الموضوع: فرامل الافيو - تجارب متعددة و حقائق مشتركة و حل منتظر

الاخوة الافاضل

حبيت انقلكم تجربتى بخصوص التيل و الطنابير الامامية للافيو لعلها تفيد

احب اقولكم بس فى الاول انى من ساعة ما اشتريت العربية من سنتين ( اتوماتيك - موديل 2009 ) و انا عمال اقرا من هنا و من هنا على الفرامل و التيل و الطنابير و مكنتش عارف لما يجى عليا الوقت و احتاج اغير التيل اجيب اية من الى كنت بقراة من معاناة و مشاكل

المهم على 20000 كم ظهرت الاعراض جلية وواضحة - غربلة مع الفرامل على السرعات العالية فوق 110 كم/س - طبعا كنت بلف حوليين نفسى - مش عارف اعمل اية

المهم قولت لازم اكتشف بنفسى - خلينا الاول فى المضمون -لازم اجيب التيل و الطنابير الاصلى من التوكيل و بالفعل غيرتهم فى التوكيل ( المركز الرئيسى ) و كلفونى حوالى 1000 جنية ( كانت فردة الطنبورة 350 جنية و التيل كان بحوالى 275 جنية و جبتهم من المخزن بنفسى ) - رفضت انى اغيرهم على الضمان علشان مخشش فى دائرة مفرغة فكان لازم اعرف المشكلة جاية مننين ( من قطع غيار الضمان و لا من الاصلى كمان ).

المهم العربية بقت كويسة جدا و زى الفل و اعتقدت ساعتها ان المشكلة اتحلت و لكن المفاجئة ان المشكلة ابتدت تظهر تانى على 40000 كم - ( غربلة مع الفرامل بعد 110 كم /س ) - لاحظ كدة 40000 كم يعنى المشكلة بتظهر كل 20000 كم ( عمر التيل تقريبا ) .

طبعا فى الصيانة لقى التيل عايز يتغير و الطنابير مريجة ( خد بالك دى الطنابير الاصلى ) فغيرت التيل و ركبت طبعا التيل الاصلى و قولت اغير الطنابير المرة الجاية لربما التيل الجديد ميسببش الغربلة و طبعا كنت غلطان - الغربلة موجودة حتى بعد التيل الجديد ( الطنابير لازم تتغير او تنخرط )

المهم سافرت اسكندرية بالوضع المنيل دة و نزلت هناك شارع صلاح الدين و اشتريت طنابير المانى technoteile بـ 270 جنية للجوز و تيل Hi-Q بـ 65 جنية من واقع تجارب الاعضاء بيقولو كويس ( مفيش اثر لتيل او طنابير الريمسا ) قولت اجربة
و غيرت التيل و الطنابير فى اسكندرية و العربية بقت كويسة فى رحلة الرجوع للقاهرة

انا دلوقتى فى مرحلة تجربة التيل الجديد Hi-Q و ايضا الطنابير الجديدة ( الالمانى لو كانت فعلا المانى )

اهم الملاحظات بعد تركيب التيل و الطنابير الجديدة و اتمنى انكم تقولو رايكم فيها علشان نوصل للحقيقة :

1- اداء الفرامل بعد التيل الجديد حسيت انها ضعيفة شوية صغيرة مش زى الاول فى قوة الفرملة ( انا بقول يمكن ليسة التيل الجديد بيطبع من الطنابير الجديدة - اية رايكم ؟ )- انا حصبر شوية علية و اشوف اداءة اية و لو ممكن ساعيتها اغيرة و اركب الجولد و اشوف انهى فيهم الى عدل - هية خسارة مادية بس لازم اجييب قرار الموضوع دة لانى زهقت .

2- شميت مرتين ريحة شياط مع فرامل خطر بس طول سكة السفر مشمتش حاجة ( بس كنت قافل الزجاج و مشغل التكييف ) و اتاكدت فى مرة منهم انها من عندى لانى نزلت شميت الريحة من العجل الامامى ( حد شم ريحة الشياط دى قبل كدة مع التيل دة ) - على فكرة الفرامل مش قافشة علشان ممكن حد يقولى انها اعراض قفشان الفرامل الامامية .

3- القول الفصل الذى لايقبل المناقشة و دة عن تجربة ان التيل الـ GM الاصلى من الوكيل زبالة و هوة الى بيبوظ الطنابير ( واضحة جلية ) .

4-انا دلوقتى بقى عندى جوزيين طنابير زيادة - الى حعملة انى حخرطهم و اخليهم - لو العيب بتاع ريجة الطنابير دة رجع تانى يبقى مفيش مفر - كل 20000 كم حتغير التيل و الطنابير و تبقى دورة كل 20000 كم .