تم بحمد الله اضافة زيت ليكومولي توب تيك من فتره بس الزيت دلوقتي عامل 3000 كم و تم اضافة الفتيش المانيوال معاه
الانطباع الاول : صوت المكنه هادي عن الاول بطريقه ملحوظه اوي حتي كان بسام حافظ في مره راكب معايا العربيه حس بفرق الزيت و هو قاعد جنبي

بعد المتابعه مع السواقه في مختلف الظروف اتضح الأتي
1. اولا صوت المكنه هادي جدا في السلانسيه حتي لو واقف في حته فاضيه و الساعه 2 -3 بليل و الشارع فاضي مافيهوش غيرك اصلا .... مكنش الموضوع ده موجود زمان
2. الموتور مابقاش في اهتزازات علي ار بي ام عالي 5-5.5 و بتحس ان الار بي ام بيعلي عادي و بينزل عادي ..... زمان كنت لما بعلي الار بي ام تلاقي العداد بيطلع و ينزل جري علي ال1
دلوقتي الوضع مختلف شويه بيطلع و ينزل براحته
3. جيبنا الاولاني بقي و مشينا
العربيه بتنقل و تمشي وانت مش سامع صوت المكنه علي ار بي ام واطي لحد 2-2.5 و لو اوطي من 1 مافيش اي اهتزازات ولا الموتور عايز يبطل لحد الشرطه التانيه اللي بعد الصفر دي
بقيت استخدم الموضوع ده في الطرق المكسره او اللي ماليانه نقر ممكن تفضل ماشي علي النقله الاولي او التاني تريح رجلك علي الفرامل لو لزم الامر و العربيه مش هاتتهز منك ولا ترجرج ولا اي حاجه المكنه هاديه علي الاخر مع العلم ان عندي قاعدة موتور خلفيه من ايام تجربة اضافة البنزين و ليسه ماصلحتهاش
اما بالنسبه للار بي ام العالي بقي مختلف بيعلي بس اللي هو مكتوم مش بيجعر زي زمان
4. اضافة الفتيس بقي علشان دي مهمه
اي مكنه طبيعيه هتجيب ار بي ام عالي بس المشكله المكنه هاتكون حالتها عامله ايه و هيا علي الار بي ام ده في اهتزازات او مافيش هاتزود علي 5 او 6 ولا هاتحس انها هاتجري من تحت ايدك كده يعني و الفتيس جزء لا يتجزأ من المكنه وانت سايق
المهم بقي اتفقنا ان دلوقتي المكنه مرتاحه و هيا علي ار بي ام عالي
الفتيس زمان كان بيكلبش العربيه علي الار بي ام العالي و تحسها بقي وانت بتنقل علي ار بي ام 5.5 للرابع مثلا هتلاقي العربيه بتقفش كده فبتزود بنزين علشان تكمل حرق (انت بتجري و بتجر حد معاك مش عايز يجري) دلوقتي بقي الوضع مختلف حبتين تلاته اربعه انك علي نفس الار بي ام بس مافيش حاجه مكلبشاه فبتدي النقله عادي كانك بالظبط علي ار بي ام واطي 2.5 مثلا
5. نيجي بقي لاهم نقطه و هيا اهتزازات عصايه الفتيييييييس
انا عامل الحمد لله و ماشاء الله 156.450
لحد 152 الف كانت الاهتزازات خفة شويه كتير عن اي عربيه جديد نتيجه للاستخدام و كده فمثلا هانفترض انها في الجديد 100% لما انا وصلت لل152 كانت الاهتزازات 50% بعد الزيت مابقاش في الحمد لله اي اهتزازات تذكر


و أخيرا شوفت بعيني ماحد قالي ان التالت علي 5.2 ار بي ام بيبقي علي 110 كم

6. زيت الباكم دوت 3 في الفرامل و الدبرياج
الفرامل زمان كنت بحس انها محجره سواء في الدوس المفاجئ او انك بتهدي كنت فاكر ان الماستر بتاع الفرمل سواء الماستر العمومي او اللي عند الفرده فيه حاجه بس قولت خاليه للاخر لان الجلد بتاع الماستر لو نشف يعمل العيب ده و هو انك تلاقيك ماسك فرامل بس زي ماتقول مش ماسك كويس فالتيل بيزحلق و مش بيقفش
تم سحب الزيت من مواسير الفرامل في العربيه و اخدت 400 مملي مش عارف ازاي بس ده اللي اتقالي بعد ماقالوا انهم مش بيسحبوه اللي في الماستر العمومي او في العلبه اللي فوق علشان ماتاخدش هوا و الجلد ممكن يضرب
كنا بنفتكر ان العربيه الصبح بتلاقي الفرامل 100% و يتقفش و بعدين توصلنا ان لما الطنابير و التيل تسخن الاداء بيقل مع ان الواحد مافكرش بنظره اضيق شويه مش يمكن الزيت هو اللي بيسخن فأدائه بيقل و ده اللي حصل فعلا
الفرامل بقيت من اول مابركب العربيه الصبح لحد بليل و هيا هيا نفس القفشه مع اختلاف بسيط اوي عن الصبح (سخونه الطنابير و التيل)
كذلك الدبرياج معروف بالنسبالي في عربيتي مش عارف الموضوع ده موجود عند حد تاني ولا لأ ان اول نقله في الصني دايما بتيجي غلط و بالخصوص في المارشدير دلوقتي بعد تغيير الزيت الوضح اختلف شويه و بقيت تنقل عادي و بالذات في المارشدير

ارجوا اني اكون افدة زي ماستفدت من المنتدي العظيييييييييم ده