متركنش هنا و الا هقطعلك كاوتش العربية بالمطواة.. عايزين الحكومة تشوف حل للناس ديه
بسم الله الرحمن الرحيم
السلام عليكم و رحمة الله و بركاته
طبعا الناس اكيد هتستغرب من الموضوعات اللي نازلة ترف ع القسم العام مني
بس هنعمل ايه الواحد قرف و زهق في كل مكان خناقة و كل مكان يطلعنا بلطجي شكل يا اما بلطجية شحاتة ياما بلطجية الركنات
كالمعتاد و المشكلة التي نواجهها جميعا الركنة دلوقتي و ما يترتب عليه من خناق قد يوصل للدم
الواحد قبل ما بينزل بيكون بيفكر في الركنة هيركن فين و ازاي
و ده اللي حصل معايا لكن المرة ديه كان هيبقي فيها دم
نزلت و سميت و توكلت ع الله و نازلالمهم عديت من عند الجامعة عند المنشية و افتكرت حاجة عايز اشتريها بسرعة من الجانب الاخر ناحية الحدايق فلازم حاجة من الاتنين يا اروح الحدايق و اتزنق في مصر و السودان ياما اركن عند محطة منشية و اطلع السلم و ارجع قررت اني اركن هناك مجتش ع شوية مشي يعني الواحد ساعات بيمشي من الحديقة الدولية للمطرية
لقيت ركنة فاضية عند بيت قديم مكون من دور و جنبه بقاله صغيرة المهم كان فيه موتسيكل شرطة واقف و عليه امين شرطة و خلاص هيطلع استنيته طلع و ركنت لقيت صاحب البقالة جي بيزعق فيا
متركنش هنا ده باب رزق و بيزعق انا ببصله بذهول و انا اساسا طول اليوم برة و مش شايف قدامي و بتكلم بالعافية
بقوله و ايه المشكلة لقيته برده بيزعق
هو ايه المشكلة ده باب رزق
بقوله يا حج ربنا اللي بيرزق محدش بياخد رزق حد
الاقي الرد
يلعن ابو الرزق لأبو .........
غير باقي الشتيمة ( استغفر الله العظيم ) فعلا بني ادم كافر و جي بيمسك فيا
انا قولت استغفر الله العظيم
فيه ايه يا حج كل ده عشان 10 دقايق ركنة طب كلمني كويس الأول زي ما بكلمك
كل ده و انا مش قادر اتكلم اساسا انا اكاد اكون بزحف من التعب طول اليوم
و الراجل برده بيزعق حتي مش فاكر و لا فاهم نص الكلام اللي بيقوله
المهم اخر الكلام اللي فهمته بيقولي متركنش هنا انا مش عايزك تركن قدام بيتي
قولتله لأ هركن ده طريق عام
يقولي يبقي هقطعلك كاوتش عربيتك بالمطواة
اول ما قال الرد ده انا كأن الحياة كلها دبت فيا و كل الناس اتلمت لما سمعت ان فيها مطواة
قولتله طب وريني هتعمل ايه و انا واقف اهو
و زي مقولت في نفس الوقت كل الشارع جيه يجري و الناس اتلمت و الدنيا وقفت لا يقل عن 30 نفر اتلموا و هو داخل يجيب المطواة و الناس حايشني عنه و كنت خلاص رايح اضربه مع ان الراجل مفيهوش بونية واحدة اساسا
و بقوله وريني هتعمل ايه
و الناس اللي حاوليه والمحلات عمالين يتحايلوا عليا امشي و اسيبه
و الشباب اللي في المنطقة بيبوسوا راسي و بيقولي عشان خاطرنا امشي و عشان خاطر الناس اللي معاك مشيهم هم بس
و كله شايف ان الراجل غلطان و عمال داخل فيا شمال و انا كنت بكلمه باحترام
بقولهم انا اساسا مش عايز اكلمه عشان راجل كبيير و مش عايز ازعله
و هو برده واخداه الجلالة و عمال يزعق و بيتلكك عشان يمسك فيا و انا مستنيه يمسك بس هدومي عشان اديله الطريحة التمام في خلقته و فضلنا في زهيق و خناق و الناس تحوشنا من بعض
لا يقل عن 10 ماسكيني حايشني عنه غير اللي ماسكينه غير اللي واقفين في النص
المشكلة كلها ان يكون معاك ناس خايف يحصلهم حاجة و تكون مستعجل
انا بصراحة كنت ناويله ع نية سودا لو كان عمل حاجة للعربية او فكر يمسك هدومي بس
انا مش عارف الناس اتجننت و لا ايه من بعد الثورة و كله فاتح صدره و محدش هامه حاجة كل واحد ماسكله قرن غزال و لا حتة سلاح و عامل نفسه دكر و هو ميسواش سحتوت مصدي
اعتقد الموضوع ده كتير مننا او كلنا مرينا بيه بسبب الركنة برده سواء اقل من كده او انتهت بمصيبة
عايزين حل يريحنا حل يخلصنا من الاشكال ديه
نفسي حد من الحكومة يطلع يقول ان اي شخص يركن في اي مكان صالح للركن و اللي يعترض يتبلغ عنه في ساعتها عشان الناس تتلم و يبطلوا قلة ادب
و في نفس الوقت تنزل حملات تشيل كل الاعمدة الحديد اللي بقت مالية الشوارع و الحجارة ..الخ...ألخ
يا جماعة ده الواحد لما يجي ضيف و يركن مكانه ويبات كمان باليومين بيكبر دماغه و يقول معلش ده ضيف و هيمشي مع ان العربية اتبهدلت من الركنة خارج الركنة المعتادة تخبيط و تكحيت
عايزين حل
نداء الي الحكومة عايزين حل
عايزين الحكومة تربي الاشكال ديه و ان مفيش حاجة اسمها ده مكاني او ده قدام محلي فيه حاجة اسمها ده طريق عام و من حق الجميع يركنوا طالما الركنة مش ممنوعة
