموتور وتصميم جديد جدا للكورولا موديل 90 اللي خبطني بقى مش عربيه يا جماعه ده وحش من الوحوش عربيه كانت اول مره وآخر مره اشوفها عربيه فورد اكسبلورر حاجه كده من بتوع فيلم المتحولون ....هو عنده الاكصدام الحديد اللي قدام لونه اتغير بس مش اكتر وانا بالسلامه ............
الدروس المستفاده اني ماسقش تاني في الحاره الشمال خصوصاً في البلاد اللي فيها العربيات أرخص من الأكل والشرب وقدر الله وماشاء فعل والحمد لله .
2-الحادثه التانيه دي اللي كانت مأساه لكن الحمد لله ربنا كرمنا كانت بعربيت والدي ميجان عامله 6000 كيلو بأكياسها كنت في طريق 6 اكتوبر الفيوم راجع من 6 اكتوبر وإذ فجأه برضه عربيه جراند شروكي بتقطع الشارع مش فاهم ليه وانا دخلت فيها الحمد لله بسرعتي مالحقتش افرمل ولا اي حاجه ودخلت بعد كده في الخرسانه ووقعت عامود نور بعدين دخلت في كشك حراسه هناك كده حيث ان الحادث كان عند بوابة حي الأشجار والحمد لله الكشك مابقاش كشك ........
الخساير العربيه كلها اتباعت خرده بعد كده واصابات وكدمات بسيطه في الحمد لله وفي الركاب معايا .
الدروس المستفاده : -1- بلاش سكان جمهورية مصر العربيه يعملوا حوادث في البلد حضرتك ممكن تعمل حوادثك خارج حدود اقليم الجمهوريه وبعدين ترجع تاني ...
2-الاسعافات وصلت بعد نص ساعه لكن الحمد لله ماكانش في حاله تستدعي الغريب ان صعب عليهم تقريباً يطخوا المشوار على الفاضي فقالوا لازم ناخد اكتر مصاب فيكم واخدوه والحمد لله .
3-كل الناس كانت بتقوللي امشي خصوصاً ان الطرف الثاني معي في الحادث الشروكي كان انسان في قمة الاحترام واعترف بخطؤه وأبدى كل التعاون بس انا ووالدي قلنا ازاي نمشي يعني من غير محضر ......تعود بقى على شغل البلاد بتاع بره المهم بعد ساعه جه البوكس وعمل المعاينه وأخد رخصي ورخص العربيه التانيه وقال العربيات الاوناش هاتجيبها على القسم واحنا نطلع على هناك ؟؟ يا سيدي يهديك ربنا الساعه 2 بالليل خلاص لا لازم المهم رحنا القسم في 6 اكتوبر تاني لئن دي اقرب نقطه المهم إذ فجأه بقى الاقي اللي مش ممكن عقل يستوعبه ان انا اللي سايق العربيه واللي معايا في العربيه دول اتعرضوا لخطر بسببي وبالتالي لازم تقرير طبي ان اصاباتهم مش عاهات او ممكن يقاضوني ! يا سيدي ده والدي ووالدتي ايه الكلام الغريب ده !! القانون لازم ياخد مجراه . طيب ماشي المشكله التانيه ان حضرتك كسرت عامود نور وده مال عام حضرتك ونيابه المهم بات معانا بقى والصبح تتعرض على النيابه !!!!!!!!!!! المهم والدي لقى ان الدنيا ماشيه بالمقلوب ومش ناويه تتعدل قال نتقلب احنا كمان وامرنا لله وعمل شوية اتصالات والموضوع مشي وروحنا المشكله بقى العامود ..... ده مال عام ومفيش فيه وسايط لازم اروح الجهاز بتاع المدينه 6 اكتوبر وادفع تمن العامود واعمل محضر صلح مع الجهاز تخيلوا عربيتي رايحه في داهيه وخسران كل ده وكمان تمن العامود 3000 جنيه مش ناقصين جنيه ! والحمد لله .
