الموضوع: تعمل ايه لو لقيت عيش محطوط على عربيتك ؟

قول حسبى الله ونعم الوكيل
وكأننا بنشترى العربيات دى من فلوس حرام ومش من حقنا نزعل عليها
الناس بتتعامل من منطلق انك راكب عربيه بكام الف
اما تخسر زجاج ولا فانوس او صاج
ولا هيأثر معاك ما انت معاك فلوس تشترى عربيه مش هيبقى معاك فلوس تصلحها
طبعا هرجع اقول تانى حسبى الله ونعم الوكيل هو المنتقم الجبار

على فكرة ياباشا الحكاية مش فقر وغنا
هى مسألت سلوك اللى مترضلوش لنفسك ما ترضلوش لغيرك
يعنى قبل ما اتصرف مع حاجة حد افكر لحظة هرضى ان حد يعمل كدة مع حجتى ولا لأ

لو لقيت المنظر ده على عربيتي مش هاسكت
هاخد رغيفين و أطلع
أصل العيش شكله حلو الصراحة
أنا شفت مرة المنظر ده على bm 532 e 60 ، مع إن كان فيه عربيات تانية واقفة بس هو إستنضف البي إم برضه ، أو يمكن البلدي بيتحول ل ريتش بيك بعد وضعه على البي إم

المشاركة الأصلية كتبت بواسطة eng_hatemfathy

بصراحه الاخ الكريم اللى بيبرر وضع العيش على العربيه علشان يتهوى ويتهم صاحب العربيه بانه المتسبب فى كده بوضع عربيته فى الشارع زعلنى جدا لانه نسى حاجتين مهمين وهما ان انا شارى العربيه علشان اركبها مش علشان الناس تعملها قفص وتهوى العيش عليها -والله اللى عايز يهوى العيش ابو جنيه على عربيه بميت الف يبقى يشترى قفص دهب وانا بدفع كل سنة اكتر من الف جنيه ضريبه لاستخدام الشارع وادام مفيش علامة ممنوع الانتظار يبقى من حقى قانونا انى اركن فى اى حته جنب الرصيف
والاهم من كده مين قال ان الغلبنا يعتدى على ممتلكات الغنى ويستعملها بغير اذنه فضلا عن افسادها
طب لما يبوظ الدهان هيقدر يعيد الشىء لاصله زى الشرع ما بيقول
وطبعا اعادة الشىء لاصله مش زى ما الناس فاكره انه يرش العربيه -اعادة الشىء لاصله يعنى يرجعها فبريكه تانى -طبعا مستحيل
يبقى كل واحد يلم نفسه وميبوظ حاجة غيره وكانها سبيل اللى عايز يريح يريح واللى عايز يربط الجزمه يربطها واللى عايز يهوى العيش يهويه وكأن غلطتى انى جبت عربيه فى بلد لا فيها قانون ولا دين والحل انى اخلص منها واركب تاكسى او انى اسيبها لحد الشعب ميعر واجبه الشرعى والدينى لان الناس الا ما رحم ربى شاطره بس تنادى بحقها ويا ريته حقها!!!!!!!!!!!

انا مجرد قولت رأيي الشخصي لصاحب الموضوع والاخ مشكورا رد عليا بأسلوب راقي ومتحضر
وبصراحه مش شايف ان فيه داعى لاسلوبك العدائي ده وعموما انا هرد على كلامك نقطه نقطه بطريقه اهدى

اولا انا حصلى الموقف ده أكتر من مره - انى أكون راكن فى مكان وارجع الاقى العربيه عليها رده مكان عيش بركب وامشي عادي ولما اروح بمسحه بيكون بقايا قليله جدا ومحصلش أى حاجه للدهان

ثانيا انا مقولتش ان حد يعتدي على حاجة حد واضح ان حضرتك فهمت كلامى بالعكس

ثالثا حضرتك قولت انك شاري عربيه 100الف جنيه وهما معاهم عيش بجنيه يبقى الاولى ان حضرتك تخاف على عربيتك وتصونها وتشوفلها مكان تركنها فيه

رابعا موضوع الضريبه كلنا بندفع ضريبه مش حضرتك لوحدك واعتقد اننا بنستردها تانى بطريقه غير مباشره عن طريق دعم البنزين ان لم يكن اكثر كمان
وبخصوص مبلغ 1000 جنيه كل سنه ياريت حضرتك تتأكد من الرقم ده تانى

خامسا موضوع استخدام الشارع : لازم نكون عارفين ان الشارع المفروض انه معمول للمرور والحركه او الانتظار مش للركن وفى فرق كبير بين الركن والانتظار
الانتظار انى اركن العربيه دقايق اقضي فيهم مصلحه بسيطه وارجع اخدها وامشي
لكن انى اركنها فى الشارع كل يوم 17 ساعه فده اسمه باركنج وده المفروض انه ليه مكان مخصوص مش فى الشارع
ده اسمه استغلال للشارع لانك ببساطه مستخسر تدفع مبلغ لشراء مكان تركن فيه عربيتك اسفل منزل فى الباركنج او البدروم ايا كان اسمه او انك تشترك فى جراج خاص لو مفيش فى منزلك باركنج

وطالما حضرتك بتتكلم على الحقوق فالمفروض تعرف انك بركنتك بطول اليوم متعدي على حقي و حق الشارع
يعنى لما ادخل شارع 8 - 10 متر الاقى صف عربيات على اليمين وصف على الشمال والشارع ماشي حاره واحده ولو عربيه بتركن او بتطلع من تقاطع الشارع كله يقف لو مكانش الصفين دول راكنين او لو حتى صف واحد بس الى راكن كان الشارع هيقف كده ؟
ده مثال بسيط بيبين ان سبب رئيسي فى الزحمه وازمة المرور الى كلنا بنشتكي منها هيا الركن فى الشارع واستخدامه كبارنكج