الموضوع: ازاي تتصرف لو قابلك بلطجي

اقولكوا تجربتي ( هي كانت قبل الثورة بفترة ) سنة 99 او 2000
أنا أعتبرتها رسالة من عند ربنا و هشرح في الأخر ليه ؟؟


في الفترة دي كنت بلبس سلسلة دهب تخينة شوية ( الحمد لله ربنا تاب عليا )
نزلت من البيت حوالي الساعة 3 بالليل كنت عايز أكل شاورمة
لقيت واحد شكله مش عاطفي قاعد على عربية ( في اول فيصل عند جامع حمد )
بيقولي خد يا كابتن
محطتش في دماغي و مشيت
زعق و قالي مش بقولك خد
أنا : عايز ايه
البلطجي : تعالى هنا و انا اقولك
أنا : لاء تعالى أنت مش انت الي عايزني
راح نازل من العربية و جي
تخيلوا بيطلب كام
5 جنيه !!!!!!!!!!!!
أنا : ليه
البلطجي : اصلي لسة خارج من الحجز و جعان و لعلمك انا ممكن ادخله تاني
ما رضيش اديله طبعاً
راح حاطت ايده على كتفي و عايز يدخل بيا في شارع المساكن
قولتله هو الراجل مش بيبقى راجل في كل حته شوف انت عايز تعمل ايه و اعمله هنا
راح مطلعلي أيد سيف كان مخبيها في البنطلون علشان يهددني يعني
المهم انا ضحكت و قولته انا معايا بس ماليش مزاج اديك فلوس
راح متغير معايا في الكلام
انت اسمك ايه يا صاحبي و منين و مش عارف ايه
و راح معرفني بنفسه و من هنا كانت الصاعقه
انا فلان الفلاني أشهر مسجل عندنا في المنطقة
هو أول ما عرفني بنفسه ركبي خبطت على الجيران أساساً

المهم اتصاحبنا بعد كدة لفترة ( مش صحوبية قوي يعني لو قابلته بالصدفه اقف معاه شوية كدة ينعي )

المهم الرسالة ايه

انا أصلاً مش بتاع حورات و مش عارف ايه الي خلاني و قفتله من الأاساس و لا ألاسلوب الي انا اتكلمت معاه بيه ده مش اسلوبي كنت حاسس ان بوقي بيتكلم لوحده

و أقعد افككر لما روحت ده لو كان عرفني بنفسه من الأول انا كنت ممكن اديلو كل الي في جيبي
طيب هة ليه عمل كدة

أجابه السؤال هو بنفسه قالهالي
بما معنا ان الي بيقف يثب في الشارع بيلعب على صدمتك في الاول لأو الضحية اتصدم او اتخض خلاص كدة لانه البلطجي نفسه بيبقى قلقان و ممكن يكون خايف اكتر منك .

و حاسس اني مش بخاف قوي زي الاول ( او بقيت عبيط بمعني اصح )

و ده الي خلاني اعمل كدة و مش عارف ما خوفتش ازاي و لما وصلت حمدت ربنا انه نجاني

شاهد عيان ( العبد لله )

