يا جماعة أنا لسه جاي حالا من توكيل بريدجستون اللي في عباس العقاد وبعد معاناة حوالي 5 أيام من البحث والتمحيص والتدقيق والسؤال عن المقارنة بين نوعين بريدجستون وهما Turanza ER60 و MY-01 وقولت هسيب الكلمة الأخيرة للمهندس نجاد (مدير الفرع الراجل اللي ناس في المنتدى قالت إنه شكله أجنبي:) وعلى فكرة أنا سألته وطلع مصري إسكندراني بس من أصول تركية:)) المهم بعد المباحثات والكلام الكتير إستقريت على MY-01 وقولت إتكل على الله وركب وهنا كانت المفاجأة وهي إن هو معندوش المقاس بتاعي اللي هو 195-60-15 وكمان مقاس 185-60-14 ولما بص على بقيت الفروع ملقاش أي حاجة لدرجة إن فرع الغردقة عنده سالب 30 (يعني طالب 30 فردة)وبعد البحث العميق لقينا فرع طنطا عنده فردتين والرمل فرده واحدة والمنيل فردة والمنصورة 10 فرد بس محجوزين.والمفاجأة الأكبر بقى إن المقاس ده مش موجود منه من أي موديل في بريدجيستون غير ال 14 اللي قولت عليهم.
ولما بسأله طيب هو العجز ده دايما ولا الفترة ده بس قالي لأ ده العادي بتاع الشركة إن عندهم عجز دائما في المقاس ده لدرجة إن هو في شهر مجلوش غير 4 فرد بس.
ولما بسأله ليه شركة النيل مش بتعمل طلبات أكتر بدام في ضغط رهيب كده قالي إن للأسف العيب في بريدجيستون الأم علشان بقوا بيهتمه بالكاوتش Ultra Preformance بداية من المقاسات ال16 وسايبين المقاسات الأصغر لفروع بريدحيستون شرق أسيا وبالتالي مش بيلاحقوا على الطلبات ده غير إن المقاسات ده مش بتتباع غير في دول العالم التالت.
بجد أنا خايف لحسن كمان سنه ولا حاجة نلاقي إن المقاسات ده بالحجز والواسطة.
المشكلة بجد إني مش مرتاح لأي نوع تاني غير بريدجيستون وحاسس بجد إن هو ده الكاوتش المطلوب في طرق مصر المحروسة.