الموضوع: ما هى اسعار قطع غيار اللانسر الجديدة؟

استاذ سيمون انا معايا شارك مانيوال 2008 و هكلمك عليها بصراحة انا فى الاول كنت برضة زيك كدة عمال اشوف اسعار قطع غيار الشارك و كنت متخيل ان هيكون اسعارها غالية جدا لكن اكتشفت ان الاسعار قريبة جدا من الشكل القديم و دة شجعنى انى افكر انى اجيبها انا جبتها مانيوال علشان ماكانش معايا غير 120 الف و بصراحة كنت هموت علشان اجيب العربية دى حتى لو من غير موتور بس اشتريها المهم جبتها لونها نبيتى و دة اجمد لون عليها دة رايى الشخصى المهم اقولك المميزات و العبوب
المميزات:
1-شكلها ملفت للنظر تحس انة مختلف عن باقى العربيات و لما تشوفها قدامك تتمنى انك تمتلكها
2-موتورها جامد جدا 109 حصان مايفك اقوى من البومة 1600 106 حصان دة غير ان عربيتى مانيوال فالسحب فيها فظيع جدا يعنى انا من تانوع اللى مش بيقرص على الموتور و اخرى ار بى ام 3 و تلاقى العربية سحبها حلو جدا حتى لو العربية فيها خمسة راكبين متحسش ابدا بفرق فى السحب و مجرد انك تضغط على البنزين تلاقى ضهرك مسك فى الكرسى من قوتها
3-و انت سايق العربية دى تحس انك مميز عن كل الناس اللى حواليك من حيث فخامة العربية و شراستها
4-التابلوة شيك جدا و خصوصا شاشة الكمبيوتر الموجودة فى النص اللى بتقولك حاجات مهمة جدا زى متوسط استهلاك البنزين و كمية البنزين الموجودة تمشيك كام كيلو و يفكرك بمواعيد الصيانة و لما تفتح اى باب يقولك انهى باب مفتوح حتى لو الشنطة و على فكرة الكمبيوتر دة مش موجود فى اى عربية غير العربيات الفخمة بس
5-العربية واسعة جدا من جوة
6-عالية عن الارض عمرها ماتحك فى اى مطب حتى لو خمسة راكبين و دى حاجة مهمة جدا قليل لما تلاقيها فى العربيات الجديدة
7-العربية ثابتة على الاخر عمرها مابتعوم و دة لان مقاس الجنط كبير 16/2050 و دة المقاس الاستندارد اللى بينزل في الفول اسبورت و المانيوال و دة برضة مقاس مش اى عربية بتنزل بية
8-العربية فراملها قوية جدا فيها abs ebd يعنى لما تدوس على الفرامل بتلاقى العربية تقف فى اقل مسافة و تلاقى الكاوتش عمرة ما يتزحلق حتى لو ماشى سريع على فكرة انا عربيتى ضمان الوكيل و العربيات كلها تبع الوكيل فيها abs ebd
9-الباور اللى فى العربية كهرباء حلو جدا لما تيجى تركن و بيقفل لما السرعة تزيد
10-تكييفها حلو جدا عمرك ماتشغلة على اخرة ابدا من قوتة
11-العزل فى العربية حلو جدا يعنى لما تقفل الازاز ماتسمعك اى حاجة و تحس انك منعزل عن الدنيا اللى برة
12-العربية تبع شركة ميتسوبيشى و هى شركة محترمة جدا و العربيات الميتسوبيشى معروف انها معمرة و قليلة الاعطال و قطع غيارها رخيصة مقارنة بالعربيات اليابانية الاخرى و كفاية ان العربية يابانية 100*100
العيوب
1-الشنطة ضيقة علشان الاستبن مقاسة كبير لكن حضرتك ممكن تشترى الاستبن مقاس صغير هيفرق فى حجم الشنطة كتير
2-صوت الموتور عالى شوية بس لانة مايفك موتور جامد جدا و انت سايق العربية تحب صوتة تحس ان العربية هتنطلق و زى ماقلت لحضرتك لما تقفل الازاز متسمعش اى حاجة

دة كان تقييمى لعربيتى الشارك اللى عمرى ماهندم انى اشتريتها و دى كمان اقل فئة فيها و اسف على الاطالة