الموضوع: خليك ايجابى وشارك معانا فى حصر بنزينات مصر الجيده

الاول احب اشكر احمد زونج على موضوعه ( البنزين وانواعه 59 و 92 و 80) الى اتاح لى فكره عمل حصر شامل للبنزينات الجيده فى انحاء بلدنا الغاليه والحبيبه مصر
الموضوع ده كان فى بالى من فتره لما كنت قاعد مع زميل عزيز لى بندردش سوا .. وعرفت انه اشتغل فى بنزينات اكتر من 25 سنه لحد مابقى بيدير ثلاث بنزينات فى وقت واحد
طبعا سالته عن المشكله الكبرى فى عالم الوقود الا وهى غش البنزين
1- هل فى بنزينات بتحط مياه على البنزين؟
ج:- هههاااااا مينفعش الاتنين ميختلطوش ببعض
2- امال بغشوه الزاى؟
ج:- انواع الغش كالتالى:-
1- يبيع 90 على انه 92
2- يحط فى خزان 90 شويه 80 وخزان 92 شويه 90 والعمليه دى بنسب وحرفه معينه علشان متبقاش محسوسه وفى نفس الوقت تحقق هامش ربح كويس
علشان كده كان ديما يقولى متحطش بنزين 90 فى بنزينه بتبيع 80 وحطه فى بنزينه فيها 90 و 92 و 95
3- يلعب فى ساعه العداد بحيث انه يوفر على سبيل المثال لتر فى الصفيحه
قولتلو اييييه امال فين بتوع الدمغه والموازين رد عليا ببتسامه ساخره وقالى كله بيتراضى!!!!!!!!!
قولتله و الحل ايه
قالى :-
1- حط فى بنزينه مكشوفه و مش غطسانه فى حته ناقيه بعيد عن العين
2- متحطش بنزين 90 فى بنزينه بتبيع 80 وحطه فى بنزينه فيها 90 و 92 و 95
3- اتعامل مع بنزينه حسنه السمعه زى امارات مصر او الوطنيه بتاعه الجيش يخافو يلعبو فى العداد او نوع البنزين
وبناء على كلامه بقيت افول من الوطنيه او الامارات 92 وانا مغمض من اى مكان والكلام ده بقالو اكتر من سنه ولما ازنق اوى احط 10 او20 لتر على الاكثر من البنزينات الى معرفهاش
- فى شركات كويسه زى شيل و موبيل بس للاسف مش كل الفروع محترمه والكلام ده بينطبق على باقى الشركات وعن تجربتى الشخصيه (13 سنه سواقه فى انحاء المحروسه)
- وعلى فكره هو قالى ان كل البنزينات فى مصر بتجيب من مصدر واحد الى بيفرق القائمين على اداره البنزينات اذا كان عنده ضمير ولا...........
علشان كده يا شباب مصر وشباب المنتدى الكرام ويا شباب قسم نيسان الاحباء عيزين نحارب الفساد والغش بشكل عملى زى ما وصانا الرسول سيدنا محمد خير خلق الله صلى الله عليه وسلم وعلى جميع الرسول بتغير المنكر قدر المستطاع
علشان كد عيزين كل فرد متاكد من بنزينه جيده فى اى حته فى بلدنا الحبيب يدخل ويشارك معانا فى الحمله دى والرجاء منكتبش عن اى بنزينه سيىه علشان منخشش فى حته النفسنه او الظلم نتيجه مواقف شخصيه وانا هبدء بنفسى
والف شكر
1- بنزينه الوطنيه على الاوتوستراد وانته رايح المعادى قبل نزله زهراء المعادى
2- total على الاوتوستراد قبل ابراج الشرطه امتداد الامل
3- الوطنيه على الاوتوستراد بعد خارجه زهراء المعادى وقبل مساكن الشركه الكنديه
4- الامارات مصر قبل كارفور المعادى
5- الوطنيه المقابله لكارفور المعادى عند داخله الهضبه الوسطى المقطم
6- الامارات مصر كارفور مصر اسكندريه الصحراوى
7- الامارات مصر عند نازلت طريق مصر الاسكندريه الزراعى المتجه الى طنطا او القاهره
8- الوطنيه الكيلو 60 مصر اسكندريه الزراعى عند قويسنا
ده الى اعرفهم ومتاكد منهم عن تجربه لمده كبيره والله اعلى و اعلم