احلى سلام لاحلى رجاله

اقولوكو بقى انا عملت فى العربية اية عشان تتعظوووووو

1 - اشتريت ركبة يمين ( 300 ) + بليةعجل شمال ( 130 ) + مصنعية ( 100 ) كل ده عند محمد عبد الراضى . طبعا طنانى هايطلع ديلوقتى يزعقلى انت جبت بلية يمين ليييييييييييييييييييييييي ية . اللى حصل .

2 - كنت بسمع صوت لبة فى الفتيس لما اشيل دبرياج وادوس بنزين والكل اجمع انها قواعد فتيس فسألت محمد عبد الراضى وجربها وقالى دى اللبة شمال من تحت وغالبا يا مقص يا مسمار مفكوك وشاف وطلع مسمار وربطه والحمد لله .

3 - اشتريت سماعتين مدورين بايونير 220 وات ب 275 جنية عشان يركبو ورا . وسماعتين كينوود مدورين 160 وات ب 130 ج عشان قدام وطلعت التويترات اللى قدام شغاله وركبت عند واحد اسمه اسامه فى معروف وخد 40 ج . السماعات من عند سان جو فى ش التحرير . وعلى فكرة انا فكيت الوشوش بتاعة السماعات وحطيتهم عادى مكان القديم . وتعمدت انهم يكونو نفس مقاس القديم عشان محفرش فى العربية .

4 - جاتلى شاشه دي في دي بس اللى بتركب على التابلوة ( منحه مجانية ) . المهم لقينا افتكاسه انها تركب فى المخدع ورا . ازاييييييييييييييي . اقولكو . فى التوفيقية فى حامل زى بتاع الموبايل بس للشاشات الديفي دى تقريبا معمول عشان الفيسبا . فانا ان شاء الله بدون مقاطعه اجيبة واعمله تعديل بحيث انه يركب فى الحديدة بتاعة المخدع اللى بتخش فى ضهر الكرسي بحيث : انه يكون ثابت وسهل تحريك وتغير اتجاه الشاشة نفسها ( الحامل ب 35 ج )

5 - كان عندى مشكله فى امبير البنزين وعرفت ان فى واحد مخصوص للعدادات والعوامات عند محطة مترو السيدة زينب قدام محطة المية . فكينا عند الكهربائي العوامة وكشف قالى العوامة سليمة . ادينا كهربا ارضى للعوامة المؤشر رفع . فكينا العداد ولقينا ان العيب فى حاجتين مكثف + تغيير الامبير نفسه غيرنا المكثف وجربنا تمام بس بيستعبط ساعات وجارى البحث عن امبير حسابة كان 60 جنية خد 30 والباقى لما يلاقى الامبير . المشكله اللى كانت فية انى لما افول الامبير يقف عند 3/4 التانك بس

واسف انى طولت عليكو اوى


اخوكم وائل فرغلى