انا حضرت الموضوع ده تاني يوم العيد
قررت اني اقضي العيد في العجمي ( ما روحتهاش من سنة 94 و الذكريات بقى بس ماحدش يفتن ) مع ان عملت موضوع هنا و الاعضاء نصحوني اني ما اروحش بس ذكرياتي كانت اقوى !!!
نزلت بعد صلاة الفجر على الساعة 5.30 و كنت عند البوابات الساعة 6 تقريباً و لقيت زحمة مهولة و لسة هبتدي اسأل فيه ايه لقيت عربية جيب شيروكي راجعة من أسكندرية و وقفت و نزل منها واحدة ست لابسة جلابية فلاحة رجالي مقطعة ( واضح انها مش بتاعتها ) و عمالة تصوت و تقول ضربوا عليان نار و خدوا ذهبي و فلوسي و الناس كلها اتلمت عليها
بعديها كذا عربية راجعة وقفت و نصحتنا بالرجوع او اخذ الطريق الزراعي لان البدو قاطعين الطريق و بيضربوا نار و بيسرقوا الذهب و الفلوس و كدة فضلت واقف شوية انا و ناس تانية نستطلع الامر و بعدين خدت القرار اني ارجع و خصوصاً ان 90% من الي واقفين رجعوا فطبعاً لازم الف البوابات لاني كنت دخلت في الحارة
فسألت الراجل الي بيقطع التذاكر الكلام ده صح و لا اشاعة قالي ماعنديش فكرة بس نصيحة بلاش تسافر و خصوصاً ان عربيتك كلها حريم ( أمي و أختي و خالتي و مراتي و أسر أبني و فريدة بنت أختي ) كل دول في الأفيو هههههههه ده غير شنطهم
المهم الراجل ما قطعليش تذكرة و عديت و جاتلي فكرة مجنونة قولت ياض قوي قلبك و روح ( الذكريات ضغطت عليا ) و لو في حاجة في الطريق هتبان أكيد زحمة مثلاً عربيات ماشية عكس اي فوضى يعني
المهم خدت الطريق و في ميكروباص اتشجع و عربية تانية و جم ورايا
وصلنا عند سجن وادي النطرون و الطريق مافيش مشاكل خالص غير انه فاضي إلى حد ما

و إذا بالمفاجئة ...................
عند ماستر بالظبط العربيات كلها راجعة عكس و زحمة غير عادية و دخان كثيف و حوالي 8 عربيات مدرعة للقوات المسلحة و عدد 2 عربية أمن مركزي
و واحد واقف ( ابو العريف الي بيطلع في اي مصيبة ) بيزعقلي اقفل الزجاج بسرعة بقوله في ايه ؟؟ رد بيقولي هما قوللك ايه عند البوابات قولته في ضرب نار و كدة قالي فعلاً ( أستغربت بصراحة و عرفته انه بيزيط لانه واقف في الشارع على رجله )
المهم الطريق واقف و ابتديت استفسر عرفت ان في عربية داست طفل و هما قاطعين الطريق علشان عايزين كوبري مشاه ( و انا راجع انهاردة لقيتهم عملين مطبات الصغيرة الي كذا واحد ورا بعض زي بتاعة محور صفط )
طيب هما معاهم سلاح ؟؟
الصدمة ما معاعمش سلاح هما بس العربيات الي بتدخل فيهم عافية بيحدفوها بالطوب
طيب الست الي كانت لابسة جلابية مقطعة دي أيه !!!!!!!! مش عارف حتى الان

المهم انهم اصلاً ما يكملوش 20 نفر و مولعين كاوتش في الارض و بصراحة كانوا عندهم اخلاق العربية الي فيها مسنين او أطفال كانوا بيعدوها
و كل شوية يفتحوا يعدوا حوالي 15 او 20 عربية و يقفلوا تاني
لحد ما ناس راحوا اتفاوضوا معاهم و فتحوا الطريق تماما و كمان عملوا لجان شعبية منهم شباب و رجال تعدي العربيات علشان ما يحصلش حوادث او شجار على اولوية المرور لان الي كان راكن في ماستر و على جانب الطريق كله هجم عايز يعدي الأول فاكر ان الطريق هيتقفل تاني
الجيش ما لوش دور مطلقاً غير العرض الي كان عاملوا بالمدرعات
الامن المركزي مأنتخين انتخة التنين

دول صورتين من موقع الحدث بموبايلي

هذه الصورة بحجم اخر انقر هنا لعرض الصورة بالشكل الصحيح ابعاد الصورة هي 2560x1920.


هذه الصورة بحجم اخر انقر هنا لعرض الصورة بالشكل الصحيح ابعاد الصورة هي 2560x1920.
ده الي حصل و الله على ما اقوله شهيد

الموضوع الاصلي اهوو
http://www.nilemotors.net/Nile/242387-a-2.html


و ربنا يسترها علينا جميعاً

انا نازل دلوقتي و حاسس اني هتقلب و خصوصاً ان عربيتي بتتصلح و نازل مواصلات