الموضوع: صيانة الا 300000 كم

اولا: 1000 مبروووووووك ع العربية .. ومش عارف حضرتك كشفت عليها قبل الشراء زى ما نصحناك ولا لأ فى الموضوع اللى كنت عامله فى 5-1-2012:
http://www.nilemotors.net/Nile/264912-2002.html

ودى كانت مشاركتى بموضوعك:

المشاركة الأصلية كتبت بواسطة y2y1500

بيتهيألى انا من فترة قريت موضوع مشابه لنفس مواصفات العربية دى وكانت ماشية كتير برضه ومحتاجة تغيير عفشة كاملة وماخفى كان اعظم
وشوف الموضوع ده لما عضو كريم راح كشف على عربية مستعملة فى التوكيل من امبارح
http://www.nilemotors.net/Nile/264670-a.html
نصيحة بلاش السعر القليل يزغلل عينك وتشتريها وبعدين تفاجأ بمصاريف لا حصر لها لأن قطع غيار الصنى الاصلى غالية شوية مقارنة بالكورى بس اقل من يابانى تانى ومش كتير من اصحاب المستعمل بيصرفوا على عربياتهم ويهتموا بحالتها وصيانتها
ووش كده الموتور هايحتاج مصاريف لأنه 300.000 كم
والاهم من حالة العربية هو صاحب العربية لأنها بتفرق كتير صدقنى وده اللى مكرهنى فى سوق المستعمل
تبقى العربية زيرو باكياسها وتلاقى صاحبها رايح شارى جركن زيت وفلتر ويركبهم برة وماشى بيها لا تربيط عفشة ولا تدوير عجل ولا زبط زوايا ولا حتى زبط ضغط العجل !!!!!!!!!!!

ثانيا: انا خايف عليك بعد اما تروح اى توكيل نيسان ومنهم طبعا اوتوايجيبت ابو رواش اللى بيفصص العربية حتة حتة ويقيم حالتها بالتفصيل الممل وييجى يعملك مقايسة تغيير قطع غيار موتور وعفشة وخلافه تلاقيها عاملة 15-20 الف ج وطبعا ده ممكن يقفلك من العربية ويكرهك فيها ومش بعيد تبيعها وتخسر فيها فى وقت قصير .. وعشان ما يحصلش كده قدامك حل من اتنين ..
1- انك تستعمل العربية عادى جداااااا بعد تغيير زيت المحرك زى ما حضرتك عملت بالزبط وتحطلها بنزين ومياه وتراجع ضغط الكاوتشات وتغسلها وكده وتصلح اى حاجة تظهر فى العربية اول بأول وطبعا قطع الغيار الاصلية وان كانت اغلى هاتديك عمر افتراضى اطول من غيرها
2- لو حضرتك حابب تروح التوكيل وتعمل صيانة ال40.000 كم زى ما احمد قالك يبقى اعمل حسابك على تغيير بوجيهات 68ج + فلتر هواء 135ج + طقم سيور 250ج + تبديل مياه الراديتير 50ج + مصنعيات تركيب 300ج واذا ظهرت حاجة لتغيير تيل فرامل امامى يبقى زود 350ج او خلفى (تقريبا مثلهم) ولو طنابير يبقى اغلى من التيل (475ج تقريبا) ولو كاوتشات مساعدين الواحدة ثمنها + تركيبها ب150ج ده طبعا غير الزيوت (باور - فتيس - فرامل) وطلمبة البنزين والله اعلم ممكن ما تكونش غيرت سير كاتينة الجنزير (مش عارف سعره) والله اعلم كمان بعد الكشف ع العفشة (مساعدين - مقصات - جلب - بارات - علبة دركسيون - .... الخ) تبقى فيه حاجة محتاجة تتغير ولا لأ لأن حضرتك مش موضح حالة العربية بالتفصيل وايه قطع الغيار اللى غيرها مالكها الاول


وبصراحة كده انا مع الاختيار الاول وآسف لو كلامى سبب ضيق لحضرتك
وباقولها للمرة التانية لو العربية حالتها حلوة وماشية كويس معاك ومفيش اعطال جسيمة يبقى ابعد عن التوكيل وريح بالك لأنى مقتنع ان العربيات دى قِرَف وممكن تبقى معاك زى الفل ومعايا لأ والعكس صحيح
واى استفسار او سؤال كلنا تحت امرك بس بما انك عضو جديد معانا فيفضل ان تقوم بجولة فى المواضيع المثبتة وتقارير الاعضاء والصيانات والاعطال الميكانيكية هتستفاد جدااااا وتوفر وقتك فى السؤال وانتظار الردود