لحظة من فضلك ! بخصوص حملة اشترى المصرى

**Tarek218** · 15-12-2011 07:57 PM

[img3]https://fbcdn-sphotos-a.akamaihd.net/hphotos-ak-ash4/383810_213222412091590_129506190463213_536664_1654 014318_n.jpg[/img3]

وجهة نظر

انا مش هافرح بحملة اشتري مصرى اللي هتزود مكاسب رجال أعمال إللى أصلا مش بيدوا للعمال حقوقهم

.. أنا باشتري مصري بطريقتي اللي أنا مقتنع بيها ...
اركن عربيتي و اركب تاكسي .. أكل فريسكا ، درة مشوي أو بطاطا من بياع سريح عالكورنيش هيروح لعيلته بالفلوس ... اشتري كل الخضار و الفاكهة من حد واقف في الشارع مش من السوبر ماركت ..

لو هتجيب هدايا لزمايلك أو لصحابك او لحد بتحبه .. انزل خان الخليلي و اشتري نحاس أو ازاز معشق معمول في الخان مش حاجات صيني

.. جرب تلبس جزمة معمولة في مصر ..
جرب مرة تشرب عرقسوس من الشارع ( سمي و اتكل على الله مش هتموت .. كانوا ال 50 مليون ماتوا) ..
افطر مرة من على عربية فول .. و اسمع الراجل اللي على العربية و هو بيدعيلك بصباح نادي و زي الورد ...

اشتري باكو منديل من واد غلبان في اشارة مرور .. حتى لو شكله مش عاجبك ما تبقاش انت و الناس عليه ....
الفلوس إللى بتدفعها بتروح فعلا للناس إللى قامت عشانهم الثوره
بتروح مباشرة للغلابه ...

دول وزيهم كتير هما إللى يستحقو المساعده ....
مش رجال الاعمال إللى اصلا معاهم ميارات من البلد ...

ومفكروش يعملو حاجه بجد للبلد ... مصانعهم معموله عشان هما يكسبو وبس ميعرفوش حاجه تانيه وده إحدى اسباب الغلاء إللى حارق البلد .... محدش فيهم حاول يعمل مشروع قومى يساعد الاقتصاد المصرى بجد ... ويرخص الاسعار بجد

لو عايز فعلا تساعد مصر .... ساعد العامل الشقيان... ساعد البياع الغلبان... ساعد بتاع المناديل ... ساعد المنتجات المصريه الصغيره ... وساعد وساعد ... ساعد المحتاج المساعده فعلا .... ومتديش صدقه لحد مبيبعش حاجه ... ساعد إللى بيكافح بجد

متساعدش إللى خلو كيلو اللحمه ب 70 جنيه
متساعدش إللى خلو كيلو اللبن ب 7 فى علبه
متساعدش إللى خلو متر سلك الكهربا ب 8 جنيه
متساعدش إللى خلو السندوتش ب 30 جنيه
متساعدش إللى خلو متر السيراميك 100 جنيه
متساعدش إللى خلو كيس المكرونه ب 5 جنيه
متساعدش متساعدش متساعدش ... كتير اوى اوى

ممكن تكون الاسعار دى تافهه بالنسبالك ... لكن 60 % من الشعب المصرى ميعرفش يشتريها .... وعشان كدا الاقتصاد المصرى خارب لأنه غالى جدا وفئه قليله هى إللى قادره عليه

دا بسبب رجال الاعمال اللى عمالين يدفعو ملاين من ارباحهم المهوله على حملات إعلانيه ويلمو فلوسها من الشعب

وسايبين الغلابه مش لاقين ياكلو ولا يسكنو ولا يتعلمو ولا قادرين على مصريف حاجه ... بيتمنو الموت عشان يوفرو لقمه لإخواتهم... والاسعار بتزيد عليهم يوم ورا التانى

عايز تساعد .... ساعد الصناعات الصغيره بجد .. ولو تعرف شغل اى حد ... خلى فلوسك رايحه للى فعلا محتاج ... ومتخليش رجال الاعمال يضحكو عليك

