المشاركة الأصلية كتبت بواسطة wassim_nasser
قاعد في الصيدلية ولا بيا ولا عليا .. وباتفرج علي الاخ احمد المسلمانى و هو بيشرح الخلاف الداير مابين ساركوزي و رجب اردوغان و ازاي ان الخلاف التاريخي مابين تركيا و فرنسا تحول لتوازنات سياسية ما بين فرنسا وتركيا و امريكا وايران .. المهم كان من حوالي شهر جم جماعة اجروا شقه ف العماره اللي قصاد الصيدلية و عملوا حزب ! مش فاكر اسمه الحزب العربي للعدالة والمساواه .. نزل راجل بجلابية وقور دخلي الصيدلية وقال انا الشيخ فلان الفلانى رئيس الحزب وجارك و مرشح نفسى ف الشورى و صوتك معانا و همتك معانا .. قولتله بالتوفيق إن شاء الله (أنا كنت اعرف شكله عشان شفت بوستراته ع العربيات) .. طيب أؤمر يا جناب العضو .. ف الاول قالي هات شريط كتافلام .. اتفضل أي خدمة تانية .. ميل عليا وسألنى ماعندكش حبيتين تامول؟! والتامول لمن لا يعرف (أو لمن يعرف و عامل عبيط) هو مسكن قوى ومضاد للإلتهابات و له أثر مخدر قوى و احيانا بيستخدم استخدام خاطئ للإرتقاء بالدماغ المصرية (عشان نعرف نتعامل مع البشر) .. المهم ان الراجل سليم زي الحصان بس عنده ياحرام صداع وحش (اخص عليك يا صداع حوجتنا للتامول) .. انا طبعا استغربت من راجل ف وضعه يطلب حاجه زي دي كده نهارا جهارا .. قمت كعبشت وشى وقولتله لا والله مش باشتغل فيه .. هو يظهر حس انى شوية و هاهزأه راح خد بعضه وقالك امشى بكرامتى .. رجعت ابص علي عمنا احمد المسلمانى لقيته بيقول : "ناخد بالنا يا جماعه واحنا بننتخب اعضاء مجلس الشعب .. مفيش واحد جاهل يدخل المجلس .. الوضع السياسى معقد .. الاغبياء يمتنعون" .. فا سكت كده وقولتله ف سري "الاقيش معاك حبيتين تامول"