خلاصة الكلام الكتير اللي صدعت حضراتكم بيه ده ان اللي يمشي عدل ويحترم نفسه في البلد دي هيتعب كتييير لكن الله المستعان ونحتسب مصائبنا عند الله سبحانه وتعالى والحمد لله على كل شيء.
آسف على الاطاله.
و الله الواحد لسة عايش بس بستر ربنا
و شايف ان كل الناس اهم درس يستفيدوا منه انهم يحمدوا ربنا علي نعمة الحياه ....
انا علي الرغم من ان سواقتي كويسة بس حوادثي كتير ...بس الحادثة اللي معلقه معايا ...من سنتين ... في صلاح سالم الكوبري اللي قبل عند نادي الجلاء كان فيه اصلاحات و الناس ماشيه ببطء و اول مانزلنا من علي الكوبري كل الناس فتحت المهم انا كنت رايح اقري الفاتحه ( الخطوبه الاولي ) و معايا اختي و والدتي و خالتي و قبل اليوترن اللي عند الكلية الحربية ميكروباص ماشي بعرض الشارع عشان يلف اليوترن و اللي قدامي ضرب فرامل و انا وراه وهووووب بوكس شرطة لزق في عربيتي من ورا ...الشنطه راحت العربية مابقتش هاتش باك بقت من غير باك اساسا و اختي بتعيط و خالتي بتشتم في العسكري و ماما قعده بتسالني كل ثانية انت كويس و انا بصراحة اللي طالع عليا ان انا بضحك ليه مش عارف ..تقريبا عشان الجاتوه اللي كان ورا بهدلنا كلنا و خصوصا انا .... المهم خدت تاكسي و رحت عشان الحق اقري الفاتحة .... طبعا و اضح ليه الخطوبة دي اتفشكلت باينة من اولها
اه من الناحيه القانونيه افاد الظابط اللي راكب البوكس ان انا لو عاوز اعمل محضر العسكري هو اللي هيلبس فطبعا طنشت
أنا لسه يا دوب مطلع رخصة قريب ... فالحمد لله مفيش حوادث تقيلة .... يمكن العربية اتحكت مرة أو مرتين ...
لكن الموقف الي حصل معايا واستفدت منه كتير ... كنت ماشي الساعة 1 الظهر في المنصورة عند مديرية الأمن كده ... الدنيا كانت زحمة جدا ً وكنت راجع من الكلية مخنوق ... المهم أنا ماشي على الشمال لقيت واحد من الي راكنين بيطلع بضهره وقفل الحارة الي أنا ماشي فيها .. رحت ضارب إشارة يمين ودخلت في الحارة الي جنبها ... لقيت واحد تاني طالع من الركنة وقفل الحارة التانية ...
أنا طبعأ ً اتجننت ... رحت مدي العربية التالت ودايس بنزين للآخر ... وهوب ... واحد ابن حلال معدي بالعجلة بالعرض وباصص الناحية التانية ومش في دماغه ... الحمد لله لحقت دست فرامل فيا دوب الراجل نام على الكابوت وعجلته اتنت ومعدتش تنفع ... نزلت قلتله انت كويس يا عم ... طيب شكرا ً ... سلام عليكم
الدروس المستفادة :-
1- دايما ً خد بالك من الي سايقين عجل وموتسيكلات ... بيبقوا ماشيين سكرانين ..
