س: لو معايا كوسة, امتى اخليه يظبط عشان اروح مكان كويس؟
ج: يعني انت يستحسن تظبط قبل ما ينتهي مركز التدريب باسبوعين كده
عرض للطباعة
س: لو معايا كوسة, امتى اخليه يظبط عشان اروح مكان كويس؟
ج: يعني انت يستحسن تظبط قبل ما ينتهي مركز التدريب باسبوعين كده
س: لو انا معرفش المكان الي هترحل ليه, اعمل ايه؟
ج: ما تقلقش, قبل الاسبوع الي بيترحل فيه العساكر, بتوصل فاكسات لكل مراكز التدريب على مستوى الدولة بكشوفات للعساكر و القوة الاساسية الي هيترحلو ليها, مركز التدريب الي انت فيه مسئول انه يئولك انت رايح فين, ممكن يئولوها على المنصة في الطوابير, يعني طابور الصبح يتغلي فيه اي نشاط, و يبدأ شاويش بانه يقول اسماء كل العساكر بمركز التدريب و القوة الاساسية بتاعتهم, لو ما سمعتش اسمك, بعد ما الطابور ما يخلص, على بالليل كده, تروح للشاويش ده لما الجو يروء و تسأله
س: ممكن تحصل و ماخدش اجازة تأييف و اترحل على طول؟
ج: ممكن اه لو حصل و جه قبل انتهاء فترة مركز التدريب و جت دفعة مستجدين, الاجازة تتلغي و مركز التدريب يستمر اسبوع اضافي و الاسبوع الي بعده يبتدي يجي المندوبين علشان ياخدو العساكر بتوعهم
س: بعد انتهاء فترة مركز التدريب ايه اللي بيحصل؟
ج: هتاخد اجازة تأييف لمدة اسبوع, بعديها ترجع مركز التدريب تفضل مستني لحد ما يجيلك المندوب عشان تترحل الى القوة الاساسية بتاعتك
س: اتعامل ازاي مع طابور الكفار او طابور التعليم الاولي ده؟
ج:
انت لو فعلا مش قادر على طابور الكفار, تشوف كوسة تظبط لك الدكتور بتاع الوحدة عشان يديك راحة من الطوابير, بعد ما تاخد الراحة تروح لشاويش السريعة او المساعد و توريله الورقة و تخلي الدكتور كل شوية يجددلك الراحة, ساعتها شوية شوية هتلاقي نفسك مش بتحضر غير طابور الصبح.
بس خلي بالك, لما يكون في ظابط غتت ممكن يعمل جمع لكل العساكر في طابور التمام, فلازم تحضره, انت هتلاقي المساعد بعت عسكري للعنبر يجيب كل الناس النايمة الي سايبهم علشان الظابط يتمم, بس مش بتحصل كتير, ايام الترحيل للقوة الاساسية بتحصل شبه كل يوم.
س: هو لازم اغسل هدومي و انا في مركز التدريب؟
ج: اساسي, خصوصا بتوع دفعة العبيد او دفعة 7, علشان ريحة اللبس بتبئا وحشة من العرق و لازم تتغسل, و انت معاك 2 افارول, يعني تلبسهم يوم و يوم, واحد يبئا مغسول و التاني يتلبس, اليوم يخلص, الي كنت لابسه تقلعه و تنقعه في اي تشط او جردل و تنشره لحد الصبح, و الي كان مغسول و نشف تلبسه صباح اليوم الي بعده, اهم حاجة ما تسبش حاجة منشورة بعيد عن عينك, علشان هيتسرق
س: في نصايح كده اعمل حسابي فيها لما اروح مركز التدريب؟
ج:
في كتير, يعني مثلا:
- ما تديش فلوسك لحد, اي حد يطلب منك اعمل اي فيلم عشان ما يجيش تاني
- لو شكلك مدي على طيب و الناس بيحاول يتريئو عليك ابتدي اتخانق مع الكل لحد ما يعرفو انك مش طيب بعد كده ابتدي هزر عادي
- اكتب اسمك على كل حاجاتك علشان لو حد سرق حاجة من مهماتك, تعرف ترجعها, زي البطاطين و كيس المخدة او الملاية
- احلق دقنك كل يومين, لو دقنك بتطول بسرعة, احلقها كل يوم بالليل و حط بعدها كريم الحلاقة علشان يخليك دقنك منعشة و ما تتعورش مع كل حلاقة
- لما صول او شاويش يزعئلك, ما تردش عليه, قول تمام يا فندم و حاضر و نعم, لو شتم, قل له بكل ادب و باحترام, لو سمحت يا فندم ما تشتمش, لو ضربك روح اشتكي لقائد مندوب, لو عندك كوسة بهدل امه
- هات معاك ساعة علشان تكون مظبوط في كل حاجة, و تكون بلاستيك مش نحاس علشان العين ماتجيش عليك, يعني ساعة رقمية رياضية كده
- لما تكون في اي طابور حاول تكون في العامود الي في النص و الصف الي في النص, يعني في نص الفصيلة
