السلام عليكم و رحمة الله و بركاته
من حوالى شهرين كده او اكتر لاحظت ان العربية مش بتجيب سرعة زى الاول بالكتير 60 (العربية 127 مو 83 ) و بعدين لاحظت ان الزيت بينقص ( حوالى 2 او 3 سم فى المقياس ) فرحت للميكانيكى قالى شكلها كده عايزة طقم شنبر و طقم دبرياج
فسالته يتكلف كام ؟؟ قالى فى حدود 500 او 700 جنيه
قعدت بعدها بتاع 3 اسابيع الى حوالى شهر لغاية ما حوشت المبلغ ( اصلى و الحمد لله منن الموظفين فى الارض )
لما رحت له قاللى خلاص حنحل الماتور و نشوف فيه ايه
قلت توكل على الله ( على حسب ما قاللى )
وديتها له يوم الخميس و رحت له الجمعة يقوللى لسه بنحل و قاللى لو حاجة تحت الحساب علشان الخراط و كده فاديت له 300 جنيه
رحت له يوم السبت العصر لقيته حل الماتور و بيقولى الماتور محتاج الاتى
" طقم شنبر و جوان و دبرياج و بستم و صباب و طبب مياه و هلال و كستبان و عمود كرنك و طقم كهربا و طقم اويل سيل ماتور و فلتر زيت و بنزين و طقم تروس و كابينة و 2 قاعدة ماتور فوق و قاعدة ماتور تحتية
ده غير حاجة فى الدينامو ( 2 بلية فيه عايزة تتغير علشان تقيل ) و لسة ما سالتش عليهم
المهم انا تنحت و لقيته مطلع لى فاتورة بسعر الحاجات دى من محل غيار جنبه
كام بقى
ب 1800
ده غير مصنعيته و مصنعية الخراط
المهم بعد ما فقت قلت له ( و ده حصل فعلا ) انى سالت على طقم الدبرياج و الشنبر لقيتهم كانوا اقل من اللى قلت عليه
قعد يقوللى الراجل ده حاجته كويسة و اصلى و يمكن اللى سالت عنده حاجته مش اصلى فعشان كده رخيصة قلت له طب انا حاصبر و اسال على الحاجات دى فى مكان تانى
المهم رحت لواحد عمللى فاتورة ب 1400 و التانى ب 1500
المهم انا بدات اقلق من الميكانيكى و مش عارفة اعمل ايه
ففكرت قلت له اجيب بس دلوقتى الحاجة اللى محتاجها الخراط
فقاللى هاتى طقم البستم مقاس 020 و الهلال 010 و طقم الشنبر و عامود الكرنك و الصباب
المهم انا بسالكم هو كده كلامه صح و لا بيسرح بيا
و بعدين هو لازم اجيب للخراط عامود الكرنك علشان يبدا و لا ممكن فى الاخر اوديه للميكانيكى
و كمان سؤال العمرة دى المفروض تستغرق قد ايه فى الوقت
و يا ترى لازم اقعد على ايده و لا اشوف شغلى و حالى ( خاصة انى ما ليش اجازات )
حد يفيدنى ربنا يكرمكم لحسان انا حاسة انى غرقانة ( و لا حول و لا قوة الا بالله العلى العظيم )
او حتى يدعو لى دعوة من القلب و ربنا يجازيه بمثلها
و اسفة على الاطالة
و ربنا يحفظنا جميعا و يحفظ بلدنا و يصلح الحال