الموضوع: تجربتي مع اليارس

بسم الله الرحمن الرحيم

النهرده ياشباب انا هكلمكم عن تجربتي الخاصة مع هذه العربية وسوف اتناول عربية عربية من يالي أشتريتهم عسى الله أن ينفعنا وأياكم بما فيه الصلاح .

أجمالاً هي عربية كويسة جداً ... وقبل ما اشتريها سئلت واحد راكبها عنها فبص الراجل مستغرباً سئالي أيه رئيك في اليارس وكأني بسئلو سؤال غريب ؟


وقال يبيه دي عربية تويوتا عارف يعني أيه تويوتا ... وسبني ومشي ، المهم سئلت واحد تاني راكبها أيه رئيك في اليارس فراح صاحب العربية ظحك وشكرلي فيها بكل هدوء وبرود بخلاف ملاك العربيات التانية الي تلاقيه بيدافع عن العربية بكل حرارة وحماسة ، وبعد ما أشترتها عرفت أن العربية بتتحدث عن نفسها وفعلاً سئالي كان سئال غبي شوية لأن بمنتهى البساطة دي تويوتا .

الملاحظ عند قيادتها كأني بسوق عربية كامري صغيرة ... حتى سحبها كان ممتاز جداً لأن بمنتهى البساطة دواست البانزين لمس عليها أو حسس متضغطش جامد ... الفرامل كذالك الدريكسيون مش محتاج أكتر من صباعك علشان تلفو . قفلت وفتحت الابواب بتاعتها مستوى العزل الاتقان والجودة والتقفيل بتاعها شغل عالي وتديك أنطباع العربية المعمرة .

لكن وحط تحت لكن دي ثلاث خطوط صادفتني بعض العيوب فيها وحابب أني أذكرهم :

1- فلتر الزيت مكانو سيء للغاية ومزنوق .
2- أسطوانت الدبرياج بتاعتها بتتقل بعد فترة بس طبعاً انا بفسر السبب أنو أحياناً كتيرة بكون حاطط العربية على الثالث ولأن العربية صوتها ناعم وهادي فأكون فاكر أنو الخامس وأمشي عليه لغاية 120 .
3- زرار بتاع الفلشر الرباعي المفروض يكون أقوى من كده .
4- الاكصدمات الخلفية هي مجرد حلية لها .
بس عادي تمنها رخيص وبتستحمل .
5- من ضمن عيوبها أنك لو أشتريتها وركبتها وسوقتها صعب جداً تركب عربية غيرها أو تغيرها لأنك هتتعلق بيها الا اذا كانت حاجة أعلى أما أقل هتتعب جداً نفسياً .

دي أبرز عيوبها لكن أجمالاً أجمالاً هيا عربية ممتازة جداً وقوية جداً ... وحايزة على عدة جوائز عالمية في السلامة والبيئة والقيادة .

حسيت بمتعه كبيرة في قيادتها ...
وثبات عالي ... لأن كل العربيات بتجري ، بس مش كل العربيات تقدر تناور وتحاور بيها لكن ممتازة في المنوارت بالذات وقت الخطر وعلى سرعات عالية . شعورك بالرضا وأنتا سايقها ممتاز جداً .

حتى قطع غيارها مبتستخسرش اي حاجه فيها لأن العربية بتديلك أكتر ما بتاخود منك

وحتى لو العربية مستعملة أو قديمة توكل على الله أشتريها لأن تمن العربية فيها والي لا حظتو في العربية دي أن تصليحها في الخبطات سهل وبترجع العربية زي ماكانت ومبتحسش في اي أثر في الحوادث بتاعتها ... بخلاف الكوري اي الخبطة بتأثر فيه
انا اتخبطت مرتين وكل خبطة ألعن من التانيه وحده من قدام ووحده من ورى والعربية وقفه فوق الرصيف وصلحتها بره التوكيل عادي جداً ورجعت أسوقها محستش بشعره فيها غلط . بسم الله مشاء الله عليها .
أما من حيث أستهلاكلها للبانزين موفرة جداً جداً جداً ... بسم الله مشاء الله ولاحظة أن المتور بتاعها 1300 سي سي بكفائة متور 1600 سي سي بس كوري أو فرنساوي ... وعامة العربية اليارس عربية مش بتشتريها لكن بتقتنيها حاجه كده للعمر وللزمن .

ملاحظة : هذا الموضوع لا يعبر غير عن وجهة نظر الكاتب الشخصية وتجربته الشخصية ... ملكش دعوة بتجربتي عندك تجربة شخصية ليك اذكرها معندكش كتر خيرك ... وشكراً لسعة صدركم .

طب صحيح يا بوحميد بالنسبة للجنوط معاك أخبارها أيه
ده أنا شوفت حبت جنوط على اليارس أنشاء الله أنشاء الله ناوي أرفعها على الموقع عنها بس مش عارف أزي أحط صورة جوا المنتدى ياريت حد يقولي الطريقة علشان أحط أخر تزبيطات اليارس

أما يا بوحميد ياريت تقولنا الجنوط مقاسها أيه وأيه أخبار الحكة مع المشي يعني بتخبط في الكرتيره ولا لأ لأني ناوي أنشاء الله أجنط
وانا معاك في كل الي قلتو وشكراً للمشاركة يا جميل
بس اليارس عندي انا داخل على 90.000 كيلو وبسم الله مشاء الله مفيش حتى صوت صفارة في الفرامل بفكر كده على 110 أغيرهم يعني من باب الصيانة .