أنا ليا تجارب رهيبة في الموضوع ده والمفروض يدرسوها في كليات الاقتصاد :)
أنا تزوجت وأنا في امتياز ...كان مرتبي 260 جنيه سنة 2009 شهر 10 يعني من 4 سنات تقريبا ...
تخيل بقى اني كنت فاتح بيت ب 260 جنيه !!!!
كنت باخد رز وسمنة من أمي من ايراد الأرض ... وساكن في شقة أبويا جايبهالي ...وبكدة وفرت الايجار وارز والسمنة ....ربنا كرمني بعد شهرين واشتغلت في عيادة واحد صديقي وكنت بروح الأيام اللي هو فيها نوبتجي ....
فدخلي زاد بتاع 100 جنيه !!!!!!!!!!!
ده بالنسبة لي ...كان مبلغ خيالي ...خلي بالك أنا بكلمك في سنة 2010 مش سنة 1955 :)
طبعا الأخت زوجتي ربنا يرضى عنها عمرها ماطلبت حاجة فوق طاقتي رغم انها بنت عز زي مابيقولوا ومصروف ايدها معدي 700 جنيه !!!!!!!!!!!
تخيل مثلا ان زوجتي كان معاها اي فون وماكنش أنا في مقدرتي أعزمها على بيبسي صاروخ !!!!!!!!!!!!!!!
كنت بشرب قصب لما أحب أعزمها عزومة ملوكي !!!!!!!
ههههههه
طبعا أبويا وأمي كانوا سايبيني أتربى لأنهم كانوا مصرين أتجوز بعد الماجستير ....فسابوني أشرب :)
المهم ...أثناء توزيع رغبات التكليف كان نازل أول مرة في التنسيق مكان اسمه : 15 مايو !!!
وده بعد انفصال مدينة حلوان عن القاهرة !
المهم كتبت 15 مايو دي عن طريق الخطأ !!
وتطلع المدينة دي فييييييين !!! جنب سكني تقريبا ..!!والمفاجأة انهم بيعطوا الطبيب حافز اضافي تقريبا 200 جنيه زيادة !!!!!! ده بالنسبة لي مبلغ فلكي !!!:)
المهم ...طبعا ده كان رزق الزواج ...
تم تكليفي في 3 2010 ...اشتغلت شهر كامل بدون مرتب طبعا وكان شهر من أصعب مايكون !
اقسم بالله كنت بلحم النبطشيات علشان ال 2 جنيه المواصلات كانوا بيفرقوا معايا ,,,فبدل ما اجي 6 ايام في الاسبوع كل يوم 6 ساعات ...كنت اخد 24 ساعة وناس كتير بتعمل كدة بس أنا كنت بعمل كة علشان أوفر فلوس المواصلات !
المهم ...
طبعا ربنا كرمنب بقى بأول مرتب وكان مفاجأة ...800 جنيه مصري تقريبا !!!!!!!!!!!!!!
يانهار النهار ...
عملنا حفلة على المرتب ده ...بس كان فيه مشكلة ...إني كنت وعدت والدتي إن أول مرتب هديهولها ...
رحت اديت المرتب لأمي !!!!
وقلبي يتمزق !!!
المهم ...أمي أخدت المرتب باليمين وقلبي سقط بين ركبتي وأعطتنيه بالشمال فعادت الحياة إلى روحي :)
لن أنسى هذا الموقف الرائع لك ياحاجة :)
طبعا عيشتنا اتغيرت بعد هذا المرتب الضخم !
وبقيت أشتري سمنة !
صحيح بجيب علبة سمنة بلدي كل 4 شهور ...بس أهو بقيت أشتري سمنة ...وده تغير جيو استراتيجي مذهل :)
شوية كدة ...وواحد معايا في المركز الطبي اللي في مايو عنده مركز قال لي هعوزك تشتغل هناك ...هتديني كام يابومبو ... الكشوفات بالنص !
طبعا دخلي ارتفع ارتفاعا غير مسبوق !!!!!!!!!!!!!
بقيت أقبض مبلغ ضخم جدا ومش عارف أصرف فلوسه فين !!!!
أصبح دخلي الشهري تقريبا 1400 جنيه !!!!!!!!!!!!!!!!!!!!!!
الكلام ده تقريبا في 7 2010 ...طبعا نظرا لضخامة المبلغ ...بدأت أحوش منه !!!!!!!!!!!!
والله العظيم زي ما بقولك كدة ...وبدأت حملة تسديد ديوني !!!!!
ربنا كرمني اخر كرم .... مراتي سافرت السعودية لأبوها شهرين قعدت أنا مع أمي ...وحوشت بقى 2800 بلبل !
طبعا ده بالنسبة لي مبلغ فلكي ...وبدأت أفكر أشتري عربية !!!!!!!!!!!
قسما برب العزة زي ما بقولك
رسمت خطة على سنة ونص تقريبا إني أشتري عربية ب 15 ألف ...
المهم ...ربنا كرمني بقى وقامت ثورة يناير ورحت استلمت نيابتي في مستشفى تعليمي وسجلت ماجستير وامتحنت جزء أول ...ودخلي تقريبا هذا الرقم الضخم بل والضخم جدا !!!!!!
طبعا النيابة بقى بتزود دخلي كمان 400 جنيه تقريبا نبطشيات !!
ده برضو بالنسبة لواد من سنة كان مرتبه 280 جنيه يعتبر رقم رهيب :)
بعد ماخلصت امتحان الجزء الأول للماجستير بقى يامعلم ...ربنا كرمني اخر كرم ولله الحمد والفضل والمنة ..
زادنا من فضله وكرمه وجوده ...وبارك لنا فيه ...
لكن أنا إجمالا مؤمن بمجموعة أفكار بتخليني ما اصرفش كتير ...
يعني مثلا أنا عندي عدد 2 مكيف و 2 سخان كهربا ومعدل فاتورتي الشهرية 40 جنيه أو أقل ده مؤخرا ...
لكن من شهرين كدة كان بيجيلي 30 جنيه فاتورة !!!!
الميه بدفع تقريبا 6 جنيه في الشهر ...
بجيب اللحوم من منافذ وزارة الزراعة بتاعت الحكومة ... لسة بجيب رز من أرض أمي الله يباركلها ...
بجيب الفراخ مثلا في العروض بتاعت كارفو
طبعا عندي بطاقة تموين فبجيب السكر وزيت القلي من التموين
تقدر تقول بصرف في الشهر قرابة 1000 جنيه
بس ده مؤخرا ...
لكن الأول كنت باكل فرخة 800 جرام في الاسبوع :)
الترشيد مهم جدا .... وجود ديب فريزر مهم جدا جدا جدا
أذكر في مرة الوطنية نزلت عرض على صدور الفراخ المخلية ( فيليه ) كان الكيلو ب 28 تقريبا رحت اشتريت 10 كيلو وحطيتهم في الديب فريزل قعدوا معانا بتاع 6 شهور :)
وجود زوجة مدبرة ده مهم جدا جدا جدا
طبعا التوكل على الله ومحاولة اللجوء اليه ودعاءه في الكرب مهم جدا جدا جدا
المفضلات