2- خليك كول دايما ً مهما الناس اتغابت عليك
"و في اجزاء من الثانية انطلق صوت في وداني كنت طبعا مميزه لانه صوت والدي هوب ...هوب ...هوب.. و ابص قدامي الاقي واحد نايم على الكبوت على ضهره..... مسكت فرامل قمت نطرته بس نزل على رجليه لاني كنت ماشي بالرحة و لقيته بدأ يزعق لقيتني انا ووالدي بنزعق فيه و بنقوله انت اللي غلطان ازاي تعدي من غير ما تبص على الطريق " وهو كان فعلا غلطان و عدى من غير ما يبص و ماشي بضهره كمان" الراجل لقانا هانكلوا قام قال حصل خير و مشي و انا مشيت يجي 20 متر و ركنت على جنب مش قادر اخد نفسي من الخضة و النرفزة و اعصابي سايبة و بقول لوالدي ما نبهتنيش قبل ما اخبطه ليه قالي منا قعدت اقولك هوب.....هوب.....هوب
ومن ساعتها بعد اي موقف يحصلي و انا سايق ومعايا حد فيهم يقعد يقولي هوب... هوب.... هوب.... و نقعد نضحك :D:D"
هوب هوب هاهاهاهاهاهاهاهاهاهاهاه
هيلا هوووب
اللانوس و السيتي معملتش بيهم اى حوداث الحمد لله
السيراتو عملت بيها حادثة واحدة و كنت ماشية على الشمال في شارع ضيق براحة اوى فجأة عربية جنبي على يميني كسرت عليه من غير لا اشارة ولا اى حاجة عشان عاوز يدخل في الشارع الى على شمالى طبعا نزلت لقيته حد غلبان و سنه صغير طبعا لا هيقولي اصلحها و لا بتاع قلت اخد حقي منه زعيق بقا
الخسائر الفانوس اتكسر من جوه !! و اتزق لجوه كدة كمان الاكصدام دخل لجوة و اتفك من مكانه و لحد دلوقتى مصلحتوش عشان موش عاوزة اروح عند حد وحدي عشان ميضحكش عليا:k41:
الدروس المستفادة
مش لاقية بصراحة درس مستفاد لان انا معملتش حاجة انا ماشية فى حالى :(
بس الحمد لله :)
السيريون مرتين .. مرة واحد قدامي وقف فجأة في مدينة نصر قمت خابط فيه لأن الشارع كان زحمة و المسافات قليلة .. و نزل يزعق برضه .. المهم الخساير الإكصدام دخل لجوة و رديته بإيدي يادوب فاضل شوية خدوش
المرة التانية سواق تاكسي جاتله غيبوبة سكر و هوا سايق في شارعنا قام داخل في العربية و هي واقفة و مركونة و متغطية .. الخساير نفس بتاعة الأولانية بس الناحية التانية يعني الإكصدام إتشلفط من الناحيتين خدوش
الدروس المستفادة : نحكم عقلنا .. نهاجر كلنا .
انا كنت ماشي مره فشارع عباس العقاد لاقيت اللي ورايا عربيه نص نقلالدروس المستفاده :
و السواق هاتك يا كلاكسات متعرفش ايه السبب الشارع اساسا شبه واقف
المهم انا قولت حاجه من اتنين يا اما سواق النص نقل شايف حاجه فعربيتي وعايز ينبهني وبسرعه يا اما هو من نوعيه سواقين الكارو اللي ركبوا عربيات وايده ع الكلاكس وبس
المهم انا اتصرف ازاي وسعتله يخش جنبي بعربيته وهو شغال كلاكس مبطلش قولت مبدهاش كده فيه حاجه هو شايفها ف عربيتي و عايز ينبهني
بصيتله عشان اعرف فيه ايه او بيضرب كلاكس ليه
لاقيت الشارع وقف و انا لابس ف اللي قصادي
وهو شغال برضه كلاكسات وماشي مالوش دعوه
الحمد لله كنت ماشي على سرعه بطيئه اصلا والخساير بسيطه
اني عرفت ان سواق النص نقل مكانش سواق كارو لا كان هو اكيد الي بيجر الكارو وللاسف بقابل منهم كتير و بقيت عارفهم كل ما الاقي حد عمال يشتغل كلاكسات ولا اعبره و لو عايز يعدي مبعديهوش