- لما تنزل اجازة في وسط مركز التدريب, ده لو عندك كوسة, ما تسبش الملاية و المخدة بره, حطهم جوة الدولاب
س: ما هو اليوم العادي في مركز التدريب؟
ج:
اي يوم في مركز التدريب من المعتاد انه يكون كالآتي:
- تصحى الساعة 4 و نص
- الساعة 5 تروح تفطر في الميس
- الساعة 6 صفارة الاستعداد لطابور الصبح
- 6 و نص تنزل الطابور ادام مساعد السرية "الشاويش الي ماسك السرية"
- 7 تخش ارض الطابور
- صفا و انتباه و تعليمات اثناء الطابور
- كل المخالفات في اليوم الي قبله يتنووه عليها في طابور الصبح
- هيجي عسكري كل يوم يقول المعنوي, آية, حديث نبوي, و خبر من جريدة القوات المسلحة آخر عدد
- بيطلع شاويش وراه الاوامر, و الاوامر هي اسم القائد منوب و الظباط النبطشيات
- بعد ما يخلصو, هتقول حاجة اسمها نشيد الجيش, مع الايام هتحفظو
- بعد كده هتبتدي تجهز التشكيلات عشان تبتدي تمارين اللياقة, هتجروا حوالين ارض الطابور, تعملوا شوية تمارين و بخ على الساعة 9, هتروح العنبر تريح شوية
- الساعة 9 و نص تنزل للطابور التاني و هو طابور التعليم الاولي, او اسمه طابور الكفار زي ما بنسميه, الطابور ده بيعض 4 ساعات في الشمس, يعني فيه وقفة كتير و صفا و انتباه, و الحدث الي فيه ان الشاويش بتاعك هيجي يعلمكو شوية حاجات عسكرية, مرة ازاي تفك السلاح, مرة يقولك ازاي تمشي الخطوة العسكرية, يعني طابور تعليم اولي بيبئا كده كل مرة.
- تيجي الساعة 2, تبتدي تجهز التشكيلات علشان يدور الطابور على الميس للغداء
- تخلص الغداء تروح العنبر تموت شوية من التعب على السرير كده
- الساعة 4 و نص تنزل طابور الهتاف, يجمعكو الشاويش
- الساعة 5 تخش ارض الطابور, الطابور ده ابسط طابور, هتقف لحد الساعة 5 و نص او 6 بالكتير, صفا و انتباه و شوية تعليمات بعد كده تحيو العلم و تمشو.
- الساعة 7 العشاء, في الاول لازم تروح بعد كده هتعرف السكة و مش هتروح, ملوش لازمة, هتلاقي نفسك بتروح الكانتين و هتتعود على الاكل بتاعهم
- بعد العشا لحد الساعة 10 هتعض فاضي, في ناس بتنام, في ناس بتئرا حاجة, في ناس بتعض تلعب مع بعضها, ناس تانية يطلعو السجاير و يدخنو و يتكلمو ف اي حاجة, يعني الحياة بتبئا كول بعد الساعة 6, بعد اسبوع هتبتدي تحفظ اسماء صحابك الجداد.
- الساعة 10 النور يطفي, لازم راسك تكون على المخدة, و تنام عشان تصحى ليوم جديد.
س: اول يوم في مركز التدريب - بدون تعيين - عامل ازاي؟
ج:
بدون تعيين يعني مفيش أكل هتاخده, هتعرف مكان الكانتين اليوم ده على طول, بس ممكن تصعبو عليهم و يدخلوكو الميس, الميس هو محل آكل الجنود.
المهم اليوم بيبدأ ازاي, انت بتروح المكان الي هيئولولك عليه لما تسمع سلاحك, هتيجي المكان ده الصبح, هتستنى شوية, بس شوية كتير يعني زي ما اتعودت منهم, هيجي الاول ظابط, و الظابط رتبة رفيعة اودام الجنود, هيبتدي يدي محاضرة على الواقف الجيش عامل ازاي, و هيقولك ان اهم حاجة تلاتة: شرفك, مهماتك, فلوسك, و المهمات هي المخلة او شنطة الهدوم العسكرية بتاعتك.
هيخلص من الكلام, هيقولك روحو اشترو شنطة و يشاور على كانتين وراكم كده هيكون فيه مستلزمات هتحتاجها جوة مركز التدريب, بالذات المعالق و الاقفال, في الاقفال بالذات اوعى تقرب من القفل الي لونه رمادي, لان ده القفل الصيني, القفل ده مفاتيحه بتفتح على بعضها, فخلي بالك و خليك ناصح و اشتري القفل الذهبي, او انزل رمسيس و اسئل عن القفل الكمبيوتر, معروف و حلو و قوي.
في عسكري هيجي يبتدي ينادي على الاسامي, و كل واحد يقول آفندم او ايوة يديله الكارنيه العسكري بتاعه, عليه تاريخ الاصدار و ينتهي في, و دي تواريخ مش كله زي بعضه, انت ممكن تكون سنة في غيرك سنتين تلاتة, المهم الكارنيه ده بتاعك و اوعى يضيع منك لحد ما يخلص جيشك, هات محفظة فيها سوستة, هتساعدك.
