الموضوع: عايز أظبط الصوت

مفيش رد؟؟؟

انت بتحب الصوت النقى ولا بتحب البيز ولا محتاج تغطى كل طبقات الصوت و يا ترى بتحب الصوت الهادى و لا العالى يعنى حاول توضح انت عاوز تسمع الصوت ازاى

أنا بفضل الصوت الواطي لكنه يكون نقى ومفصل ... يعني البيز معقول و التربيل مظبوط وصوت المغني واضح

وشكرا لإهتمامك

يا جماعة الراجل مش عاوز يخرف فى الصاج بتاع العربية انا عندى اقتراح هيجبلك من الأخر هات سماعتين سونى كومبنينت لأبواب الأمامية 260 وات على مقاس السماعات الفابريقة و لو فى تويترات او مكان ليها فى البابين اللى ورا يبقى هات 4 و هتسمع الصوت اللى انت عاوزة

المشاركة الأصلية كتبت بواسطة mdogs1979

هقولك تجربه سابقه ليا كان عندى نفس المشكله و مكنتش عاوز اركب حاجه خارجيه و افتح فى الصاج

العده كانت عباره عن

جى ام فور شانيل 600 وات او زى ما تحب بس لازم فور شانيل

4 شماسه تويترات الاربعه ب 100 جنيه

صب سونى 10 انش 1000 وات او اى صب زى ما تحب

كاسيت بايونير فيه كونترول صب

انا مش بحددلك الانواع علشان يبقى على حسبب ميزانيتك


بص يا باشا معروف ان صوت الاغانى مكون من 3 اصوت اساسيه الفوكال و التريبل و الدرمز

و دول من الميد رنج و التويترات و الصبوفر بنفس الترتيب

سمعات العربيه مفهاش تقريبا غير الميد رنج الى بيطلع الفوكال او صوت المطرب فقط او حتى لو فيها تويترات بتبقى ضعيفه جدا


هناخد صوت الميدرنج من سمعات العربيه متوصله على الكاسيت
و صوت التريبل من الشماسات او التويترات اللى متوصله على الجى ام فى 2 شانيل
و صوت البيز من من الصب المتصل على البريدج فى الاتنين شانيل الباقين

و هتسمع صوت رائع و نقى مختلف كليا عن الصوت الحالى سواء عليت الصوت او جبت الكاسيت على اخره

بس لازم متعليش التريبل فى الكاسيت و لا البيز لانهم اصلا هيبقو جامدين من الصب و الشماسات

و بكده مش هتفتح اى صاج نهائى و الشماسات مش لازم تبقى متعلقه على شماسه العربيه
ممكن تحطهم فى اى حتى حتى لو تحت الكراسى او فى مكان السماعات بلزق دبل فيس

بالنسبه للانواع و التكلفه ,, ارشحلك صب بايونير 10 انش و ده تكلفته فى حدود 390 جنيه
و جى ام سيفونى لانه يعتبر اعلى بور حاليا او سونى اكسبلود
الشماسات مفيش غير نوع اسمه فيجا فى السوق و الاتنين ب 50 جنيه
وصلات ارسى بايونير بسعر الواحده 45 جنيه
الكاسيت هيفرق معاك كتير عشان الاكوليزر و تحكم الصب

لو محتاج حاجه انا معاك افضل محل تشترى منه اسمه ارخصهم فى التوفقيه
و افضل محل تركب فيه هو ادريان اى فرع دى مش دعايه والله بس انا جربت كل المحلات
من حيث السعر ادريان غالى جدا لاكن الفنين بتعهم تمام

يافندم تسلم بجد على ردك الكامل.. وأنا عندي إستعداد أجيب صب و تويترات حتى لو بايونير أو فيجوجين وال جي إم كمان طالما مش هخرم في العربيه يبقى تمام ... بس بالنسبه للكاسيت انا لسه مركب الدي في دي في العربيه وجايبه ب 2000 حم فحرام أغيره ببايونير علشان حوار الإكيولايزر والصب كنترول فإيه رأيك؟؟

المشاركة الأصلية كتبت بواسطة waeltealeb

الصوت مش هيضبط معاك على سماعات السياره الأصليه ،، لازم تجيب سماعات خلفيه و انا افضل نوع jpl بيضاوى و مش لازم ابدا تجيب جى ام طالما انك لا تحب الصوت العالى قوى .. وهات كمان معاهم سماعتين تويترات و تركبهم فى الأمام او شماسات ... بس المهم اللى يركب يبقى فاهم انه بيركبهم فى النترا 2011 مش فى تاكسى مو 70 ، علشان يشتغل بضمير و بنظافه مش يبوظ فى العربيه و خلاص .... وبعد التركيب ستشعر ان السياره بقت حاجه تانيه خالص . والف مبروك السياره الجديده

ربنا يبارك في حضرتك... بس هو أنا عايز موضوع التخريم في الصاج و الرف الخلفي حل أخير علشان الكوري كله لو اتفكت فبره ما بترجعش زي ما كانت و تقعد تسمع صوت مراجيح جوه العربيه