الموضوع: أسعار السيارات المستعملة .... في اليابان

بقالي حوالي نص ساعه متابع الموقع ده ولاحظت حاجه فى العربيات المعروضه عليه ان فى تفاوت ضخم فى الاسعار بحسب الموديل كالتالي :
العربيات الاحدث من موديل 2007 او 2008 : تقريبا بنفس السعر فى مصر
العربيات الاقدم من موديل 2005 وانت نازل : بسعر يعتبر زهيد وكل ما الموديل يقدم بينزل السعر أكتر
بصراحه فى تفاوت في السعر حسب الموديل بشكل كبير
قد يكون عشان الضرايب ( بعض الدول بتزيد الضرايب بزياده عمر السياره يعنى كل ما تقدم يدفع أكتر ) قد يكون ده السبب ..!!
وحاجه تانيه لاحظتها انهم بيقدرو العربيات المتظبطه وسعرها بيزيد كل ما بيزيد الشغل الى فيها

هوا ده الطبيعي في دول كتير
مفيش جمارك فسعر العربيات الجديده قليل فبالتالي العربيات المستعمله ملهاش تمن علشان كله بيشتري جديد وكل ما موديل العربيه يقل محدش بيبصلها فتلاقي تمنها بقي بلاش تقريبا
انا اسمع ان الزلموكه في السعوديه - عربيه المصريين هناك - تمنها حوالي من 5 ل 8 الاف ريال اللي هيا تمنها هنا تقريبا 60 الف وطالع

حجتنا من زمان ان فيه المفروض منتج وطني عشان كدا فيه جمارك علي العربيات المستورده زي معظم الدول

لكن دلوقتي مفيش زفت صناعه وطنيه ف الجمارك مالهاش اي موقع من الاعراب
يعني ايه جمرك في مصر ؟ يعني جبايه من فلوس الشعب توصل ل اضعاف تمن السلعه المباعه و المواطن مش مستفيد حاجه من المبلغ المرعب الي بيدفعه !

كنت ف السعوديه بيبقى قدامي عربيات لقطه بمعنى الكلمه و موديل فوق ال 2000 بي ام و مرسيدس
انا كان قدامي مرسيدس s500 ب 12 الف ريال و لو كنت فاصلت معاه شويه كنت خدتها ب 8 و العربيه موديل 2001
بس المشكله هاجيبها اعمل بيها ايه ؟ مانا مش هعرف انزل بيها مصر

كان بيحاولو يعملو قانون ان كل مصري في الخارج ينزل عربيه من غير جمرك بس طبعا مفيش حد اتحرك
و قالو الجمارك هاتنزل و مفيش حاجه نزلت

الجمارك علي الاوروبي نزلت 30% من 2009 و لغايه دلوقتي ماشوفناش حاجه غير زياده في الاسعار

دا البي ام موديل 96 ال 318 في السعوديه ب 5000 ريال و مابتتباعش
هنا ب 50 الف و بيبقى زعلان انها ماجابتش اكتر من كدا !

البلد دي عايزه تتغسل و تتنضف و تتعمل من اول و جديد
المفروض نواب مجلس الشعب الي اختارناهم يشتغلو علي النقط دي