الموضوع: دخنة بيضاء عند التشغيل

المشاركة الأصلية كتبت بواسطة yobaaa

هو فعلا طلع كاوتش صباب ....هل فيه ضرر إنى أمشى بيه كده و لا إيه النظام ؟؟!!

مشكلتة انة حا يفضل ياكل زيت نسبيا و تضطر كل شوية تزود زيت
حا احسبهالك بطريقة اخرى
لو انت بتحط زيت الجركن فى حدود 120 جنية مثلا و ممكن اقل
يعنى سعر الكيلو بتاع الزيت حوالى من 20 الى 30 جنية حا تفضل تزود زيت كل فترة أد اية دى خسارة نسبية
فى الصيف الموضوع لو تطور ممكن يبوظ حاجة اخرى بعد كدة طب ما نلحق المشكلة و هية لسة فى بدايتها
و على فكرة الخراط بيعمل طقم كاوتش الصباب و بيظبط التاكهات و لو لا قدر الله الوش بتاع السلندر عاوز يتمسح كل دة ب 90 جنية تقريبا و مصنعية فك و تركيب للميكانيكى فى حدود 80 جنية بالكتير مثلا يبقى الاجمالى 180 جنية مثلا بالتقريب و يبقى الزيت الى حا تحطة بعد كدة حا يفضل فى منسوبة الطبيعى و مش حا تقعد تزود كل شوية و تلاقى الدخنة الى طالعة من ورا من الشكمان
ايهما افضل ؟

بص كدة يا باشا دى صور توضيحية بس دة موتور فيات
حا تشوف الصبابات و الكاوتش بتاع الصباب

المشاركة الأصلية كتبت بواسطة yobaaa

شكرا جدا أستاذ هشام ....هوا كده يعتبر نص عمرة و لا إيه ؟؟!!

العفو يا باشا
لآ لآ لا و لا ربع عمرة حتى دة يعتبر كلام فاضى
طقم الشنبر هو الى بيقال علية جزافا نص عمرة
العمرة الكاملة يعنى تغير بساتم و تخرط البلوك و تغير طقم الشنبر و تظبط السبيكة و تعمل رودية

لو انت من سكان مصر الجديدة او مدينة نصر و حا تودى لخراط
روح عند الخراط الى عند كوبرى التجنيد الى فى شارع جسر السويس

المشاركة الأصلية كتبت بواسطة yobaaa

شكرا يا أستاذ هشام ....فعلا أنا ساكن فى أخر جسر السويس .....ممكن تقولى مكان الخراط ده و كده انا هحتاج ميكانيكى و خراط صح و لا أنا فاهم غلط ؟؟

العفو يا باشا
بص الميكانيكى هو الى حا يفك و يركب بعد كدة
حا تاخد الوش للخراط و حا يظبطة و الميكانيى حا يجمع فقط و يقفل
الخراط عارف كوبرى التجنيد الى فى جسر السويس على ايدك اليمين تحت الكوبرى فية ناس بتبيع لوازم الشيشة هو جنبهم على طول و المدخل بتاع الشارع فية حوالى 4 خراطين على الاقل فى الشارع دة
الخراط اسمة فريد