اما الاقتصاد المصرى عالميا ... فلا يستطيع احد إصلاحه إلا الحكومه
بوضع حد اعلى للأجور وتخفيض الجمارك والضرائب على المواد الخام الغير موجوده فى مصر ... والماكينات والصناعات الثقيله إلى ان توجد هذه الصناعه مره اخرى حتى يستطيعو إدخال مواد خام رخيصه وتصنيع منتجات مصريه تنافسيه حقيقيه
تساعد على زياده وتنوع المصانع والمنتجات
ومن ثم خفض الاسعار وزياده الجوده

الموضوع مش إختراع ... لكن إحنا بيتنصب علينا

**Ghamrawy** · 15-12-2011 08:06 PM

انا معاك بصراحة
احييك
بس التعميم صعب

**eshoo** · 15-12-2011 08:25 PM

وجهة نظر تستحق الاحترام والتقدير

**medododo** · 15-12-2011 08:41 PM

فكرة محترمة أحييييييك

**Ayoob** · 15-12-2011 09:32 PM

اشتري المصري يجب ان لا تكون بالحملات ولا الشعارات و لكن على المنتجين الاهتمام اولا بالجودة 0 ثانيا بالمنافسة السعرية ثم ثالثا بخدمة ما بعد البيع للسلع المعمرة والسيارات
بالنسبة للجودة للأسف معظم السلع المحلية تفتقد هذا العامل الحاسم في المنافسة فحدث ولا حرج على عيوب الانتاج التي تصادفها عند اقتناء المنتج المحلي من سوء الشكل او استخدام مكونات رديئة او عيوب صناعة أنا شخصيا كان لي تجارب مريرة مع بعض المنتجات المحلية (سيارة كيا سيفيا موديل 2000 اشتريتها زيرو وغيرت الردياتير بعد 3000 كم استخدام لانه صناعة محلية ثم غيرت الشكمان لنفس السبب وبعد ذلك عيوب في السنتر والإنذار وتغيير الكاوتش النسر - ثم بعتها و اشتريت ياباني و ريحت دماغي- غسالة زانوسي كثيرة الأعطال- ثلاجة فيلبس محلي اداء سيئ وصدا في بعض الأجزاء ....... غسالة اطباق فرش كل شهرين او ثلاثة تعطل)

ثانيا المنافسة السعرية : للأسف الفرق في السعر بين المصري و الكوري مثلا لم يعد كبيرا مع الفارق في الجودة - مثلا السامسونج و ال جي في الأجهزة المنزلية اسعاراها اصبحت معقولة مقارنة لجودتها

ثالثا خدمة ما بعد البيع للأسف مراكز صيانة تعتمد على الفهلوة ( (لا اريد استخدام لفظ اخر) - فنيين غير مدربين - ضمان صوري - مبالغة في الأسعار

الخلاصة حتى نشجع المنتج المحلي يجب ان تتبدل ثقافة المنتجين ويجب ان يتأكدوا ان جودة المنتج هي العامل الحاسم الذي يضمن لهم المنافسة و الاستمرار في الانتاج
.

**Ahmed_Rahem** · 15-12-2011 09:44 PM

مشكلة مصر الابدية تتلخص فى نقطين، الاولى اهدار الموارد (بما فيها استخدام مواد اكثر من الحاجة، عدم وجود رقابة للجودة وبالتالى استخدام مواد رديئة وبالتالى زيادة المترجع والراكد) ثانياً اهمال الصيانة
اكبر مثال رصف الطرق فى مصر، اسواء مواد واستخدام بدون وجود مراجعة للجودة، سؤ استلام من الاحياء، واخيرا عدم وجود صيانة دورية (الطريق مش بس اسفلت دة كمان رسم الحارات والرصيف والانارة الزرع ...الخ)
طب دة سببة راجع للمستهلك - خلال فترة الستينات واوائل السبعينات كان السوق كلة ماشى اشتراكى بمعنى لا يوجد منافسة وبالتالى المنتج الموجود هو المتاح ومفيش فرصة كبيرة للاختيار وبالتالى ثقافة المستهلك استخدام الموجود وخلاص، لو الثقافة دى اتغيير والمصنع والمنتج لازم يغيير سياستة.

والسلام ختام