بتسيب مسافة قد ايه بينك وبين الي قدامك ؟؟؟
اولا السلام عليكم ورحمة الله وبركاته
الموضوع الي هتكلم فيه باين من العنوان وهو المسافة الي المفروض تسيبها بين عربيتك والعربية الي قدامك
انا عارف ان الزحمة في بلدنا بتخليك ماتعرفش تسيب مسافة ولو حتي 10 سم وياسلام لو وراك تاكسي ولا ميكروباص وشافك سايب مسافة بيفضل دايس علي الكلاكس لحد لما صوته يغلق من كتر الدوسة او يفضل يرعشلك لحد لما يبوظ دراع النور - وعلي كل الأحوال المسافة بين العربيات جوة البلد وفي الزحمة مش هتفرق كتير لأن تأثيرها مش هيكون كبير
لكن انا بتكلم علي الطرق السريعة زي الدائري او الطرق الصحراوية بين المحافظات
في كلام كتير سمعناه عن الموضوع دة زي انك تسيب مسافة 150 متر او تسيب 30 متر او جوة البلد تكون 10 متر ودة طبعا كلام جميل بس مش منطقي لأني مش هعرف اقدر المسافة مظبوط
لكن موضوعي النهاردة انشاء الله هيتناول المسافة دي بشكل مختلف ودة ليه نظرية غريبة اوي(1) او قاعدة اسمها "The 3 Second Rule"
بأختصار شديد جدا انت هتراقب العربية الي قدامك وتختار حاجة علي الطريق تكون ثابتة (زي يافطة او حجر او اي علامة ثابتة) وأول لما العربية الي قدامك تعدي من قدام الحاجة الثابتة دي هتبدأ حضرتك بالعد بالشكل التالي
1 1 1000
2 1 1000
3 1 1000
وبكدة هتكون تقريبا استهلكت حوالي 3 ثواني
طب لو حضرتك عديت من قدام العلامة الثابتة قبل ما تخلص العد ؟؟؟ هتبقي كدة بالشكل دة انت ماشي قريب اوي من الي قدامك
وطبعا المسافة المقدرة ب3 ثواني مسافة انشاء الله كافية لتجنب وتفادي اي طوارئ تحدث علي الطريق
طب في جو شتا زي اليومين دوول او بلليل متأخر
يستحسن انك تضاعف المدة وتخليها 6 ثواني في حالة ان الجو ممطر او لو بلليل متأخر او في حالة الضباب
وفي حالة الجو لو سئ جدا يستحسن تخلي المسافة توصل ل9 ثواني
نقطة تانية مهمة جدا وفي غاية الخطورة
لو واحد ماشي وراك ولازق فيك وطبعا مش مهتم لابال3 ثواني ولا بالمسافة
حضرتك بكل بساطة يا أما تهدي - وطبيعي انه هيتخنق منك لأن الي بيسوق بالشكل دة بيبقي عايز يسوق بسرعة وطريقته تعتبر عنيفة في القيادة -
يا أما هتغير حارتك الي ماشي فيها عشان تتجنبه وبعد لما يعدي منك هترجع تاني للحارة بتاعتك
طيب تعال كدة معايا دلوقتي هنعمل جدول ظريف اوي للمسافات مع السرعات بناء علي نظرية ال3 ثواني
http://www10.0zz0.com/2011/12/27/18/506306558.jpg
بناء علي الأرقام الموجودة في الجدول
يعني علي سبيل المثال لو حضرتك ماشي علي سرعة 90 يبقي المفروض في الظروف الطبيعية هتسيب مسافة حوالي 75 متر
في نهاية الموضوع بسألك
بتسيب مسافة قد ايه بينك وبين الي قدامك ؟؟؟
والله المستعان
،
،
المراجع
(1) طبعا مش من تأليفي ولكن ترجمة وتنسيق ونقل بمعرفتي
http://www.smartmotorist.com/traffic-and-safety-guideline/maintain-a-safe-following-distance-the-3-second-rule.html
