عاوز اجيب كوتشي

**khaloooda** · 25-12-2011 11:01 PM

بقالي كتير مجبتش كوتشي
مفيش وقت للرياضة
وغير اني كان عندي كوتشي قديم كده كان ممشي الحال
دلوقتي قررت بعد ما كرشي ابتدا يكبر ومنظر بقي عار اني لازم اروح جيم
وعاوز كوتشي

المهم في رحلة البحث عن كوتشي فوجئت ان الدنيا اتغيرت كتير عن زمان يا اخي
علي ايامنا كان الكوتشي كوتشي وخلاص
دلوقتي اسمع من البائع ان في كوتشي للمشي واخر للجري وثالث لالعاب القفز زي الباسكت والفولي ورابع .. وخامس

احترت

ياريت حد يقولي افرق بينهم ازاي
والاهمممممممممم :
اجيب منين
في واحد صاحبي وصف لي مول خاص بالملابس الرياضية وادوات الرياضة عموما قالي في مدينة نصر بعد جنينه مول وده ميزته ان فيه كل التوكيلات
حد يعرفه
او يعرف حاجة احسن
ياريت يفيدني

**wassim_nasser** · 26-12-2011 12:21 AM

فيه محلين واحد قدام المريلاند جنب فرحات الكبابجي و واحد ف جسر السويس علي ناصية شارع السباق هاتلاقي فيهم حاجات نايكي واديداس و ريبوك اصلية و بيكون عليها 50% خصم عشان بتكون تصفيات لموديلات قديمة و اسعارها مابين 250 و 400 .. اما لو عايز موديلات جديده روح اديداس و نايكي اللي ف طلعت حرب بس تقل جيبك .. اما لو عايز حاجه ف حدود 100 جنيه فا عندك محل ملابس الاهرام ف الكوربه جنب الامفتريون

**crayvor** · 28-12-2011 08:35 PM

هات حاجة أكتيف نضيفة ب 300 جنيه ولا حاجة.. باستخسر ادفع 700 و 800 جنيه ف كوتشي سواء نايك ولا اديداس ولا ريبوك (بعد ما علي الأسعار) وفي الآخر كله made in china

الله يرحم أيام ما كان الريبوك ب 250 وصناعة انجليزي.