الموضوع: وداعا ايتها السيارة المحترمه

طبعا انا مش عارف ابدأ ازاى بس الجواب باين من عنوانه انا بعت العربيه .... ايوا بعتها و بعد عشرة 3 سنين مع العربيه و اعضاء المنتدى المحترمين اللى افادونى و علمونى كتييير اوى اوى و مكنتش مصدق انى ممكن ييجى اليوم اللى معنتش اسال اسئله و انتظر الردود من حبايبى اعضاء المنتدى بس اللى حصل بقى اخدت القرار مش عارف ازاى ..... ممكن يكون زهقت منها او هى زهقت منى مش عارف بس اللى اعرفو انى جيت فى الفترة الاخيرة و اهملتها و كنت حابب اجيب حاجه اكبر عشان موضوع الشنطه الصغيرة و معنديش استعداد اصرف عليها و العربيه جابت منى موتور فقلت توكل على الله و بيع كدة كفايه عشرة 3 سنين و مصاريف و صنايعيه كفتجيه و الاخر الموتور ودع ...... فكدة كفايه عليها و عليه

مميزات الابيزا عموما للى عايز يشتريها :
1 - عربيه فخمه جدا و ما تتخدعش فى حجمها الصغير العربيه كفاءه جامدة جدا و انا كنت مسميها الزلموكه الصغيرة نسبه الى المرسيدس الزلموكه
2- ثابته جدا فى السرعات و الملفات و صاجها ناشف جدا خاصه الاربع ابواب و القوايم و العتب
3- لو بتدور على عربيه فى رينج ال 30 و الله مش هتلاقى احسن من كدة بس اقلك بقى تجيب القرطبه
4- دورت على عربيات فى نفس الرينج بتاع الفلوس مش لاقى غير تكاتك على مسمى عربيات امثال السويفت و الاكسيل و الفليشيا و الريجاتا مع كامل احترامى لاصحاب السيارات
5- بشهادة واحد صاحبى تاجر سيارات و بيغير كل يوم بس فى الزيرو خدها منى مشوار ورجعها و قالى العربيات دى باشا باشا ازاى اسعارها كدة
6- عفشتها مريحه جدا خاصه فى الاوزان التقيله وصالونها واسع و تشيل العدد كامل و الكل قاعد مستريح مقارنه بردو بعربيات كتيير من نفس الفئه

7- العربيه عاليه عن الارض و الموتور ال 1000 حلو مش وحش و دا فى موديل 98 و 99
و لو هتشترى 94 هاتها بموتورها الاستوك ال 1300 كربراتير و لو 98 هاتها ال 1000 سىسى تضمن انك هتركب عربيه ما اتلعبش فيها و على حالتها
( وجهه نظر شخصيه) مع احترامى للعربيات المسقطه
9- الابيزا عربيه بشوات ما تركبهاش ورا شحات .... يعنى تستنضف عربيه و مش مهم الفلوس زيادة الف او اتنين المهم الحاله العامه للعربيه و اوعى تجيب واحدة مبهدله و تقول هظبطها هتكرهك فى اختراع العربيه من اساسو الا لو اشتغلت مع متخصص و دول كتيير فى الحرفيين

عيوبها....................


1- ملهاش عيوب بارزة غير الشنطه الضيقه نوعا ما و دا فى الهاتش باك كلو يعنى متنفعش عيله مسافرة
2- فريم التابلوة اللى فى النص بيتكسر كل سنتين تقريبا و ثمنو 250 ج و عاوز محافظه
3- العربيه تكنولوجى عالى عايزة دماغ و تكون عندك فكرة مبدئيه عن العربيات و الا هيشتغلوك احلى اشتغاله


و فى النهايه هجيب كوردوبا بردو عشان مش لاقى نفسى فى اى عربيه تانيه و هتعلم من اخطائى السابقه


و الله الموفق

شكر خاص جدا الى مهندس سيد syd و مهندس ايهاب منصور و اللى كنت منتظر مشاركتهم لما لهم من ثقل