الموضوع: ارجو المساعدة....كورولا ولا فلوانس وجزاكم الله خيرا

[QUOTE=Hosam_Optrawy;3874007821]مكتوب على موقع رينو الشرق الاوسط الخاص بدول الخليج

ان الموتور من رينو-نيسان وقوته 112 حصان و156 نيوتن , وفتيس اوتوماتيك X-Tronic CVT اعتقد دا برضه مختلف عن فتيس الفلووينس التركى اللى فى مصر اللى هو 4 سرعات فقط

بس مش كاتبين موديل الموتور لكن لما دورت على السامسونج SM3 اللى هى هى الفلوونس اللى فى الخليج لقيت موتورها H4M

والموتور دا تحديدا من رينو مش من نيسان واسمه مختلف عن HR16DE اللى بينزل فى التيدا

وممكن يبقى هو هو باسمين مختلفين والله اعلم
لو سمحت لو ممكن تقولى على نوع الموتور اللى راكب فى الفلوانس المصرى عشان اقارنه باللى راكب هنا

أنا رأيي الشخصي إن الكورولا الجديدة تعتبر نقلة من حيث الكماليات والوسع بالنسبة للأجيال السابقة، ولكن مازلت مصرّا على إنه الياباني في السنين الأخيرة بقى بخيل أوي في تطوير سياراته، خصوصا بالمقارنة بالأوروبي والكوري، يعني مثلا كورولا كانت ممكن تنزل بموتور جديد أشد من اللي عمره 6 سنين ده ( بداية نزوله كانت كورولا 2008 ) ، وخصوصا إن الأوريس نزلت فعلا بموتور جديد 130 حصان، الحاجة التانية - ومازلت بتكلم عن وجهة نظري الشخصية - الشكل الخارجي والداخلي للكورولا الحالية مش عاجبني، يمكن إذا كانوا نزلوا النسخة الأمريكي لينا هنا في كان يبقى أحسن!!
عموما لما أقارن بالفلوينس بقه، ألاقيها عربية جديدة تماما ( أول ظهور ليها كان في 2010 أو 2011 مش فاكر بالظبط )، وبعد ظهورها ب 3 أو 4 سنين تم عمل تغييرات لها هامة جدا، موتور جديد وفتيس جديد وعدادات رقمية جميلة، وأقل تغيير حصل فيها كان التغيير الخارجي ومع ذلك شكل العربية بقى أجمل، وبعدين توكيل رينو هنا في مصر محترمين جدا وفاهمين جدا وسمعتهم ممتازة، ولهم بدائل جيدة كمان إذا ماكانش الواحد عايز يتعامل مع التوكيل، وكمان العربية انتشارها معقول جدا وفي زيادة، وسعرها ماسك نفسه كويس، وماحدش اشتكى منها خالص لحد دلوقتي!
عموما أنا أختار لنفسي فلوينس بدون تردد بس.. من مصر وليس من السعودية، طالما إني عايش في مصر.. والله أعلم.