الموضوع: بفكر ابيع السيراتو 2009 واشتري هوندا سيفك 2009

طيب انت تعبت من اية عشان نقدر نفيدك

هو عموما فية فرق كبير مابين قيادة السيفيك والسيراتو لصالح السيفيك بجدارة

من ناحية الخامات - الثبات - الهدوء - الراحة - المحرك - الاعتمادية وقلة الاعطال

لكن السيراتو تتفوق على السيفيك فى انها اوسع منها شوية من الخلف فقط وبالتحديد فى نقطة مسافة الارجل وظهر الكرسى الامامى والكلام دة هيكون موجود لو انت طولك يزيد عن 184 سم , غير كدة مش هتحس بالموضوع دة نهائى

السيفيك عفشتها مش ناشفة ومش طرية بس انعم من السيراتو بالتأكيد

المحرك 124 حصان صاروخى واداءة افضل فى الفئة ال vti واحسن من السيراتو بس الطلعة هتحس ان الهوندا ابطىء قليلا عشان بتعتمد على نظام drive by wire ودة عشان يوفر البنزين فى الطلعة لكن بعد كدة بتفتح ومحدش بيوقفها

العربية السرعة القصوى ليها 226 كم

السيارة طبعا مش محتاج حد يقولك على منظرها سواء فى الخارج او الداخل

السيارة مزودة بكل وسائل الامان + ايموبليزر وكل دة متوافر فى اقل فئة

السيارة قطع غيارها متوسط مش غالى ولا رخيص واغلى حاجة بسيطة من السيراتو وبالعكس فى حاجات السيراتو اغلى فيها

السيارة قريبة من الارض بس الكلام دة هتلاحظة مع التحميل

الشنطة واسعة وجميلة وتشيل براحتك

العربية عيبها ان الاكصدام بتاعها بيقع من خبطة حتى لو قوتها مش عالية

حاول تكشف على علبة الدركسيون + البطاحات + الطنابير كويس جدا لان دول اكثر حاجات السيفيك مشهورة بيها فى جيل 2009

استهلاك البنزين داخل المدينة من 180 الى 210 كم فى الصفيحة حسب الزحام وطريقة القيادة , على الطريق السريع بتعمل 320 كم فى الصفيحة وعلى حسب السرعة ايضا بس دة فى سرعة لاتتعدى 130 كم لان بعد كدة انسى الرقم دة

عيب السيارة ان لا يوجد بها كمبيوتر معلومات يوضح المسافة المقطوعة والمتبقى