- بعديها بربع ساعة او نص, هيجي المندوب بتاعك, هينادي على الاسامي و يقول اسمك و يقول انت هتروح مركز التدريب الفلاني
- ربع ساعة او نص ساعة كمان و هتبتدو تشكلو طابور حسب مركز التدريب و عليه هتتشكل اول طابور الزامي في جيشك علشان تركب المركبات العسكرية "الاتوفيس المعفن" الي مفتوح من كل حتة, تحس انه كان طيارة قبل كده و قلب اتوبيس لدواعي امنية او هو طيارة بس عامل عبيط, جيش بئا.
- هتركب الاتوبيس, ابئا هات معاك آكل للرحلة دي, اي سوايل او عصاير, عشان الطريق ممكن يكون طويل, حسب مركز التدريب يعني.
- هتوصل مركز التدريب, هتنزل و تتشكل طابور, المندوب هيدخل و هتدخلو وراه و تبتدو تدخلو المركز و هتعضوا على الارض تحت المظلة
- هييجي بتاع الآمن و يقولكو "الي معاه موبايل يطلعو بالزوء, الي معاه شريحة يقول, علشان الي مخبيه هنكسر الموبايل بتاعه اودام عينه", في ناس كتير هتجيب ورا و تطلع الموبايل, انت اعمل زكي و ما تجبهوش معاك اصلا, بس الي تجيبه هو شريحة خط, و تكون شاحنه بـ 100 جنيه, عشان لما تدخل جوة هتلاقي ناس مهربة موبايلات, شوية شوية هتلائي نفسك بتئولهم انك عايز تعمل مكالمة, فا مش هتحرج لان الشريحة معاك و الرصيد يا هندسة
- المهم عسكرية الآمن هيقولك ايه, انكو هتخشو على مكتب الامن و الاجهزة هتشوف كل حاجة معاك و هيحسسك انك مسافر ابوظبي, و في الاخر هتطلع مفرزة الامن دي انهم بيفتشوك بايديهم عادي جدا, يعني ما تخافش اوي, هما بس بيتكلمو كتير عشان يخضوك و تترعب, اصله اول يوم ليك في الجيش دنتا لقطة, بس خليك كووول و هادي و كويس انك ئريت الكلام ده عشان تبئا انت الوحيد الي فاهم وسط الي حواليك.
- بعد ما يخلص تفتيش, الي معاه موبايل و سلمه من الاول هيحطه في ظرف و هتستلمه لما تخلص مركز تدريب و الي طلع موبايل او شريحة و هو بيفتشك هيكسره اودامك
- هتستنو شوية بعد كده هيجيب الحلاق, الي شعره طويل هيحلق له اودامكم, بعد كده كله هيكون جاهز انه يستلم المهمات
- دلوئتي هتروح تستلم مهامتك, هتاخد المخلة و تلم حاجاتك, غيارات بيضة, ملكش دعوة بيها, 2 فوطة, 2 افارول مموه, افارول زيتي صيفي, افارول زيتي شتوي, شورت مموه, تي شيرت عسكري, تي شيرت اخضر, بيادة, كوتشي, جزمة نص "او خمسة خرم", كاب مموه, كاب زيتي, 4 اجواز شرابات زيتي عسكرية, آيش "حزام عسكري", كيس مخدة, ملاية, بيجامة صيفي, بيجامة شتوي, 3 بطاطين.
- هيدور على عنبر فيه مكان فاضي تعضو فيه كلكو و الزيادة تروح عنبر تاني, كل واحد هيدخل هيشوف سرير فاضي فياخده, هتلاقي دولاب على شمالك, تبتدي تطلع الي في الشنطة و المخلة و تبتدي ترتب لو في وقت, لو الساعة جت 10 بالليل, مش هتلحق غير انك تتطلع البيجامة و تلبسها و القفل الذهبي بتاعك علشان تقفل المخلة و تحطها جوة الدولاب و تقفل الدولاب و تنام و ترتاح من اليوم الفظيع ده, و بكده يكون انتهى اطول يوم في العسكرية, عشان بس اول يوم.
س: البس ايه و انا رايح مركز التدريب؟
ج:
اوسخ حاجة عندك لموأخذة, علشان اول يوم بهدلة و ما تجيش بالحتة النايك او الاضديضاس, بس بص:
- لو انت رايح مع دفعة شهر سبعة خفف على اد ما تئدر, بس ما تجيش بالبوكسر بس يعني
- لو انت رايح مع دفعة شهر واحد, البس تئيل, يعني ترينك رياضي كده و كلسون و بوكسر غير الحتة البيضة لمواخذة و فوء تلبس فانلة و فوئيها تي شيرت نوم الي بكوم ده عشان يدفيك لما تنام, لان الدنيا سقع جوة, المهم اللبس الملكي البسه و انت جاي علشان تعدي بيه و تلبسه جوه.