الموضوع: الماروتى بتفصل

السلام عليكم يا ماروتية...تحدى جديد جايبهولكم الماروتى بتاعتى بعد التحدى القديم اللى طلعت فى عينى لشهور وماصدقت تهدى عليا شهرين...بس هى يظهر بتحب الألش... المهم مراتى من كام يوم كانت بتشتكى انها ركنت العربية ونزلت تجيب حاجة ولما رجعت العربية عتلت سنة لحد ما لقطت وراحت قايمة وفجأة راحت فاصلة ...دورت المارش تانى والعربية لقطت فقط لما داست على البنزين جاااااااامد أوى.....وراحت مكملة عادى.....أنا كبرت دماغى..وقلت بجد أنا تعبت من العربية دى قبل كدة مش هاخد على كلام مراتى....المهم لسه حالا الساعة 3 الفجر مروح بيتى من عند أهلى بدور العربية عادى جدا من غير تعتيلة ولا حاجة...وشادد الشفاط حاجة بسيطة عشان تسخن قبل أمشى وأنا قاعد مستنيها تسخن وباصص من الشباك لقيت العربية قفلت لدرجة انى كنت هازعء لمراتى عشان افتكرتها بتهظر على الصبح وشالت المفاتيح من العربية.... قالتلى مش قلتلك؟ بس المرة دى عملاها بدرى!! كذا مرة أدور المرش يعتل حاجة بسيطة والعربية تلقط وبعد كدة تروح فاصلة كأنى شلت المفتاح...لحد ما لقطت لما دوست بنزين جامد أوى وصوت الموتور كان هيصحى الناس...وأسيب البنزين العربية تهدى وتكمل عادى ولا بترجرج ولا مدافع ولا حاجة والنور عادى والمروحة تشتغل...المهم ولعت الأرضى وقلت هاتحرك وأبقى أشوفها بكرة بجرب الدراع كدة أقفلة وافتح ألاقى الأرضى مش بيقفل رغم ان نور التابلوه مقفول ..أقفل العربية وأركن برضه النور مش بيقفل!!!! وعشان العربية تدور تانى لازم أعمل نفس الحركة اللى فاتت أدوس بنزين جامد أوى عشان تلقط فى مرة!!! رحت منزل أخويا من البيت وفصلنا كابلات البطارية ولامستهم مع بعض بعيد عن البطارية عشان أفضى أى شحنات... ورجعتهم لقيت النور فصل فعلا وأصبح يستجيب للدراع عادى بس تظل العربية مش راضية تقوم الا بالطريقة دى.... فسيبتها هناك عشان فى ميكانيكى تحت البيتوكهربائى وقلت يبقوا يشوفوها الصبح...
ملاحظات:
1-خلوا بالكم أنا ليا باع طويل مع طقم كهربة العربية دى وغيرته يمكن 8 مرات والموبينة 3أو 4 مرات وطلع العيب فى الكوندنسرات المضروبة لحد ماعترت فى كوندنسر نضيف دنسو وده الموضوع بتاعى
http://www.nilemotors.net/Nile/244042-4.html
http://www.nilemotors.net/Nile/253233-a.html
2-لسه عامل صيانة الأربعين ألف كاملة بفلتر البنزين وكل حاجة
3-البطارية نسر فارتا ألمانى جافة متغيرة فى شهر 5
ممكن يكون العيب فى ايه يا شباب عشان لماأروح للميكانيكى والكهربائى الصبح أعرف أخد وأدى معاهم..ممكن تكون البطارية؟ده رأى أخويا انها ممكن تهنج العربية كدة ولا ممكن تكون مارش؟ ولا كوندنسر مع العلم انها ساعات بتقوم ومفيش مدافع ولسه مغيره بحاجة نضيفة جدا ولا أبلاتين بس معرفشى الأبلاتين لما يلدع ايه اللى بيحصل ولا كاربيرتير مع العلم انى لسه منضفه يمكن من 5000 كيلو وكمان حاطط السائل اللى بينضف دورة البنزين ييجى من 1000 كيلو ولا فى حاجة متهيألى اسمها مشط مش متأكد ؟دى كنت غيرتها فى عربية دوجان كانت عندى وكانت العربية بتفصل لوحدها على سرعة 30 ولا 40 كم وأنا ماشى عادى وبعرف ان العربية فصلت ألاقى لمض البطارية والزيت ولعوا كأنى لسه هاشغل العربية وعلى فكرة ده نفسه اللى بيحصل فى الماروتى لما بتقطع بتولع ال3 لمبات الحمرا اللى فى التابلوه....للعلم أنا مش خبير بس معلشى دوشتكم بتفاصيل كتير عشان أكون مكفى أى سؤال ييجى فى بال الخبراء!!

على فكرة موضوع النور اللى كان بيفصل طلع كتاوت وغيرتها...