الموضوع: ناس مبتعرفش تبيع ؟؟؟

بسم الله الرحمن الرحيم

لمن جيت قررت أشتري عربية فمكنش قدامي غير ثلاث خيارات زيي زي أي مواطن مصري يأما أروح على معارض عربيات يأما مواقع الانترنيت يأما سوق الجمعه

الطريف في الامر أني قلت خليني أشوف المواقع الانترنيت أحنا خلاص أطورنا ... بس أكتشفت حاجة غريبة أجي أخش الموقع ألاقيهم فرشين سجادة جميلة ونور أيه وحكايه وروايه بس كل العربيات الي معروضة فيها معروضة من سنين وكل ما تتصل بواحد يقولي خلاص أتباعت أنا كنت عارض العربية السنة الي فاتت .
أكتشفت ان المواقع بيخلل الاعلانات عندو علشان الناس تفضل داخله خارجة داخله خارجة عليه ويقلك أصل ده أكبر موقع فيه عدد زوار بس فائدة مفيش .علشان المعلنين .

ومواقع تانية مفهاش ترتيب نهائي لأحدث العربيات أضافة ومرات يكون فيها عربيات لقط بس تتصل بعد فوات الاوان . ولو صدف انك اتصلت على واحد علشان تشوف عربيتو بيرتبلك ميعاد بالليل في أخر الدنيا وفي عز الليل علشان الشغل بتاعو ، وبعد ما تضرب المشوار تلاقي عربية مشنشة صاحبها بيقول عنها (دي فبريكا يا بية ) ... هههههههه ياعيني على الفبريكة ياسيدي على الفبريكة ده مفيش حد في الشارع غير موقعلو عليها بمسمار أو بمفتاح حتى أني لقيت على الرفرف واحد رسملو عليه قلب وسهم كده وكاتب عليه منى وأحمد الى الحب الابدي ... دي غير طبعاً ذكريات الشباب .

أما بالنسبة للفرش الداخلي حدث ولا حرج ، الفرش من جوة بيحسسك بلمة العائلة وقد أيه هما بيتجمعو على سفرة وحده جو العربية ويقعدو ياكلو ويشربو . بقع بقع بقع ... ويقولك ده فرش الفبريكككككة يابيه .(الفرش الاصلي الي بينزل من المصنع )

وبعد ده كلو أنتا عاوز فيها كام ياعم الحج يقلك انا عاوز فيها ويضربلك مبلغ كبيرررررر ويقولك انا الحمدالله قنوع في ناس بتطلب اكتر من كده بس انا الحمد الله قنوع . ياسيدي على القناعه ... حتى أن واحد رحت أشوف عربيتو بصيت لقيت عربية طالعه من رالي بالطينة والعفرة بتاعتها قلتلو ايه ده قالي انا جيبهالك بعبلها على طبيعتها ، قلتلو انتا جايبها من غبات الامزون طيب انا هعاين فيها ايه دي هعاين الوحل يابيه روح اغسلها ونظفها كده انا مش شايف في العربية ولا خربوش من كتر الوساخه الي عليها بصيت لقيتو بصلي كده وبيقولي وانا كل زبون هيجي يشوفها هقعد أغسلها ونظفها ههههههههه . قلتلو لا عندك حق خليها كده مزبلة . مع العلم اني بسئل عن عربية يباني موديل حديث مش عربيية 128 ... بس الناس مش عارفه ازاي تحافظ على حاجتها أو حتى تنظفها .


وحتى من عيوب المواقع اني مره اتصلت على اعلان ظريف ونضيف وعربية متصورة كده بشكل لطيف وحديث وسعرها معقول فبعد ما اتصلت ردت عليا وحده وعلى طول ادت السماعه لجوزها لمن عرفت اني بتصل بخصوص العربية بصيت لقيت الراجل اتعصب جداً وقالي وبعدين بأه انا مش قلتلك متتصلش على النمرة دي تاني على فكرة انا لساني زفر جداً ، قلتلو فيه ايه يابيه انا اول مره بتصل وبتصل بخصوص الاعلان واتضح في النهاية أن واحد حاطط نمرة مرات واحد على اعلان عربية مغرية علشان الناس تدايقو بأتصالاتهم ... الي يظحك في الامر انو بيقولي الي هيتصل بعد كده انا هشتمو قلتلو لا ده الاعلان بيقعد على الاقل 14 يوم ولسه جمهورية مصر العربية هتتصل بيك وأمة لا إله الا الله هتكلمك فالي يتصل بيك قولو أتباعت واذا جالك واحد تنح وقلك اتباعت بكام قولو بالي فيه النصيب وسك السماعه .

ومن عيوب كمان المواقع ، تلاقي صاحب العربية عامل أعلان يعتبر أنو مش كاتب فيه حاجه ، لا كاتب سعر ولا كاتب هيا مشية كام ولا فيها قزاز كهربا ولا لأ ولا ايه موصفتها كل الي فالح فيه انو يقولك الوسطاء يمتنعون طب ياعم أكتب العربية دي موصفاتها ايه أكتب على الاقل مميزاتها وبلاش عيوبها على الاقل أكتب لونها أيه مرات اللون بيفرق مع ناس ، ولا هيا عربيتك فزورة والي عاوز يعرف يتصل بالبرنامج .

النوع التاني بأه من الشراء هو المعارض تلاقي واحد مش فاهم اي حاجه في اي حاجه ويودي عربيتو المعرض يقوم المعرض يحط سعر في السماااااااااااا أيجار العمال وأيجار المكان وفواتير الميه وفواتير المحمول ومصروف حماده أبنو ونفقت طليقتو وقسط التلاجة وفواتير الكهربا ويحط العربية عندو في المعرض وكل يوم بتتغسل بشكل جميل لحد مايجيلو واحد مش فاهم اي حاجه في اي حاجه ويشتريها منووو ...

النوع الثالث : سوق الجمعة سوق طويل عريض العربيات الحلوة فيه بتخطفها التجار والعربيات المشنشة تلاقيها واقفه ... وتروح تعدي على عربية عربية لاحد معلق ورقه بموديل السيارة وماشية كام وسعرها كام لازم تقعد تلف كده وتسئل زي الشحاتين أصحاب العربيات بي كام دي ياريس وماشية كام ياريس طب ماتكتبو السعر على عربياتكم .

وتلاقي كمان ناس كتير مش فاهمه حاجه في اي حاجه بس لقى عربية نفس الماركة بتاعتو بكذا يقوم هو كمان يقول على عربيتو بكذا من غير اي وعي أن عربيتو ولا حاجه وعربيت التاني نظيفه قوووي علشان كده صاحبها مغلي سعرها .

فيقوم بدون وعي يحط نفس السعر فيجي الي عربيتو نظيفه يلاقي عربية زباله بنفس سعرو يقول اااااااااااااالله لا اانا عربيتي أحسن منوو يبقى لازم أرفع سعرها فيجي الاولاني يقول الله العربيات غلية لا ما أرفع انا كمان وهكذا غلي وانا غلي والزبون يغني تراللي . ياعيني عليكي يامصرررر .