اقتباس المشاركة الأصلية كتبت بواسطة yoyoand3s مشاهدة المشاركة
مساء الخير كل الاعضاء
عندي مشكلة محتار فيها
مشكلة مع لمبة التشيك بتنور اول لما اشيل رجلي من علي دواسة البنزين
يعني ابقي ماشي علي سرعة 100 لمدة طويلة عادي بس اول ما اشيل رجلي من علي دواسة البنزين الاقي لمبة التشيك نورت
بعدها لما اكمل مشي بالعربية تبدأ تقطع يعني ابقي دايس علي البنزين و العربية ماشيه عادي خالص و فجأة كاني مش دايس علي الدواسة ( يعني العربية تبدأ تهدي السرعة و ال ار بي ام يقل) بعد 10 ثواني ترجع العربية تزود سرعة عادي كأن مفيش حاجة حصلت
كشفت علي العربية بالكمبيوترلقيت في حساس حرارة الهواء intake air temp.sensor
بس انا لا اعتقد ان هو ده سبب المشكلة
ايه رأيكم
نسيت اقولكم العربية دايهاتسو تيريوس 99

-الأعراض اللي إنت حكيت عنها ، بالإضافة إلى حدوث "دق" knocking وكمان إستهلاك بنزين عالي ، ولمبة ال check engine .. ده بيؤكد ان في مشكلة في ال MAF sensor
-وطالما انك كشفت عليها بالكمبيوتر .. يبقى انت كده تمام.

....توضيح:
-ال MAF sensor ده قطعة واحدة لكنه عبارة عن جزئين: (أو أقصد جواه في مسار الهوا هتلاقي سلكين رفيعين)
1-ال MAF وده إختصار Mass Air Flowmeter وهو hot wire بيقيس سرعة الهوا ويديها لل ECU فتقدر تعرف كمية الهوا اللي عدت.
2-ال IAT وده إختصار Intake Air Temperature sensor وده بيقيس درجة حرارة الهوا اللي عدى ،وكمان قرايته بتساعد في تحديد كمية الهواء
وبناءا عليهما يتم تحديد كمية البنزين المناسبة لإتمام عملية الحريق.

.... لو من التوكيل: طبعا هقولك : حساس الماف محتاج تغيير.
لكن لو انت بتحب تشتغل مع نفسك ، أو أفضل عند الميكانيكي بتاعك : فرأيي إنك تفكه وتنضفه لكن take care محتاج تنضيف بحرص.
- هتلاقي السلكتين إياهم عليهم كم كبير من الأوساخ( التراب لازق عليهم) فتزيل التراب ده من عليهم.
-والكلام ده بإحدى طريقتين(لو الميكانيكي تبعك نضيف شويتين هتلاقي عنده MAF cleaner بختين يا معلم وسيبه 5 دقايق ينشف) أو (فرشة أسنان قديمة وشوية بنزين وتنضف بررااااااااااااااااااحة).

ملحوظة:
- ممنوع إستخدام WD40 لانه غير متطاير وفيه نسبة زيت .. مفيش يومين وهتلاقيه إتوسخ تاني ولملك تراب كتير جدا.
- ياريت متستناش كتير عالموضوع ده .. عشان شوية والعربية هتعطل يا معلم .. وتقول ياريتني(ملكش حجة .. مش لمبة التشيك نورت) وبعدين ممكن تعطل بليل في حتة مقطوعة وفي الزمن اللي إحنا فيه ده..... ربنا يستر علينا.

وأخيرا: في أغلب العربيات لو الMAF قطع منك خالص : لمبة الcheck بتفضل منورة علطول. وتلاقي ال RPM بتاع الموتور مبيزيدش عن 2400 لكن الموتور بيظل شغال ولكن في ال" Fail safe ".
(حاجة كده شبه الsafe mode بتاع الويندوز لو ضرب)

والله أعلم.