الموضوع: فتح وضم المريات مع الموتور (اصنع بنفسك. صور وفيديو)

العقيد خالد، قائد كتيبة وحوش الرينو، بيتريق علي وبيقول لي إني بالعب في العربية سبارك على اساس إنها عربية بسيطة ومش معقدة..العقيد خالد بيتحداني اشتغل في الميجان على اساس انها اكثر تطورا في كهربتها..العقيد خالد بيغيظني كل ما يركب عربيته او يخرج منها علشان اول حاجة بيعملها إنه يفتح المرايات او يضمها بالسويتش..انا بقى قررت اريح العقيد خالد واخللي المرايات تقفل وتضم لوحدها من غير السويتش.. كان نفسي استنى المهندس فرحات استاذنا في الحركات دي..بس هو مسافر بقى...وأخيرا ولا بد ان اشكر صديقي ومعلمي في الإلكترونيات المهندس عمرو عاشور

ملحوظة: بعد ماتعبت ودرست ملفات service manual واختبارات لسوكت المرايات ورسمت الدايرة على الورق اكتشفت إن في واحد عمل الموضوع دا قبل مني بكتييييير في الموقع دا
Megane Coupe-Cabriolet Tips
والحقيقة مافيش فرق بين الدايرة بتاعتي وبتاعته..ولأنه اسبق مني في التطبيق انا هاخد الرسومات من عنده وهاضيف طبعا

هاتحتاج:
- عدة كهرابا كاملة (آفو، شريط لحام، عازل سليكون، مفكان، قشارة سلك..إلخ)
- اسلاك 1 مم (انا اسخدمت 2 مم) الافضل يكون 5 الوان مختلفة (احمر، اسود، ازرق، رمادي، احمر فاتح "بمبي")
- ريلاي 8 طرف

شرح الدايرة:
دي صورة الدايرة الاصلية بتاعة فتح وغلق المرايات من السويتش بتاعها (منقوله)


الفكرة بقى إن السويتش دا السوكت بتاعه فيه 10 طرف، احنا هانحتاج منه 5 فقط هم:
طرف رقم 1: لفتح المرايات إذا تم توصيل 12v+ عليه وتوصيل ارضي على الطرف رقم 10
طرف رقم 10: لغلق المرايات إذا تم توصيل 12v+ عليه وتوصيل ارضي على الطرف رقم 1 (الفكرة فكرة تغير الاستقطاب polarity علشان موتور المريات يشتغل بالعكس)
طرف رقم 4: دا الطرف الأرضي وهتلاقي لونه اسود (اي طرف اسود بيبقى ارضي في اي حتة في العربية)
طرف رقم 5: دا فيه تيار 12v+ على طول جاي من البطارية ومحمي بفيوز (برضة الاحمر في احتة في العربية له نفس المعنى)
طرف رقم 2: ودا بيمشي فيه تيار 12v+ بعد الدوارة او فتح الكونتاكت Acc or after igintion

طرف 2 دا مش مستخدم غير علشان ينور اللمبة في السويتش..احنا بقى هانستخدمه مع الريلاي علشان الريلاي يشتغل بدل السويتش
ودي صورة الدايرة بعد التعديل (منقوله برضه)


طبعا الدايرة دي هاتلغي دور السويتش تماما في فتح وضم المرايات..انا استخدمت الدايرة دي علشان السويتش عندي معلق ومش بيقفل المرايات..بص طبعا في حلول كتير للمشكلة دي..والصور القادمة فيها تصميمات "تخيلية" لدوائر اخرى..يعني ايه تخيلية؟؟ يعني انا رسمتها على الورق بس ماجربتاهش ومحتاجة مراجعة في منطق سير الدايرة..فكرة الداوير دي هي قطع الكهرباء عن الريلاي في حالة ضم المريات من السويتش..يعني لو السويتش على وضع ضم المريات "ملفوف لتحت" المريات مش هاتفتح غير بالسويتش نفسه..لكن لو السويتش على وضع فتح المرايات "ملفوف لفوق" ساعتها المرايات هاتفتح وتضم مع الدوارة. يتم قطع الكهربا عن الريلاي الأول 1st relay باستخدام ريلا تاني 8 طرف ايضا





فيديو التجربة الأولى:
في الفيديو دا في 2 ترانس، واحد فيهم بيدي 6 فولت دا استخدمته كمؤشر للطرف رقم 2 في سويتش المرايات..طبعا كان ممن استخدم ترانس واحد بس لقيت كدا افضل في الشرح..الحاجة التانية كنت فاكر إني اقدر آخد اشارة signal من فتح الباب علشان المرايات تفتح وتقفل مع الريموت بتاع العربية..بس بصراحة ماعرفتش اشيل باكتيات الباب بحرفنة..فرجعت لدايرة صاحبنا بتاع meganecc.
تجربة الضم:
[flash=http://img713.imageshack.us/img713/2412/ri0n.mp4]WIDTH=350 HEIGHT=400[/flash]

تجربة الفتح:
[flash=http://img834.imageshack.us/img834/669/edog.mp4]WIDTH=350 HEIGHT=400[/flash]

قبل ما ننزل نركب في العربية في حاجتين مهمين جدا جدا جدا لازم يتعملوا:
اولا: عزل كل اطراف الريلاي جيدا وعزل الريلاي نفسه


ثانيا: كتابة labels على كل طرف سلك في معلومات عن السلك دا وهايركب فين


التركيب في العربية:
هاتحتاج تفك المقبض door handle ودي سهلة جدا..هاتشد الجزء الامامي لبرة هايطلع في ايديك بضغط لكن مش بقوة علشان ماتكسرش حاجة..بعد كدا هاتطلع السويتش في منتهى السهولة من مكانة..



ولأني استخدم ريلاي حجمة كبير نسبيا مالقتيش مكان احطه فيه غير بعد مافكيت وحدة التحكم في زجاج العربية وبعدين عديت السلك بسوستة من تحت لحد مقبض الباب




ولأني "برضه" كتبت lables على كل سلك عرفت على طول هاركب كل سلكة من الريلاي في اي سلكة في السويتش. بس طبعا انا جربت قبل ما اقفل الشغل



وآدي الفيديو النهائي
[flash=http://img819.imageshack.us/img819/9161/3fci.mp4]WIDTH=350 HEIGHT=400[/flash]

[flash=http://img4.imageshack.us/img4/4420/wet.mp4]WIDTH=350 HEIGHT=400[/flash]

العقيد خالد يعد ماشاف بعينه
[flash=http://img171.imageshack.us/img171/8433/e64.mp4]WIDTH=350 HEIGHT=400[/flash]

ما شاء اللة
دماغك عالية