خيول

**A7MED_PHARMA** · 26-12-2011 12:27 AM

السلام عليكم

عالم مختلف
عالم مختلف تماما عن حياتنا اليومية
مربي الحيوانات الأليفة يقدروا يفهموا كلامي أكتر مما سواهم
حيوان جميل
أجمل حيوان ربنا خلقه على الأطلاق
قوي .. ناعم .. حساس .. وفي ..صدوق .. مخلص
نظيف جدااا جداااا
جميل جدااا جداااا
كل الصفات الجميلة ربنا خصها فيه
مفيش عنده أي طبع سئ زي الغضب أو الغدر
عاوز تعرف معنى كلامي .. روح لأقرب مكان فيه خيول
ماتقدرش ماتحبهاش من النظرة الأولى
...
شوية عن تاريخ الخيول
السكّــب : ده فرس الرسول صلى الله عليه وسلم
سبحة : فرس المقداد ابن الاسود(الفارس الشهير)
الورد : فرس حمزة
العّيار : فرس خالد ابن الوليد
سابق و لاحق و اليحموم : فرس علي ابن ابي طالب
سبحة : فرس زيد ابن حارثة
وطبعا
الأبجر : فرس عنترة ابن شداد

علامات جمال الخيل

عضلات الصدر البارزة
البطن الكبيرة
الأنف الواسعة
الأذن الصغيرة
العيون الواسعة
الشعر الطويل

الأكل والعلاج

معدة الفرس مش كبيرة عن معدة الإنسان بكتير أوي
اكله زي أكل أي حيوان نباتي تاني +شوية إضافات
بياكل فول وبرسيم على تبن وكل ماهو أخضر.. وبحطله ادوية فيتامينات بيطرية ف الميه بتاعته
العلاج تقريبا نفس العلاج البشري
بس الجرعة بتختلف حسب وزنه

الخيول حيوانات حساسة زيادة عن اللزوم
يزعل لو ضربته .. تحس إنه مبسوط لما تطبطب على رقبته أو تلاعب شعره
يحبك لو حبيته

الخيول فخر لكل من يمتلكها..وبالذات الجميل منها
الفرس (المهر) الصغنون بتاعي
لونه بني .. شامه بيضا نقيه بين عينيه
سليم العضم ..جميل الملامح .. صحته تمام(الله أكبر)
من أب اصيل .. وأم عاديه

.
كل يوم أو يومين بخرج بيه بالليل (علشان ماحدش يشوفه)
بركب العجلة بتاعتي .. وأسيبه يجري ورايا
فزاع مالوش إنه يتركب دلوقتي .. لسه صغنن قدامه 6 شهور لحد مايتركب ع الاقل خالص
لازم تمارين الجري بتاعت بالليل دي علشان صحته
بخاف أخرج بيه قدام الناس علشان ماحدش يشوفه
عنايتي بيه زيادة عن اللزوم .. حمام مخصوص وشامبو وزيت لشعره
وبطانية ناعمة بيستغطى بيها بالليل
والسكر أساسي كل يوم
طبعا

أنا عايش ف الأرياااااااااف علشان كده موضوع التربية مش صعب بالنسبة ليا بالنسبة لمكان التربية أو للأكل أو التدريب

...
..
.

**A7MED_PHARMA** · 26-12-2011 12:31 AM

((والحصان حيوان أليف يسير ف الصحراء))

أديني قولتها علشان محدش يقولها

**wassim_nasser** · 26-12-2011 12:37 AM

ربنا يباركلك فيه وحوافره تبقى حلوة عليك

**elfashn** · 26-12-2011 07:42 PM

ربنا يباركلك فيه ..انا لسه جديد فى موضع الخيول ده بقالى 3 شهور بس ..بس عشقتها جدا ونفسى يبقى عندى حصان بتاعى بس المشكله ان تكاليف تربيته مرتفعه اوى ...اكله مكلف جدا .الى عرفته انه ياكل فى الشهر ب 800 جنيه غير اجرة العامل والبوكس فى الاسطبل لآنى من سكان المدينه ومعنديش مكان ليه يعنى هدخل فى 1200 جنيه شهريا.فقولت اقضيها ركوب بس لحد ما ربنا يفرجها من عنده يعنى بروح اركب فى الجبل فى نزله السمان وادفعلى 50 جنيه بس فى الساعه . بس انت عندك حق الخيول دى حيوان جميل اوى

**mustafavet** · 26-12-2011 08:57 PM

هاتله قالب لحس ( املاح معدنية) مهم جدا
جرعه طاردات الطفيليات
اعتني بالحافر باستمرار
دي نصايحي ليك لحد دلوقتي
مش يتركب غير علي 18 شهر علشان ظهره ميقوسش